Lilato li na ni Maata A ku Tula Saluluti

“Ne ku tile sikwata sa balapeli se nee si si ka bonwa kale haisali: ne si sicaba se nee si lapela naha ya habo sona, kono nee li sikwata sa baitateli, se nee si sa talimi fa mayemo a batu, mushobo kamba naha ya bona: baana ni basali ne ba kopana hamoho sina batu ba li bañwi, ku lapela mulimu wa bona.”—Hatiso ye bizwa A History of Christianity, ye nee ñozwi ki Paul Johnson.

BUKRESTE bwa niti ha ne bu nze bu yamba Mubuso wa Roma kaufela, batu ne ba iponezi nto ye komokisa hahulu—ne ba iponezi batu ba ba swalisani, ba ne ba lapela Mulimu hamoho, ili ba ne ba itutile ku pilisana ka kozo ni ka buñwi. Kozo ya balapeli bao ne i tomile fa lilato sakata le nee ba bonisana, ili lilato le nee li si ka toma fa maikuto a mwa pilu kono ili le nee li tomile fa likuka luli za Mulimu.

Likuka zeo ne li lutilwe ki Jesu Kreste, ya naa toilwe ni ku ketululwa maswe ki ba bañwi. (1 Pitrosi 2:21-23) Jesu naa zwelela kwa Galilea, mi ba kwa Galilea—ili bao buñata bwa bona nee li balimi ni bayambi—ne ba kendiwa ki ba bahulu ba bulapeli ba Majuda mwa Jerusalema. (Joani 7:45-52) Jesu hape nee li muluti yo mutuna ya naa latiwa ni ku kutekiwa ki batu-tu feela. Bakeñisa taba yeo, ba bahulu ba bulapeli ne ba mu shwezi hahulu muna mi ne ba hasanyize litaba za buhata ka za hae mi mane ne ba lelisani kuli ba mu bulaye!—Mareka 15:9, 10; Joani 9:16, 22; 11:45-53.

Niteñi, Jesu naa si ka “kutisa bumaswe ka bumaswe.” (Maroma 12:17) Ka mutala, ha naa buzizwe lipuzo ki ba bañwi kwa Bafalisi—ba ne ba li mwa sikwata sa Majuda se ne si mu lwanisa—Jesu naa alabile lipuzo za bona ka sishemo. (Joani 3:1-21) Mane naa cile lico ni Bafalisi, ku kopanyeleza cwalo ni Mufalisi yo muñwi ya naa bonisize kuli naa ketulula Jesu. Mufalisi yo naa bonisize cwañi kuli naa ketulula Jesu? Mwa miteñi yeo ne ku na ni sizo sa ku tapisa baenyi kwa mahutu; kono Mufalisi yo naa si ka tapisa Jesu kwa mahutu. Kana taba yeo ne i filikanyize Jesu? Batili. Mane naa itusisize kolo yeo ku luta tuto ya butokwa ya ku utwela ba bañwi makeke ni ku swalela libi za bona.—Luka 7:36-50; 11:37.

Jesu Naa Lata ba ba Kendiwa

Le liñwi la makande a mande hahulu a naa kandekile Jesu ki likande la Musamaria yo munde. Musamaria yo naa itusisize masheleñi a hae ku babalela Mujuda ya naa natilwe ni ku uzwezwa. (Luka 10:30-37) Ki kabakalañi kezo ya naa ezize Musamaria yo ha nee li ye nde hahulu? Kakuli Majuda ni Masamaria ne ba sa latani. Mane linzwi la “Musamaria” nee li itusiswanga ki Majuda sina lishendo—ili linzwi la naa kile mane a shendiswa ka lona Jesu ka sibili. (Joani 8:48) Ha lu hupula za taba yeo, lu bona kuli Jesu naa itusisize swanisezo ye nde hahulu ha naa bulela za ku bonisana lilato ku si na saluluti.

 Jesu naa tiisize manzwi a hae ka mutala wa hae; naa folisize muuna wa Musamaria ya naa kula mbingwa. (Luka 17:11-19) Ku zwafo, naa lutile Masamaria ba bañwi ba ne ba tabela ku ziba niti, mi mane naa ambozi ka nako ye telele ni musali wa Musamaria—ili kezo ye nee komokisize hahulu. (Joani 4:7-30, 39-42) Kabakalañi? Baluti ba Majuda ne ba sa bulelangi ni musali ufi kamba ufi fapilaa batu—nihaiba musali wahabo bona—lu sa buleli he musali wa Musamaria!

Kono cwale Mulimu u nga cwañi mutu ya na ni saluluti kono ili ya lika ka taata ku si felisa mwa pilu ya hae? Ni mwa taba yeo, Bibele i lu fa monyehelo ye omba-omba.

Mulimu U na ni Pilu-telele ku Luna

Mwa linako za baapositola ba Jesu, Bakreste ba bañata ba Majuda kwa makalelo ne ba yambukezwi ki moya o no yambile hahulu wa ku ketulula batu ba ba si Majuda, ba ne ba ba balumeli ka buñata. Jehova Mulimu naa talimile cwañi butata bo, bo ne bu kona ku ba fapanya? Naa lutile puteho ya Sikreste ka pilu-telele. (Likezo 15:1-5) Mi pilu-telele ya Mulimu ne i tahisize muselo o munde, kakuli sina mo ku boniselizwe kwa makalelo a taba ye, Bakreste bao ne ba pilisani hande ‘ku si na ku talima fa mayemo a bona, mushobo kamba naha ya bona.’ Mi ka lona libaka leo, liputeho “ne li tiiseza mwa tumelo; mi balumeli ne ba ekezeha ka zazi ni zazi.”—Likezo 16:5.

Lu itutañi kwa taba yeo? Lu ituta kuli ha lu swaneli ku zwafa, kono lu lukela ku zwelapili ku itinga ku Mulimu, ya fanga butali ni maata ka buñata ku ba ba ‘li kupa ka tumelo.’ (Jakobo 1:5, 6) Kana mu sa hupula Jennifer, bo Timothy, bo John, ni bo Olga ba ba bulezwi mwa taba ya pili? Jennifer ha naa tilo ya kwa sikolo se si pahami, naa sa li cwale Mukreste ya tiile mi naa sa itutile ku sa bilaezwa hahulu ki mashendo a ba bañwi a naa tomile fa saluluti ni a ku mu shenda kabakala siyemo sa hae. Hamulaho feela wa fo, musizana yo muñwi ha naa lwahakilwe ki bana ba sikolo ba bañwi mwa sitopa, Jennifer a mu yemela mi a mu omba-omba.

Ki nto mañi ye nee tusize bo Timothy ku ikuzeza feela ha ne ba shendiwa ki bana ba sikolo ba bañwi kabakala mubala wa litalo la bona? Bo Timothy ba li: “Ne ni ikutwile kuli ha ne ni ka fosa, ne ni ka tahisa nyazo fahalimwaa libizo la Jehova Mulimu. Mi hape ne ni hupulanga kuli lu lukela ku ‘tula bumaswe ka bunde’ ni ku sa tuhelela bumaswe ku lu tula.”—Maroma 12:21.

Bo John ne ba tuhezi ku ketulula mushimani wa mu-Hausa ya naa kena ni bona sikolo mwa sitopa se si swana. Ba sa hupula kuli: “Ha ne ni sa li mwanana ya saa nonoboka, ne ku na ni ma-Hausa ba bañwi fa sikolo sa luna ba ne ba li balikani ba ka. Ne ni filwe ku eza musebezi o muñwi ni mu-Hausa yo muñwi mi ne lu sebelisani hande hahulu. Cwale ni likanga ku bona batu ka mo ba inezi luli ku fita ku ba nga kuli ki ba mubala kamba mushobo u sili.”

 Bo Olga ni mulumiwa yo muñwi ne ba si ka saba ha ne ba taselizwe ki balwanisi, kono ne ba zwezipili ku itiisa mwa musebezi wa bona, inze ba na ni sepo ya kuli ba bañwi ku bona ne ba ka itebuha lushango lwa mwa Bibele. Mi ba bañata ne ba ezize cwalo luli. Bo Olga ba li: “Hamulaho wa lilimo ze 50, muuna yo muñwi naa ni atumezi mi a ni fa mukotana cwana o munde. Mwa mukotana mo ne ku na ni tucwe to tunyinyani fo ne ku cakuzwi mikwa ya Sikreste ye cwale ka bunde, musa, lilato, ni kozo. Mi cwale a ni taluseza kuli nee li yo muñwi wa bashimani bani ba ne ba kile ba ni posa macwe ni kuli cwale see li muzwale wa ka wa Sikreste. Hamulaho yena ni musalaa hae ba ni fa mapalisa a buheha kwandaa mukotana wo wa macwe.”

Saluluti ni Ketululo li ka Feliswa!

Ona cwale-cwale fa, ha ku sa na ku ba ni saluluti ni ketululo. Kabakalañi? Libaka le liñwi kikuli, lifasi li ka ba ni Mubusi a li muñwi feela, yena Jesu Kreste, ya naa bonisize kuli haa na ku atula ka “sobozi ya meto.” (Isaya 11:1-5) Ku zwafo, batu ba ba ka busiwa ki Jesu ba ka likanyisa mikwa ya hae ka ku petahala, kakuli batu kaufela ba ka lutiwa ki yena ni Ndataahe, yena Jehova Mulimu.—Isaya 11:9.

Tuto yeo i sweli ya lutiwa nihaiba cwale, mi i tusa batu ba Mulimu ku itukiseza mwa ku pilela mwa muinelo o munca o ka shutana hahulu ni muinelo wa cwale. Kana ne mu ka tabela ku fumana tuso kwa tukiso yeo ye fiwa feela ku si na ku lifa se siñwi? Haike mu fumane tuso ku yona ka ku ba ni tuto ya Bibele. * Kaniti, Mulimu haa na ketululo; tato ya hae ki ya kuli batu kamukana “ba piliswe, mi ba fite fa zibo ya ku ziba niti.”—1 Timotea 2:3, 4.

[Litaluso za kwatasi]

[Manzwi a fa likepe 16]

Ona cwale-cwale fa, saluluti ni ketululo ha li saa na ku kataza batu kai ni kai

[Mbokisi/Siswaniso se si fa likepe 17]

Likuka Za Lu File Mulimu Ze Lu Swanela Ku Latelela

▪ “Mu si ke mwa kutisa bumaswe ka bumaswe; mu  . . . tule bumaswe ka bunde.” (Maroma 12:17-21) Lu itutañi kwa manzwi ao? Lu ituta kuli ba bañwi ha ba lu eza maswe, luna lu itute ku ba eza hande. Jesu Kreste naa bulezi kuli: “Ba ni toile feela.” Niteñi, yena naa si ka ba toya.—Joani 15:25.

▪ “Lu si ke lwa bata ku bubekwa ko ku si na tuso, . . . ni ku shwelana muna.” (Magalata 5:26) Muna ni muipo li kona ku fokolisa silikani sa luna ni Mulimu, mi hañata li tahisanga sitoyo ni saluluti.—Mareka 7:20-23.

▪ “Linto kamukana ze mu lata kuli batu ba mi ezeze, mu ba ezeze zona ni mina.” (Mateu 7:12) Mu ipuze kuli: ‘Ni tabela ku eziwa cwañi ki ba bañwi?’ Mu eze ba bañwi mo mu tabela ku ezezwa, ku si na taba ni lilimo za bona za buhulu, mubala wa litalo la bona, puo kamba sizo sa bona.

▪ ‘Mu amuhelane, sina Kreste ha lu amuhezi.’ (Maroma 15:7) Kana mwa likanga ku ziba batu ba simuluho ni sizo se si shutana ni sa mina, sihulu haiba ki batanga ba Mulimu sina mina?—2 Makorinte 6:11.

▪ “Ndate ni me, niha ba ka ni tuhela, Muñaa Bupilo u ka ni nopa.” (Samu 27:10) Ku si na taba ni mo mu kana mwa ezezwa ki ba bañwi, Mulimu haa na ku mi fulalela ni kamuta haiba mu zwelapili ku sepahala ku yena.

[Siswaniso se si fa likepe 15]

Musamaria yo munde u tusa Mujuda ya uzwelizwe