Mwendi mutabela kuziba taba yende. Kaniti, kunani taba yende yekona kutusa mina ni batu bemulata.

Taba yende ye, ifumaneha mwa Bibele, yona buka yanaatahisize Mubupi wa pupo kamukana, yena Jehova Mulimu, kuli iñoliwe lilimo-limo kwamulaho. Mwa buka ye, lukanyakisisa libuka zeene za mwa Bibele zenani taba yende hahulu yelutusa kaufelaa luna. Libuka zeo lizibahala ka mabizo a batu banaaitusisize Mulimu kuliñola, ili Mateu, Mareka, Luka, ni Joani.

Batu babañata babizanga libuka zeene zeo kuli ki Libuka za Evangeli zeene. Kaufelaa zona libulela za evangeli, kamba taba yende ka za Jesu, kuli ki yena yaitusiswa ki Mulimu kupilisa batu ni kuli ka kuba Mulena wa Mubuso wa Mulimu wo kwa lihalimu, Jesu ukafa batu babalumela ku yena limbuyoti za kamita.—Mareka 10:17, 30; 13:13.

Mwendi mukana mwaipuza libaka Mulimu hanaasusumelize batu kuñola litaba zeene zebulela za bupilo bwa Jesu ni za lituto zahae.

Kwatusa kuba ni libuka zeshutana, zebonisa zanaaezanga Jesu ni zanaabulezi. Ka mutala, muunge kuli baana babane bayemi bukaufi ni muluti yazibahala hahulu. Muuna yayemi fapilaa muluti unani ofisi ya mutelo. Yayemi kwa bulyo bwa muluti ki mualafi. Muuna ya kwa nzohoto, yasweli kuteeleza ku muluti yena ki ndui mi ki mulikanaa hae yomutuna. Mi muuna wa bune, ya kwamulaho wa muluti, yena utalimezi feela mi hape ki mwanana kubabañwi kaufela. Baana babane bao kaufelaa bona basepahala, mi yomuñwi ni yomuñwi kunani lika zatabela hahulu. Kaufelaa bona hane bakañola taba yeama zabulela muluti ni zaeza, zetaluswa mwa litaba zebañozi zakona kushutana mi bakañola likezahalo zeshutana. Halubala litaba zebañozi  batu babane ba, lukautwisisa hande lika kaufela zanaabulezi ni zanaaezize Jesu, yena Muluti Yomutuna.

Mutelisi naañozi taba yahae kuli ituse Majuda. Mualafi uñola za kufoliswa kwa bakuli ni lihole, kacwalo, usiya litaba zeñwi zañozi kale mutelisi kamba mane uliñola ka mutatamanelo oshutana. Mulikanaa muluti yena ukoñomeka maikuto anani ona muluti ni tulemeno twahae. Wa mwanana yena uñola litaba ka bukuswani hahulu. Nihakulicwalo, litaba zañola mañi ni mañi linepahezi. Taba ye, ibonisa hande kuli halunani libuka kaufela zeene zebulela za bupilo bwa Jesu, lwakona kuutwisisa hande misebezi yahae, lituto zahae, ni tulemeno twahae.

Mwendi batu babulelanga kuli ‘Evangeli ya Mateu’ kamba ‘Evangeli ya Joani.’ Kubulela cwalo hakusika fosahala kakuli libuka ze kaufela linani “taba yende ya Jesu Kreste.” (Mareka 1:1) Nihakulicwalo, kunani feela evangeli, kamba taba yende iliñwi feela yefumaneha mwa libuka zeene zeo.

Baituti babañata ba Linzwi la Mulimu sebanyakisisize ni kubona molilumelelanela litaba zefumaneha kwa Mateu, Mareka, Luka, ni Joani. Ibato ba ka 170 C.E., muñoli wa kwa Syria, yabizwa Tatian ni yena naaezize nto yeswana. Naalemuhile kuli libuka zeene ze, linepahezi ni kuli litile ka susumezo ya Mulimu, mi akopanya litaba zeo hamoho kupanga buka ya Diatessaron, yenani litaba zelumelelana zebulela za bupilo bwa Jesu.

Buka yeli, Jesu ki Yena Nzila, Niti, ni Bupilo ni yona icwalo, kono yona iñozwi ka kunepahala mi inani litaba kaufela. Taba yeo yakonahala bakeñisa kuli cwale seluutwisisa hande buñata bwa liswanisezo ni bupolofita bwa Jesu, zesetalelelizwe. Kutwisiso ye ibonisa hande litaba zanaabulezi Jesu ni zanaaezize hamohocwalo ni mone liezahalezi ka kutatamana. Lika zepumbuzwi lilutusize kuutwisisa hande litaba zeñwi ni kuziba mulelo wa bañoli. Kaniti hakuna yakona kuñañelela muhupulo wahae ka za mone liezahalezi lika kaufela ka kutatamana. Kono buka yeli, Jesu ki Yena Nzila, Niti, ni Bupilo italusa litaba ka kuutwahala.

Hamunze mubala buka ye, mulike kulemuha taba yetuna yekona kutusa mina ni balatiwa bamina. Muhupule kuli Jesu Kreste yena kasibili, naabulelezi muapositola Tomasi kuli: “Ki na nzila ni niti ni bupilo. Hakuna yataha ku Ndate haisi ka na.”—Joani 14:6.

Buka yeli, Jesu ki Yena Nzila, Niti, ni Bupilo ika mitusa kuziba mo Jesu abezi yena “nzila.” Ki yena feela yalukonisa kuatumela Jehova Mulimu ka tapelo. Hape Jesu ki yena nzila yelukonisa kukutela ku Mulimu. (Joani 16:23; Maroma 5:8) Ka mukwa ocwalo, lukona kuba ni silikani sesinde ni Mulimu ka Jesu.

Jesu ki “niti.” Naabulela ni kupila ka kulumelelana ni niti; nekuswana feela inge kuli niti neili ku Jesu kasibili. Naatalelelize bupolofita bobuñata, ili bone butilo ba “‘eni’ ka yena.” (2 Makorinte 1:20; Joani 1:14) Bupolofita bo bulutusa kuziba musebezi wahae wa butokwa hahulu wapeta kuli ataleleze mulelo wa Mulimu.—Sinulo 19:10.

Jesu Kreste hape ki “bupilo.” Ka sitabelo sahae, sanaaezize ka kufa bupilo bwahae bobupetehile ni mali, utahisize kuli lufumane “bupilo sakata,” bona “bupilo bobusa feli.” (1 Timotea 6:12, 19; Maefese 1:7; 1 Joani 1:7) Mi hape ukabonisa kuli ki yena “bupilo” kwa batu babañata-ñata babaka zusiwa kwa bafu ili babanani sepo yakuto pila kuya-kuile mwa Paradaisi.—Joani 5:28, 29.

Kaufelaa luna lutokwa kuitebuha musebezi waeza Jesu otusa kupeta mulelo wa Mulimu. Haike muikole kuituta zeñata ka za Jesu, yena “nzila ni niti ni bupilo.”