Mushe naasepisize Faro kuli naasike akutela ku yena hape. Kono asika funduka kale, abulelela Faro kuli: ‘Fahalaa busihu, mweli kaufela mwa naha ya Egepita, kukala ka mweli wa Faro kuisa ku mweli wa mutanga, ukashwa.’

Jehova abulelela Maisilaele kuli babe ni sico sesiipitezi. Ali: ‘Mubulaye ngu ya mwaha ulimuñwi kamba puli, mi muunge kwa mali ayona mi mubeye fa minyako yamina. Mubese nama, mi muice ni sinkwa sesisika ya mumela. Mutine ni makatulo amina, muitukiseze kufunduka. Bona busihu bo, nika milukulula.’ Munahane feela tabo yene babile ni yona Maisilaele!

Fahalaa busihu, lingeloi la Jehova laya fa mandu kaufela mwa Egepita. Labulaya baeli kaufela fa mandu anaasika sasiwa mali fa minyako. Kono lingeloi nelifitelelanga fa mandu kaufela asasizwe mali fa minyako. Maegepita kaufela mwa naha, bafumi kamba babotana nebashwezwi ki mwanaa bona. Kono nekusina nihaiba alimuñwi yanaashwile kwa Maisilaele.

Nihaiba mwanaa Faro wamushimani naashwile. Faro naasakoni kuzwelapili kutiyela muinelo wo. Honafo Faro abiza Mushe ni Aruni, mi ali: ‘Hamunanuhe.  Muzwe mwa naha mo. Hamuye muyo sebeleza Mulimu wamina. Mushimbe limunanu zamina mi muye!’

Maisilaele bazwa mwa Egepita ka lubasi ni ka lusika kweli inze imonyeha hande. Neli Maisilaele ba baana ba 600,000 hamoho cwalo ni basali ni banana babañata. Hape, batu babañwi bane basi Maisilaele ni bona baya kuli bayo lapela Jehova. Maisilaele balukululwa hamulaho wa nako yetelele!

Kuli bahupule mo Jehova naabapiliselize, nebakaezanga mukiti wa sico sesiipitezi silimo ni silimo. Mukiti wo neubizwa Paseka.