Mwa muleneñi wa Masiria mwa Ninive, nekupila batu babamaswe. Jehova naabulelezi mupolofita wahae Jonasi kuya kwa Ninive ni kuyo balemusa kuli bacince mupilelo wabona. Kono Jonasi asabela kwa sibaka sisili. Akena mwa sisepe sene siya kwa Tareshishi mi bafuluha.

Hane banze bazwelapili mwa musili wabona, kwataha liñungwa lelituna, mi bafuluhi ba sisepe basaba hahulu. Balapela kwa milimu yabona mi babuza kuli: ‘Ki kabakalañi nto ye haiezahala?’ Kwa mafelelezo, Jonasi abataluseza kuli: ‘Ki mulatu waka. Nisaba kueza zanibulelezi Jehova. Muninepele mwa liwate, mi liñungwa likafela.’ Bafuluhi nebasa lati kumunepela mwa liwate, kono yena atundamena. Hane bamunepezi mwa liwate, liñungwa lafela.

Jonasi naanahana kuli naakashwa. Hanaanze atiba kuya fafasi, alapela ku Jehova. Jehova aluma tapi yetuna. Tapi yeo yamiza Jonasi, kono neisika mubulaya. Hanaali mwa mba ya tapi, alapela ali: ‘Nisepisa kusepahala ku wena nako kaufela.’ Jehova naasilelelize Jonasi mwa mba ya tapi ka mazazi amalaalu mi kihona atahisa kuli tapi ikwele Jonasi fa likamba.

Bakeñisa kuli Jehova naasilelelize Jonasi, kana taba yeo ibonisa kuli Jonasi naasatokwi kuya kwa Ninive hape? Batili. Jehova hape abulelela Jonasi kuya kwa Ninive. Ka nako ye, Jonasi naalumezi kuya.  Naaile kwateñi mi ayo lemusa batu babamaswe bane bapila kwateñi kuli: ‘Kusiyezi feela mazazi a 40, mi Ninive ukasinyiwa.’ Nto yeñwi yenesika libelelwa yaezahala—batu ba kwa Ninive nebateelelize ku Jonasi mi nebacincize mupilelo wabona omaswe. Mulena wa kwa Ninive kihaa li kwa batu bahae: ‘Muitilelele ku Mulimu mi mubake. Mwendi hanaa kuluyundisa.’ Jehova naasika yundisa muleneñi wa Ninive, hanaaboni kuli batu babakile.

Jonasi naanyemile hahulu muleneñi hane usika yundiswa. Hamunahane ka za taba ye: Jehova naabonisize Jonasi pilu telele ni makeke, kono Jonasi yena naasika shwela makeke batu ba mwa Ninive. Kono, ayoina kwande a muleneñi mwa muluti wa libonobono inze anyemile. Hasamulaho, libonobono laoma mi Jonasi ahalifa. Kacwalo, Jehova amubulelela kuli: ‘Uisa hahulu pilu libonobono kufita batu ba mwa Ninive. Nibashwezi makeke mi bapunyuhile.’ Sisupo neli sifi? Batu ba mwa Ninive neli ba butokwa hahulu kufita simela sifi kamba sifi.