TUTO 22
Lukona Kutaluseza Cwañi Babañwi Taba Yende?
Hamunze muituta niti ya mwa Bibele, mukana mwali, ‘Babañwi ni bona baswanela kuutwa taba yende!’ Taba yeo ki ya niti! Nihakulicwalo, mwendi mwakona kuba ni sabo hamunahana za kutaluseza babañwi litaba zemuituta. Halunyakisiseñi zekona kumitusa kufelisa sabo yeo ilikuli mukale kutaluseza babañwi taba yende ya mwa Bibele.
1. Mukona kukutaza cwañi kwa batu bomuziba?
Balutiwa ba Jesu nebabulezi kuli: “Kono haili luna, halukoni kutuhela kubulela lika zeluboni ni zeluutwile.” (Likezo 4:20) Bakeñisa kuli nebaanga litaba zene baitutile kuba za butokwa hahulu, nebabata kulitaluseza batu babañata. Kana kona momuikutwela ni mina cwalo? Haiba ki cwalo, mueze momukonela kaufela kutaluseza ba lubasi lwamina ni balikani bamina litaba zemuitutile.—Mubale Makolose 4:6.
Zemukona kueza
-
Hamuli ni lubasi lwamina, mwakona kuambola ni bona litaba za mwa Bibele ka kubulela kuli, “Kunani taba yenitabezi hahulu yeniitutile sunda ye.”
-
Haiba mulikanaa mina wakula kamba ubilaezwa ki nto yeñwi, mwakona kubala ni yena liñolo leliñwi.
-
Hamuli kwa musebezi, mwakona kutaluseza bomusebeza ni bona zemuitutile mwa Bibele kamba kwa mukopano omuñwi wa puteho.
-
Mubonise balikani bamina webusaiti ya jw.org
-
Mukupe babañwi kuli babe ni mina kwa tuto yamina ya Bibele, kamba mubabonise mobakona kukupela tuto ya Bibele fa webusaiti ya jw.org.
2. Ki kabakalañi hamuswanela kukutaza hamoho ni puteho?
Kwandaa kukutaza feela taba yende kwa batu bane baziba, kunani lika zeñwi zene baezanga balutiwa ba Jesu. Jesu ‘naabalumile bababeli ka bababeli kuli baitangete mwa mileneñi’ kuyo kutaza. (Luka 10:1) Kueza cwalo nekutahisize kuli batu babañata bautwe taba yende. Kukutaza hamoho nekutusize balutiwa kuba ni tabo. (Luka 10:17) Kana mwakona kueza licinceho kuli mukalise kukutaza hamoho ni puteho?
MUBATISISE
Munyakisise lika zekona kumitusa kufelisa sabo ya kukutaza ni kumitusa kuba ni tabo kabakala kukutaza taba yende ku babañwi.
3. Jehova uka mitusa
Batu babañwi bababatanga kukutaza, baikalelwanga mobakona kubaangela batu ni zebakona kueza batu bao.
-
Kana mwasabanga kubulelela babañwi zemuituta? Libaka?
Mubuhe VIDIO, mi kihona mukanyakisisa puzo yelatelela.
-
Ki lika mañi zenetusize Lipaki babanca bao kufelisa sabo yabona?
Mubale Isaya 41:10, mi kihona mukanyakisisa puzo yelatelela:
-
Tapelo ikona kumitusa cwañi haiba mwasabanga kukutaza?
Kana mwaziba?
Lipaki za Jehova babañata kwa makalelo nebaikutwanga kuli habakoni kukutaza taba yende ku babañwi. Ka mutala, bo Sergey, nebaikutwanga kuli haki ba butokwa mi nekubabelanga taata kuambola ni babañwi. Kono bakalisa kuituta Bibele. Bo Sergey bali: “Nenikalile kubulelelanga babañwi zene niituta kusina taba ni sabo yene ninani yona. Nenikomokile hahulu kuli kueza cwalo neku nitusize kufelisa sabo yene nibanga ni yona. Hape kutaluseza babañwi zene niitutile nekutiisize tumelo yaka.”
4. Mubonise likute
Hamukutaza taba yende, muswanela kunahanisisa zemuka bulela ni momuka libulelela. Mubale 2 Timotea 2:24 ni 1 Pitrosi 3:15, mi kihona mukanyakisisa lipuzo zelatelela:
-
Mukona kusebelisa cwañi litimana zeo hamuambola ni babañwi za mwa Bibele?
-
Ba lubasi lwamina ni balikani mwendi habana kulumelelananga ni mina mwa lika zeñwi. Muswanela kuezañi? Mi ki lika mañi zemusa swaneli kueza?
-
Ki kabakalañi haluswanela kubuza batu lipuzo ka maseme kufita kubahapeleza feela kulumela zelu baluta?
5. Kukutaza taba yende kutahisa tabo
Jehova naafile Jesu musebezi wa kukutaza taba yende. Jesu naanga cwañi musebezi wo? Mubale Joani 4:34, mi kihona mukanyakisisa lipuzo zelatelela:
-
Kuca lico zende kulutusa kupila mi hape kulutahiseza tabo. Ki kabakalañi Jesu hanaabulezi kuli kueza tato ya Mulimu, inge cwalo kukutaza taba yende, kuswana ni kuca lico?
-
Ki limbuyoti mañi zelukona kufumana halutaluseza babañwi taba yende?
Zekona kumitusa
-
Hamuli kwa mukopano wa mwahalaa sunda, muitute momukona kukutaleza ku mutu yomuñwi.
-
Mubulelele bomuitutanga ni bona kuli mubata kukalisa kufanga lingambolo kwa mikopano ya mwahalaa sunda. Kufa lingambolo zecwalo kwakona kumitusa kutaluseza babañwi litaba zemuituta.
-
Muitusise litaba ze mwa buka ye zeli, “Babañwi Babulelanga Kuli” kamba “Mutu Yomuñwi Ukona Kumibuza Kuli” ilikuli muitute momukona kualabela mutu yamibuza lipuzo.
MUTU YOMUÑWI UKONA KUMIBUZA KULI: “Lika limizamaela cwañi?”
-
Mukona kuezañi kuli mutaluseze mutu yo zemuitutile ka nako ya tuto yamina ya Bibele?
LITABA KA BUKUSWANI
Kutaluseza babañwi taba yende kutahisa tabo, mi kueza cwalo haki nto yetaata.
Mulundulule
-
Ki kabakalañi hamuswanela kutaluseza babañwi taba yende?
-
Mukona kueza cwañi cwalo ka likute?
-
Ki lika mañi zekona kumitusa kufelisa sabo ya kukutaza?
MUBONE LITABA ZEÑWI
Munyakisise linzila zeene zekona kumitusa kutaluseza babañwi taba yende ka kuitusisa kadi yezibahaza webusaiti yaluna ya jw.org.
Muitute tulemeno totune totukona kumitusa kukutaza taba yende.
“Kana Muitukiselize Kuba Muyambi wa Batu?” (Tawala ya Mulibeleli, September 2020)
Mubone mo kunyakisisa mutala wa mwa Bibele kukona kulutuseza kuba ni bundume bwa kukutaza taba yende niha luli babanca.
Munyakisise zekona kumitusa kutaluseza ba lubasi lwamina litaba za mwa Bibele ili babasa zibi ka za Jehova.
“Kufita Kwa Lipilu za Bahabo Luna Babasi Balumeli” (Tawala ya Mulibeleli, March 15, 2014)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
