TUTO 76
Jesu Ukenisa Tempele
Ka nako ya maliha ka silimo sa 30 C.E., Jesu aya kwa Jerusalema. Batu babañata nebatile kwa Paseka. Baeza matabelo a lifolofolo kwa tempele, sina kalulo ya mukiti. Batu babañwi nebatile ni lifolofolo zabona, kono babañwi bona nebalekezi lifolofolo mwa Jerusalema.
Jesu hanaaile kwa tempele, abona batu inze balekisa lifolofolo. Nebasweli kueza pisinisi mwa ndu ya Jehova ya milapelo! Jesu naaezize cwañi? Aeza pafa ya mihala mi alelekela lingu ni likomu kwande a tempele. Afetaula litafule za batu bane bacinca masheleñi mi asululela fafasi masheleñi a muwayawaya. Jesu abulelela batu bane balekisa maiba kuli: ‘Hamuzwise lika ze mo! Musike mwafetula ndu ya Ndate kuba ndu ya lipisinisi.’
Batu bane bali kwa tempele nebakomokisizwe hahulu ki zanaaezize Jesu. Balutiwa bahae kiha bahupula bupolofita bone bubulela ka za Mesia kuli: ‘Nikatukufalelwa hahulu kabakala ndu ya Jehova.’
Hasamulaho, mwa silimo sa 33 C.E., Jesu akenisa tempele lwabubeli hape. Naasike atuhelela mutu ufi kamba ufi kusabonisa likute kwa ndu ya Ndatahe.
“Hamukoni kusebeleza Mulimu ni Bufumu.”—Luka 16:13
Hape Mwendi Mwakona Kutabela Litaba Ze
JESU KI YENA NZILA, NITI, NI BUPILO
Jesu Utukufalelwa Bulapeli Bwa Niti
Mulao wa Mulimu neulumeleza batu kuleka lifolofolo za kuitusisa kwa matabelo mwa Jerusalema, ki kabakalañi Jesu hanaahalifezi bane balekiseza mwa tempele?
MUBE MULIKANAA JEHOVA
Mukuteke Ndu ya Jehova
Mukona kubonisa cwañi likute leliswanela kwa ndu ya Jehova ya kulapelela?
