TUTO 20
Moietelelwa Puteho ya Sikreste
Jehova Mulimu uezanga lika ka swanelo. (1 Makorinte 14:33) Taba yeo ilutusa kuutwisisa libaka batu bahae ni bona habaezanga lika ka swanelo. Puteho ya Sikreste ietelelwa cwañi? Lukona kuezañi kuli lika lizamaye hande mwa puteho?
1. Ki mañi yaetelela puteho ya Sikreste?
‘Kreste ki yena toho ya puteho.’ (Maefese 5:23) Jesu uetelela misebezi ya batu ba Jehova mwa lifasi kaufela kuzwelela kwa lihalimu. Jesu uketile “mutanga yasepahala yanani kutwisiso,” ili sikwatanyana sa baana-bahulu babanani silikani sesinde ni Mulimu ili bababizwa hape kuli Sitopa Sesietelela. (Mubale Mateu 24:45-47.) Sina mone baezezanga baapositola ni baana-bahulu ba mwa Jerusalema mwa linako za baapositola, baba mwa Sitopa Sesietelela ni bona kacenu bafanga ketelelo mwa puteho ya Sikreste. (Likezo 15:2) Nihakulicwalo, mizwale bao haki bona babaetelela kopano yaluna. Bakupanga tuso ku Jehova ni kuitusisa Linzwi lahae kuli libaetelele, mi balatelela litaelo zafile Jesu.
2. Ki musebezi mañi obaeza baana-bahulu mwa puteho?
Baana-bahulu ki baana babanani silikani sesitiile ni Mulimu ili babalutanga litaba za mwa Mañolo ni kususueza batu ba Jehova kuba ni silikani sesinde ni yena. Habaholiswangi masheleñi kabakala musebezi obaeza. Kono baeza musebezi wo “ka kuitatela fapilaa Mulimu; isiñi ka lilato la kuipumanela lika ka kusasepahala, kono ka kutukufalelwa.” (1 Pitrosi 5:1, 2) Baana-bahulu batusiwanga ki likombwa za puteho, ili bao hamulaho wa nako bakwanisanga zetokwahala kuli basebeze sina baana-bahulu.
Mizwale baba mwa Sitopa Sesietelela baketanga baana-bahulu babañwi kuli basebeze sina baokameli ba mupotoloho. Baokameli ba mupotoloho, bapotelanga mizwale ni likaizeli mwa liputeho ka mulelo wa kubafa ketelelo ni kubasusueza. Hape baketanga mizwale babakwanisize zetokwahala za mwa Mañolo kuli basebeze sina likombwa za puteho ni baana-bahulu.—1 Timotea 3:1-10, 12; Tite 1:5-9.
3. Ki musebezi mañi waswanela kueza Paki ya Jehova kaufela?
Baba mwa puteho kaufela bakona ‘kulumbeka libizo la Jehova’ ka kualaba, kuopela, kufa lingambolo kwa mikopano ya puteho, mane ni kukutaza taba yende ku babañwi.—Mubale Samu 148:12, 13.
MUBATISISE
Mubatisise kuli Jesu ki mueteleli yacwañi ni mo baana-bahulu balikela ka taata kumulikanyisa, mi mubone molukona kuswalisanela ni yena ni baana-bahulu.
4. Jesu ki mueteleli yomunde
Jesu ulukupa kueza nto yeñwi. Mubale Mateu 11:28-30, mi kihona mukanyakisisa puzo yelatelela:
-
Jesu ubata kuli luikutwe cwañi hanze aluetelela?
Baana-bahulu balikanyisa cwañi Jesu? Mubuhe VIDIO.
Bibele italusa hande mobaswanela kuezeza musebezi wabona baana-bahulu.
Mubale Isaya 32:2 ni 1 Pitrosi 5:1-3, mi kihona mukanyakisisa lipuzo zelatelela:
-
Muikutwa cwañi kuziba kuli baana-bahulu balika mobakonela kaufela kususueza babañwi sina Jesu?
-
Ki mwa linzila mañi zeñwi mo baana-bahulu balikanyisa Jesu?
5. Baana-bahulu balatelelanga zebalutanga
Jesu ubata kuli baana-bahulu baange cwañi musebezi wabona? Mubuhe VIDIO.
Jesu naatomile mutala omunde ili obaswanela kulikanyisa baana-bahulu. Mubale Mateu 23:8-12, mi kihona mukanyakisisa puzo yelatelela:
-
Ka kuya ka momulemuhezi, zebaeza baeteleli ba bulapeli lishutana cwañi ni zeitalusa Bibele ka za mobaswanela kuezeza lika baana-bahulu?
-
Baana-bahulu babonanga teñi kuli bona ni lubasi lwabona banani silikani sesitiile ni Jehova
-
Baana-bahulu batusanga batu kaufela mwa puteho
-
Baana-bahulu bakutazanga nako kaufela
-
Baana-bahulu ki baluti babande. Hape baezanga misebezi ya kukenisa ni yemiñwi cwalo
6. Luswanela kusebelisana hande ni baana-bahulu
Bibele ilutaluseza libaka halutokwa kusebelisana hande ni baana-bahulu. Mubale Maheberu 13:17, mi kihona mukanyakisisa lipuzo zelatelela:
-
Ki kabakalañi Bibele hai lutaluseza kuli luutwe babaetelela? Muikutwa cwañi ka za taba yeo?
Mubale Luka 16:10, mi kihona mukanyakisisa puzo yelatelela:
-
Ki kabakalañi haluswanela kuutwa baana-bahulu nihaiba mwa lika zebonahala kuba zenyinyani?
BABAÑWI BABULELANGA KULI: “Mutu hatokwi kuba mwa kopano ya bulapeli.”
-
Mubona kuli ki tuso mañi yakona kufumana mutu haiba alapela Mulimu ni babañwi mwa puteho?
LITABA KA BUKUSWANI
Jesu ki yena yaetelela puteho ya Sikreste. Lusebelisana ni baana bahulu babaetelelwa ki Jesu bakeñisa kuli balususueza ni kululuta ka mupilelo wabona omunde.
Mulundulule
-
Ki mañi yaetelela puteho?
-
Baana-bahulu batusa cwañi mizwale ni likaizeli mwa puteho?
-
Ki musebezi mañi waeza yomuñwi ni yomuñwi wa balapeli ba Jehova?
MUBONE LITABA ZEÑWI
Munyakisise bupaki bobubonisa kuli mizwale baba mwa Sitopa Sesietelela ni baana-bahulu baisa hahulu pilu kwa Bakreste kacenu.
Mubone musebezi obaeza baokameli ba mupotoloho.
Bupilo Bwa Muokameli wa Mupotoloho Mwa Libaka za Matakanyani (4:51)
Mubale ka za musebezi wa butokwa obaeza basali mwa puteho ya Sikreste.
Mubatisise mobasebeleza baana-bahulu ka taata kuli basusueze balumeli babañwi.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
