Nese kufitile lilimo zebato eza 70 kuzwa fone bakutezi Maisilaele babañata kwa Jerusalema, kono babañwi nebasa pila mwa libaka zene busiwa ki Mubuso wa Maperesia. Yomuñwi wa batu bao neli muprisita Ezira, ili yanaalutanga Mulao wa Jehova. Ezira alemuha kuli batu mwa Jerusalema nebasa lateleli Mulao, kacwalo naabata kuya kwateñi kuli ayo batusa. Mulena Aritazerisi wa Maperesia amubulelela kuli: ‘Mulimu ukufile butali ili kuli ukone kuluta batu Mulao wahae. Zamaya, mi uye ni mutu kaufela yabata kuya ni wena.’ Ezira kiha kopana ni batu kaufela bane babata kukutela kwa Jerusalema. Balapela ku Jehova kuli abasileleze mwa musipili omutelele wo, mi bafunduka.

Hamulaho wa likweli zeene, bafita mwa Jerusalema. Manduna kiha bali ku yena: ‘Maisilaele habasika utwa Jehova mi banyezi basali babalapela milimu ya buhata.’ Ki lika mañi zanaaezize Ezira? Fapilaa batu kaufela, Ezira akubama ka mañwele mi alapela ali: ‘Jehova, uluezelize lika zende zeñata, kono lukufoselize ka kueza sibi.’ Batu nebabakile, kono nebasa eza lika zesika luka. Ezira aketa baana-bahulu ni baatuli kuli batalime litaba zeo. Hamulaho wa likweli zetaalu kuzwa fo, batu bane basalapeli Jehova balelekwa.

Kwafita lilimo ze 12. Ka nako yeo, mamota a Jerusalema kihona hane asazo yahiwa sinca. Kacwalo, Ezira akopanya sicaba hamoho fa patelo mi ababalela Mulao wa Mulimu. Ezira hanaa apuzi buka, batu kaufela bayema. Alumbeka Jehova mi bayemisa mazoho abona kulumela kuli bakalatelela Mulao wa Mulimu. Cwale Ezira abala ni kutalusa Mulao, mi batu bateeleza ka tokomelo. Baitumelela kuli nebafoselize Jehova hape mi balila. Habusa, Ezira azwelapili kubabalela Mulao. Balemuha kuli nako ya kueza Mukiti wa Minganda neili fakaufi. Honafo feela, bakala kuitukiseza mukiti wo.

Ka mazazi a 7 a mukiti wo, batu bataba mi baitumela ku Jehova kabakala kutulo yetuna yene babile ni yona. Nekusika ezwa kale Mukiti wa Minganda oswana ni wo kuzwa feela mwa linako za Joshua. Hamulaho wa mukiti,  batu bakopana hamoho mi balapela bali: ‘Jehova ulupilisize mwa butanga, ulubabalezi hande hane luli mwa lihalaupa, mi ulufile naha yende ye. Kono nelukuta-kutezi kusa kuutwa. Neulumile bapolofita kuli balulemuse, kono nelusika utwa. Kusina taba ni zeo kaufela, neuzwezipili kulubonisa pilu-telele. Utalelelize sepiso yahao yene usepisize Abrahama. Cwale lusepisa kuli luka kuutwa.’ Bañola lika kaufela zene basepisize, mi manduna, Malivi, ni baprisita banyatela fateñi.