Jesu hanaali ni baapositola bahae mwa muzuzu wa kwahalimu, naababulelezi kuli: ‘Kaufelaa mina muka niyubeka busihu bo.’ Pitrosi kihaa li: ‘Konji na! Batu babañwi kaufela ni habaka kuyubeka, na hanina kukuyubeka.’ Kono Jesu ali ku Pitrosi: ‘Mukombwe usika lila kale, ukabulela halaalu kuli hau nizibi.’

Masole hane baisize Jesu kwa ndu ya Kayafa, buñata bwa baapositola bahae babaleha. Kono bababeli kwa baapositola bao bamulatelela inze bali mwa nyangela. Yomuñwi wa ku bona neli Pitrosi. Aya mwa lapa la ndu ya Kayafa mi ayo ola mulilo kuli afutumalelwe. Kabakala liseli, mutanga wamusizana abona Pitrosi mi ali: ‘Nakuziba! Neubanga ni Jesu!’

Pitrosi ali: ‘Batili, nenisa bangi ni yena! Hanizibi zeubulela!’ Aya kwa munyako wa lapa. Kono honafo feela, mutanga wamusizana yomuñwi amubona mi abulelela batu kuli: ‘Muuna yo naabanga ni Jesu!’ Pitrosi kihaa li: ‘Jesu hani muzibi!’ Muuna yomuñwi ali: ‘U yomuñwi wa ku bona! Mubulelelo wahao utwahala kuli uzwa mwa Galilea, sina Jesu.’ Kono Pitrosi akonka, ali: ‘Hani muzibi!’

Honafo feela, mukombwe walila. Pitrosi abona Jesu haitemuna ni kumutalima. Ahupula manzwi a Jesu mi azwela fande ni kuyo lila hahulu.

Ka nako yeo, kuta ya Sanhedrini yazekisa Jesu mwa ndu ya Kayafa. Nebaatuzi kale kuli nebaka bulaya Jesu, nebabata feela mulatu wa kumutama. Kono nebasika fumana mulatu ku yena. Kwa mafelelezo, Kayafa abuza Jesu ka kunonga kuli: ‘Kana u Mwanaa Mulimu?’ Jesu ali: ‘Ni Mwanaa Mulimu.’ Kayafa kihaa li: ‘Halusa tokwa hape bupaki. Mutu yo wanyefula!’ Kuta yalumelelana kuli: ‘Muuna yo ulukela kushwa.’ Bamubakula mabaka, bamukwela mati, kumukwahela lisila kwa meeto,  ni kumunata inze babulela kuli: ‘Haiba u mupolofita lutaluseze yakunatile!’

Lizazi hane lipazuzi, baisa Jesu mwa muyaho wa Sanhedrini mi bamubuza hape kuli: ‘Kana u Mwanaa Mulimu?’ Jesu aalaba kuli: ‘Mina kasibili ki mina bababulezi cwalo.’ Hase bamufumani ni mulatu wa kunyefula, bamuunga ni kumuisa kwa ndu ya Ponse Pilato, mubusisi wa Muroma. Ki lika mañi zeneezahalile hasamulaho? Halunyakisiseñi ka za teñi.