Buka ya Mañolo Atusa Bakreste Mwa Bupilo ika mitusa kufumana litimana za mwa Bibele ka bunolo hamohocwalo ni litaba zeñwi zeka mitusa kutiyela miinelo yetaata yemutalimana ni yona. Hape ika mitusa kufumana litaba za mwa Bibele zeswanela zemukona kuitusisa hamubata kususueza babañwi ni kubatusa kueza likatulo zekatabisa Jehova. Mukatokwa feela kuketa taba yemubata. Mwa taba ni taba, kunani lipuzo ni litaba zetalusa ka bukuswani litaba za mwa Bibele zetusa. (Mubone mbokisi yeli, “ Mwakuitusiseza Buka Ye.”) Buka ye ika mitusa kufumana likelezo za butokwa zetusa, liketelelo ni litaba zeomba-omba zefumaneha mwa Linzwi la Mulimu. Hape mukafumana litaba za butokwa zemukona kutaluseza babañwi—ili mañolo a mwa Bibele aka baomba-omba, kubatusa kutatulula miinelo yetaata yebatalimana ni yona, kubatusa kufumana likelezo zebatokwa ni kubasusueza.

Mwa hatiso ye hakusika fiwa mukoloko wa mañolo kaufela abulela za taba yeñwi ni yeñwi. Kono ilukiselizwe kulutusa kuziba fa kukalela kueza lipatisiso. (Liprov. 2:​1-6) Kuli muitute zeñata, muitusise mukoloko wa mañolo alibisa kwa mañolo amañwi, ili akolohanyizwe fahalaa likepe ni likepe la Bibele ya Toloko ya Lifasi Lelinca kamba mane litaba za kuituta zefumaneha mwa Bibele ya Sikuwa. Muitusise Buka ya Lipatisiso ya Lipaki za Jehova kamba hatiso ya Watch Tower Publications Index kuli muzibe hande zatalusa mañolo ni momukona kuitusiseza ona mwa bupilo bwamina. Mubatisise litaba zesazo hatiswa cwanoñu fa kuli muzibe haiba mwazamaelela ni kutwisiso yenca ya niti ya mwa Mañolo.

Haike buka ye ya Mañolo Atusa Bakreste Mwa Bupilo imituse kufumana butali, zibo, ni kutwisiso ye mwa Mañolo Akenile. Hamunze muitusisa buka ye, mukafita fa kuba ni buikolwiso bwa kuli “linzwi la Mulimu lapila mi linani maata.”—Maheb. 4:12.