Jesu ni baapositola bahae bafita mwa Musindi wa Kidroni kuliba kwa Lilundu la Likota za Olive. Neli fahalaa busihu, mi kweli neibenya. Hane bafitile kwa simu ya Getsemani, Jesu ali ku bona: “Hamuine fa mi muzwelepili kutona ni na.” Cwale Jesu aya fapilinyana mwa simu mi akubama ka mañwele. Alapela ku Jehova, inze aziyelehile hahulu, ali: “Haike tato yahao iezwe.” Cwale Jehova aluma lingeloi kuto susueza Jesu. Jesu hanaakutezi kone bainzi baapositola, afumana kuli kaufelaa bona babalaalu balobezi. Kihaa li: ‘Hamuzuhe! Ye haki nako ya kulobala! Nako ifitile ya kuli nifiwe mwa mazoho a lila zaka.’

Honafo feela, Judasi ataha inze azamaya ni batu babañata babashimbile mikwale ni milamu. Naaziba kwanaaka fumana Jesu kakuli nebayanga hamoho kamita kwa simu yeo. Judasi naataluselize masole kuli naaka basupeza Jesu. Aliba feela ku Jesu, mi ali: ‘Lumela, Muluti,’ mi amutubeta. Jesu kihaa li: ‘Judasi, unibeteka ka kunitubeta?’

Jesu asutelela mi ali ku bona: “Mubata mañi?” Baalaba kuli: “Jesu wa Munazareta.” Kihaa li ku bona: “Ki na,” mi baana bao bakuta mwamulaho ni kuwela fafasi. Jesu ababuza hape, ali: “Mubata mañi?” Hape baalaba kuli: “Jesu wa Munazareta.” Jesu aalaba kuli: ‘Nimibulelezi kuli ki na. Mutuhele batu ba baikele.’

Pitrosi hanaalemuhile zeneezahala, acomola mukwale ni kupuma zebe ya Malko, mutangaa muprisita yapahami. Kono Jesu aswala zebe ya muuna yo ni kumufolisa. Cwale Jesu ali ku Pitrosi: ‘Kutisa mukwale wahao. Haiba ulwana ka mukwale, ukabulaiwa ka mukwale.’ Masole baswala Jesu ni  kumutama kwa mazoho, mi baapositola babaleha. Cwale ñumbili yamuisa ku Annasi, muprisita yomuhulu. Annasi abuza Jesu lipuzo mi amuisa kwa ndu ya Muprisita Yapahami, yena Kayafa. Kono ki lika mañi zeneezahalile kwa baapositola?