Buñata bwa Maisilaele nese bakalile hape kusebeleza milimu ya maswaniso, kacwalo Jehova alumeleza Mafilisita kubazamaisa. Kono nekunani Maisilaele babañwi bane balata Jehova. Yomuñwi wa batu bao neli Manoa. Yena ni musalaa hae nebasina bana. Zazi leliñwi, Jehova aluma lingeloi ku musalaa Manoa. Lingeloi lali ku yena: ‘Ukapepa mwana wamushimani. Mwana yo ukalamulela Maisilaele kwa Mafilisita. Mi ukaba Munazareni.’ Kana mwaziba kuli Manazareni neli batu babacwañi? Neli batu bane balatiwa hahulu ki Jehova. Manazareni nebasa lumelezwi kukuta milili.

Hamulaho wa nako, Manoa apepa mwana wamushimani mi amubeya libizo la Samisoni. Samisoni hanaahulile, Jehova amutusa kuba ni maata amatuna. Naakona kubulaya tau ka mazoho ahae. Ka nako yeñwi, Samisoni naabulaile Mafilisita ba 30 anosi. Mafilisita neba mutoile mi nebazwezipili kubata linzila za kumubulaya. Zazi leliñwi busihu Samisoni inze alobezi mwa Gaza, batu ba mwa Gaza baya kwa munyako wa muleneñi ni kumulibelela ilikuli habusa kakusasana bamubulaye. Kono fahalaa busihu, Samisoni azuha mi aya kwa sikwalo sa muleneñi mi asikumula kwa limota. Akuleka sikwalo fa maheta ahae mi asiisa fahalimwaa lilundu bukaufi ni Hebroni!

Hasamulaho, Mafilisita baya ku nyazi wa Samisoni, ili Delila, mi bali ku yena: ‘Luka kulifa silivera yeñata hahulu haiba uziba libaka Samisoni atiile hahulu cwalo. Lubata kumuswala kuli lumubeye mwa tolongo.’ Delila naabata masheleñi ao, kacwalo alumela. Kwa makalelo, Samisoni naahanile kutaluseza Delila libaka hanaatiile hahulu cwalo. Kono azwelapili kumukataza kufitela azwafa kuli mane apatulula kunutu yahae. Samisoni ataluseza Delila kuli, ‘milili yaka aisika kutiwa kale fateñi kakuli ni Munazareni. ‘Haiba nikutiwa milili, maata aka akafela.’ Kaniti luli, Samisoni naaezize mafosisa kutaluseza Delila taba yeo!

 Delila kapili-pili abulelela Mafilisita kuli: ‘Naziba zemutusanga kuba ni maata!’ Alobaza Samisoni fa mahutu ahae, mi abiza mutu yomuñwi kukuta milili yahae. Hasamulaho, Delila ahuwa kuli: ‘Samisoni, Mafilisita ki bao!’ Samisoni azuha, mi maata ahae naafelile. Mafilisita bamuswala, bamupunya meeto, mi bamubeya mwa tolongo.

Zazi leliñwi, Mafilisita babañata-ñata nebakopani hamoho mwa tempele ya mulimu wabona Dagoni, inze bahuwa kuli: ‘Mulimu waluna ulufile Samisoni! Hamutise Samisoni! Luto itabisa ni yena.’ Bamuyemisa mwahalaa misumo yemibeli mi bamusheununa. Samisoni aitilelela ku Jehova, ali: ‘Nakukupa Jehova, nife maata hape.’ Ka nako ye, milili ya Samisoni neihulile hape. Akasha misumo ya tempele ka maata ahae kaufela. Muyaho kaufela wawa, mi wabulaya batu kaufela bane bali mwa tempele mi Samisoni ni yena ashwa.