Bupilo Hamulaho wa Lifu Bwa Konahala!

MWA filimu ye ñwi ye ne ezizwe kwamulaho, ne ku bonisizwe mushimani ya na yemi kwatuko a libita la mutu ya na lata. Mushimani yo na ize: “Boma kamita ne ba ni bulelelanga kuli mutu kaufela u ka shwa.” Ku tuha fo, kamera ha ne inze i talimiselizwe kwa libita, a ekeza kuli: “Ne ni ka tabela kuli kambe ne ku si cwalo.”

Mubulelelo wo u bonisa mo ba ikutwela batu ba bañata ba ba shwezwi ki batu bo ba lata. Lifu ki sila se si maswe luli! Niteñi, Mulimu u sepisa kuli: “Sila sa maungulelo s’a ka felisa ki lifu.” (1 Makorinte 15:26) Kono cwale kiñi ha lu shwa, hailifo lu bupilwe ka nzila ye bonisa kuli lwa kona ku pila ku ya ku ile? Lifu li ka feliswa cwañi?

 Libaka Ha Lu Supala ni Ku Shwa

Ka za Jehova Mulimu yena Mubupi wa luna, Bibele i li: “Musebezi wa hae u [petehile, NW].” (Deuteronoma 32:4; Samu 83:18) Mutu wa pili yena Adama, na bupilwe ka ku petahala, mi ne ku konahala kuli a pile ku ya ku ile mwa simu ya Edeni ye ne li Paradaisi fa lifasi, ili mwa na beilwe ki Mulimu. (Genese 2:7-9) Ki kabakalañi Adama ha na zwile mwa simu ye ne li Paradaisi mi ki kabakalañi ha na supezi ni ku shwa?

Libaka ka bukuswani kikuli: Adama na palezwi ku mamela taelo ya na filwe ya kuli a si ke a ca kwa muselo wa kota ye ñwi. Mulimu na lemusize Adama ze ne ka ezahala ha na ka loba taelo yeo, na ize: ‘U ka shwa luli.’ (Genese 2:16, 17) Adama na swalisani ni musal’a hae Eva mwa ku loba taelo yeo, kacwalo Mulimu a ba lundula mwa simu. Libaka la na ba lelekezi Mulimu kapili-pili la zibahala. Bibele i li: “[Adama] a ka swana a isa lizoho la hae, a koyola kwa kota [ya mwa simu] ya bupilo, a ca mi a pila kamita.”—Genese 3:1-6, 22.

Adama ni Eva ne ba shwile kabakala ku sa utwa, kono ki kabakalañi batu kaufela ba ba simuluha ku bona ha ba supala ni ku shwa? Ki kabakala kuli ne ba hozize sibi ku Adama, mi sibi si tahisize kuli bana ba hae kaufela ba si ke ba petahala ni kuli ba shwe. Bibele i talusa kuli: “Sibi sina ha si keni mwa lifasi ka mutu a li muñwi [Adama], mi ka sibi ku keni lifu, kamukwaocwalo lifu li tile kwa batu kaufela kakuli ba ezize sibi kaufela.”—Maroma 5:12.

Kwa Konahala Ku Pila Hape

Sina mo se lu balezi, ‘lifu li ka feliswa’—ku fela luli ku ya ku ile! (1 Makorinte 15:26) Kono li ka feliswa cwañi? Bibele i talusa kuli: “Ku luka kwa mutu a li muñwi, ku tahiseza batu kaufela ku luka ko ku fa bupilo.” (Maroma 5:18) Ki nto mañi ye konisa batu kuli ba be ba ba lukile fapil’a Mulimu ni kuli ba ikole bupilo bo bu sa feli?

Ki tukiso ya na ezize Mulimu ya ku felisa sibi se ba hozize batu kaufela ku mutu wa pili, yena Adama. Bibele i talusa kuli: “Mpo ya sishemo sa Mulimu ki bupilo bo bu sa feli ka Jesu Kreste Mulen’a luna.” (Maroma 6:23) Jesu na bulezi cwana ka za tukiso yeo ye tahisa kuli batu ba be ba ba lukile ili ba ba swanela bupilo, na ize: ‘Mulimu u latile lifasi [batu] hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.’—Joani 3:16.

Ha mu nahane lilato-tuna la na ni Mulimu ku luna, ni la Mwan’a hae Jesu Kreste, ya na nyandile hahulu bakeñisa luna. Muapositola Paulusi na ñozi kuli: “Mwan’a Mulimu . . . [u] ni latile, mi a itobohile mwa sibaka sa ka.” (Magalata 2:20) Kono ki kabakalañi Jesu haili yena fela mutu ya na kona ku lu “fa bupilo bwa hae, kuli a [lu] liulule” ni ku lu pilisa kwa likozi za sibi?—Mateu 20:28.

Ki Jesu fela ya na kona ku lu fa bupilo bwa hae sina tiululo bakeñisa kuli ki yena fela mutu ya na si ka hoza sibi sa mutu wa pili, yena Adama. Ki kabakalañi ha na si ka hoza sibi? Ki kabakala kuli bupilo bwa Jesu ne bu shimbululezwi mwa mba ya mwalyanjo Maria ka makazo, ku zwelela kwa lihalimu. Kacwalo, sina lingeloi mo ne li taluselize Maria, mwan’a hae ne li ‘Mwan’a Mulimu ya Kenile.’ (Luka 1:34, 35) Kona libaka Jesu ha bizwa “Adama wa mafelelezo” ni libaka ha na si ka hoza sibi sa “mutu wa pili, Adama.” (1 Makorinte 15:45) Bakeñisa kuli ne li mutu ya si na sibi, Jesu na kona ku ifana sina ‘tifo ye liulula’—bupilo bwa hae ne bu swana ni bupilo bwa Adama pili a si ka eza kale sibi.—1 Timotea 2:6.

Ka mpo ya tiululo yeo, Mulimu na lu konisize ku fumana za na latehezwi ki zona Adama wa pili, ili bona bupilo bo bu sa feli fa lifasi le li li paradaisi. Kono buñata bwa batu kuli ba fumane mbuyoti ye, ba ka tokwa ku zusiwa. Yeo ki sepo ye tabisa luli!  Kono kana mu fumana hahulu t’ata ku lumela kuli mutu ya shwile wa kona ku pila hape?

Libaka Ha Lu Lumela

Kana ku t’ata hahulu ku lumela kuli Jehova Mulimu, ya tahisize bupilo, u na ni m’ata a ku bupa sinca mutu ya kile a pila? Ha mu nyakisise m’ata a konahalisa ku itwala—kamba ku ba fa mezi a manca—ili a na file Mulimu ku musali wa pili. “Adama a ziba Eva,” mi hamulaho wa likweli ze bat’o ba ze 9, kwa pepwa mwana ya na swana ni bona. (Genese 4:1) Ze ne ezahalile mwa mba ya Eva kuli ku be ni lilama kaufela ze ne tokwahala za mbututu yeo mane ni ku ngungahana, ki makazo ye sa konwi ku taluswa kamba ku utwisiswa ka ku tala ki batu!—Samu 139:13-16.

Batu ha ba komokangi taba ya ku pepa bakeñisa kuli i ezahala hañata-ñata mwahal’a lizazi ni lizazi. Niteñi, buñata bwa batu ha ba kolwi kuli kwa konahala ku zusa mutu kwa bafu. Jesu ha na bulelezi batu ba ne ba lila musizana ya na timezi kuli ba tuhele ku lila, “ba mu seha” ka ku mu sheununa bakeñisa ku ziba kuli musizana yo na shwile. Kono Jesu a bulela ku musizana ya na shwile, a li: “‘Zuha.’ Mi mwanana a zuha kapili, mi a zamaya.” Lu talusezwa kuli: “[Batu ba ne ba li teñi] ba kala ku komoka hahulu luli.”—Mareka 5:39-43; Luka 8:51-56.

Jesu ha na kupile kuli libita mwa na bulukilwe mulikan’a hae Lazaro ya na shwile li kwalulwe, Mareta, kaizel’a Lazaro a hana, a li: “S’a nunka, kakuli se li la bune a li mo.” Niteñi, batu ne ba tabile hahulu Jesu ha na zusize Lazaro kwa bafu! (Joani 11:38-44) Buñata bwa batu ne ba ziba limakazo za na eza Jesu. Joani Mukolobezi ha na li mwa tolongo, balutiwa ba hae ba to mu taluseza za misebezi ya Jesu, ba mu bulelela kuli: “Ba ba shwile ba zuha.”—Luka 7:22.

Ku Pila Hape Kabakala ku Zusiwa

Bakeñisa kuli bafu ba na zusize Jesu hamulaho hape ne ba kulile ni ku shwa, ki kabakalañi Jesu ha na ba zusize? Na ezize cwalo kuli a bonise kuli za na latehezwi Adama wa pili—ili bupilo bo bu sa feli mwa paradaisi fa lifasi—za kona ku kutiswa mi li ka kutiswa. Limakazo za ku zusa bafu za na ezize Jesu ne li bonisize mo ku ka konahalela kuli bolule-lule ba batu ba ‘yole sanda sa lifasi’ ni kuli ba ‘yahe mwateñi ku ya ku ile.’—Samu 37:29.

Nto ye tabisa kikuli, lwa kona ku ba ba bañwi ba batu ba ba na ni sepo ya ku pila ku ya ku ile haiba lu utwa Mulimu ka ku mu lapela. Bibele i bulela kuli bulapeli bo bu cwalo, ‘bu filwe sepiso ya bupilo bwa cwale, ni ya bo bu sa taha.’ ‘Bupilo bo bu sa taha’ bo hape bu konwa ku bizwa kuli “bupilo bo bu sa feli,” ni ‘bupilo sakata.’—1 Timotea 4:8; 6:19; Bibele ye Kenile, hatiso ya 1984.

Ha lu nyakisiseñi mo bu ka bela bupilo sakata bo bu sa taha bo, mwa lifasi le linca la ku luka.

[Siswaniso se si fa likepe 22]

“Ba kala ku komoka hahulu luli”