Jesu uina nakonyana mwa Kapernauma yeli bukaufi ni Liwate la Galilea hamulaho wa kufolisa muuna yaomelezi luñañali. Hape buñata butaha ku yena, mi ukalisa kubaluta. Hanze azamaya, ubona Mateu, yabizwa hape kuli Livi, ainzi fa ofisi ya mutelo. Jesu wamumema, uli: “Unilatelele.”—Mateu 9:9.

Mwendi Mateu waziba zeñwi za lituto za Jesu ni misebezi yemiñwi yaezize mwa sibaka seo, sina mone bazibela bo Pitrosi, Andreasi, Jakobo, ni Joani. Honafo, Mateu ni yena ukala kulatelela Jesu. Mateu utalusa taba ye, mwa Evangeli yahae, uli: “Kihaa yema [yena Mateu] ni kumulatelela,” yena Jesu. (Mateu 9:9) Kacwalo, Mateu usiya musebezi wahae wa butelisi mi uba mulutiwa wa Jesu.

Ka nako yeñwi kuzwa fo, Mateu ueza mukiti omutuna kwa ndu yahae, mwendi ilikuli abonise buitumelo bwahae ku Jesu bakeñisa kumubiza. Ki bo mañi babañwi babamemilwe kwa mukiti, kwandaa Jesu ni balutiwa bahae? Kumemilwe batelisi babañwi, ili bane babanga balikani ba Mateu. Baamuhela mitelo yefiwa babusi ba Roma, ili mitelo yelifiwa ki ba lisepe zefueka fa likamba, yelifiwa ki bazamai babaitusisa mikwakwa yemituna, ni mitelo ya libyana zekena mwa naha. Majuda baanga cwañi batelisi bao? Batoile batelisi bao kakuli hañata, ka kusasepahala, batelisanga batu masheleñi amañata kufita ebaswanela kutela. Hape kwa mukiti wo kunani baezalibi, babazibahala ka muzamao wabona omaswe.—Luka 7:37-39.

Bafalisi babaipapata kuli balukile hababona Jesu kwa mukiti ni batu babacwalo, babuza balutiwa bahae, kuli: “Ki kabakalañi muluti wamina haaca ni batelisi ni baezalibi?” (Mateu 9:11) Jesu hautwa cwalo, ualaba kuli: “Batu babaiketile habatokwi mualafi, kono baba mutokwa ki babakula. Cwale hamuye, muyo ituta seatalusa manzwi a: ‘Nilata sishemo, isiñi sitabelo.’ Kakuli nitezi kuto biza baezalibi, isiñi batu babalukile.” (Mateu 9:12, 13; Hosea 6:6) Bafalisi hababuleli niti hababiza Jesu kuli “muluti.” Nihakulicwalo, bakona kuituta sesiñwi ku yena ka za kuluka.

Mwendi Mateu umemile batelisi ni baezalibi kwa ndu yahae kuli bato teeleza ku Jesu, “kakuli nekunani babañata ku bona bane bamulatelela.” (Mareka 2:15) Jesu ubata kubatusa kuba ni silikani sesinde ni Mulimu. Haakendi batu babacwalo, sina mobaezeza Bafalisi babaipapata kuli balukile. Sina mualafi hatusa mukuli kuli afole, Jesu ni yena, ka mukekecima ni sishemo, utusa batu bao kuba ni silikani sesinde ni Mulimu.

Jesu habonisa sishemo kwa batelisi ni baezalibi, haki kuli ulumeleza libi zabona, kono ubabonisa mukekecima sina mwanaaezelize kwa bakuli banaafolisize. Ka mutala, muhupule kuli naabonisize mukekecima ku muuna wa mbingwa ka kumuswala, mi ali: “Nalata! Ukene.” (Mateu 8:3) Kana ni luna haluswaneli kubonisa sishemo kwa batu baba mwa butokwi, sihulu ka kubatusa kuba ni silikani sesinde ni Mulimu?