Linyalo Li Mwa Nyewanyewa

“Ha ni sa kona bupilo bo bu cwana!” Kana mu kile mwa utwa batu ba ba bulela cwalo ka za linyalo la bona? Haiba mu nyezi kamba mu nyezwi, kana ni mina mu kile mwa ikutwa cwalo ka nako ye ñwi?

BATU ba bañata ba ba mwa manyalo ha ne ba nyalani, lilato la bona ne li tuka, ne ba latana luli, mi ne ba libelela ku pila bupilo bwa tabo hamulaho. Muelezi yo muñwi wa za manyalo u talusa kuli: “Ha ne ba tahanga ku na kuli ni to ba eleza, buñata bwa bona ne se ba zwafile hahulu. Ze ne ba libelela ku bakubona, mwa linyalo, ni mwa bupilo, haki zona ze ne ezahala.” Buñata bwa bo munna ni musali bao, ha ba swalisani mwa lika ze ñata, se si bonisa fela kuli ba nyalani ki mucato, ni ku pila mwa ndu i liñwi.

Manyalo a mañwi a fitanga fa ku fela bakeñisa ku ekezeha kwa matata ni lipilaelo. Misebezi ye patehisa, misebezi ya ku yapana ili ku beleka manzibwana kamba busihu, ni mibeleko ye tokwa ku tanda nako ye telele, i tompwelisanga batu kuli mane ba palelwanga ku ina hamoho ni bakubona, niha ba latana hahulu. Ku felelwa ki pene, matata a ku uta bana, ku tutela mwa ndu i sili, ku cinca mibeleko ni makulano, li kona ku felisa lilato ni likute mwa linyalo. Taba ka bukuswani kikuli, licinceho ze banga teñi hamulaho wa nako li kana za tahisa matata a kona ku kauhanya batu ba ba nyalani.

Basali ba bañata ba belekanga misebezi ye mibeli, o muñwi ki wa peleko luli, mi o muñwi ona ki wa fa lapa. Ku eza misebezi yeo ku tahisanga kuli basali ba bañata ba ise fela mamelelo kwa mibeleko ya bona ni kwa ku uta bana ba bona, ni ku sa isa pilu kwa nto ifi kamba ifi. Matata ni ku topwela li palelwisanga batu ba ba nyalani ku isezana pilu. Kabakaleo, buñata bwa bona ba ikutwanga kuli ha ba sa kona ku itamaisa, mi seo si tahisanga kuli ba zwafe ni ku ipangula. Ki kabakalañi manyalo a mañata cwalo ha li mwa nyewanyewa? Mu kona ku ezañi kuli mu be ni linyalo le linde ni le li kondile?