Liñolo Lelizwa Kwa Sitopa Sesietelela
Jehova ulubulelela kuli: “Muswanela kuba baluti.” (Maheb. 5:12) Munahane feela taba yeo! Jehova ki Muluti Yomutuna ka kufitisisa mwa pupo kaufela, kono ulumema kuli lulute babañwi ka za hae! Kacwalo, haluluta babañwi niti ka za Jehova, ibe kuli ki mwa lubasi, mwa puteho, kamba mwa bukombwa, luswanela kuikutwa kuli lunani tohonolo yetuna ni kuli lufilwe musebezi wa butokwa hahulu. Lukakona kupeta cwañi musebezi wo?
Lukakona kueza cwalo ka kulatelela manzwi anaabulezi muapositola Paulusi hanaañolezi Timotea kuli: “Uzwelepili kuikataza kubala fapilaa nyangela, kueleza, ni kuluta.” Paulusi naaekelize kubulela kuli: “Ka kueza cwalo ukaipilisa ni kupilisa baba kuutwa.” (1 Tim. 4:13, 16) Mufilwe musebezi wa kutaluseza babañwi lushango lolupilisa. Kacwalo, muikataze kuekeza kwa buikoneli bwamina bwa kubala ni kuluta. Broshuwa ye ilukiselizwe kumitusa kueza cwalo. Munyakisise lika zeñwi zefumaneha mwateñi.
Fa likepe ni likepe, kunani liñolo lelibonisa sikuka sa mwa Bibele sesizamaelela ni tuto yenyakisiswa, kamba liñolo lelibonisa mwakuitusiseza sisupo sesinyakisiswa mwa tuto yeo
Jehova ki “Muluti Yapahami.” (Isa. 30:20) Ki niti kuli broshuwa ye ika mitusa kuekeza kwa buikoneli bwamina bwa kuba mubali ni muluti, kono musike mwalibala kuli Jehova ki yena Muñaa lushango lomuluta babañwi mi ki yena yahoha batu. (Joa. 6:44) Kacwalo, mulapelange ku yena kuli amife moya okenile. Kamita muitusise Linzwi la Mulimu. Mulutelo wamina utahise kuli batu baise hahulu pilu ku Jehova, isiñi ku mina. Muikataze kutusa bateelezi kuli bamulate hahulu kuzwelela kwatasaa lipilu zabona.
Jehova umimemile kuli mulute batu lushango lwa butokwa hahulu. Lunani buikolwiso bwa kuli haiba muitinga fa “maata ao Mulimu afa,” mukakona kupeta musebezi wo.—1 Pit. 4:11.
Ki luna baluti ka mina,
Sitopa Sesietelela sa Lipaki za Jehova
