Ze Tusa Lubasi 5: Mu be ni Kutwisiso

“Kutwisiso ya mina i zibwe ki batu kamukana.”—Mafilipi 4:5, NW.

Se ku talusa. Mwa mabasi a eza hande, muuna ni musali ba ba nyalani hañata ba swalelana. (Maroma 3:23) Ku tuha fo, ha ba uti bana ba bona ka taata kamba hape ku ba uta ka ku ba lemaza. Ba tomela lubasi milao i sikai ye utwahala. Haiba ba tokwa ku fa kalimelo, ba eza cwalo “ka tikanyo.”—Jeremia 30:11.

Libaka ha ku li kwa butokwa. Bibele i bulela kuli “butali bo bu zwa kwahalimu . . . bu na ni . . . musa [kamba kutwisiso].” (Jakobo 3:17) Mulimu yena ka sibili haa tokwi kuli batu ba ba si ka petahala ba petahale, kacwalo batu ba ba nyalani ba kona ku tokwelañi kuli bakubona ba petahale? Kaniti, ku nyaza-nyaza bakumina ka nako kaufela bakeñisa mifokolo ya bona ye minyinyani, ku kona ku tahisa feela ndimbelela, ha ku cinci lika. Lu ka eza hande ku lumela taba yee li, “kaufela lu fosa mwa linto ze ñata.”—Jakobo 3:2.

Bashemi ba ba eza hande ba bonisanga kutwisiso ha ba sebelisana ni bana ba bona. Ha ba kalimeli bana ka ku tula tikanyo, mi haki “ba ba taata.” (1 Pitrosi 2:18) Ba fanga tukuluho kwa bana ba bona ba ba sa nonoboka ili ba ba se ba bonisize kuli baa kona ku peta hande lika. Ha ba liki ku zamaisa nto ni nto kaufela ye ba eza bana ba bona. Buka ye ñwi i talusa kuli ku lika ku zamaisa lika kaufela za eza mwana ya sa nonoboka “ku swana ni ku bina ka taata ka mulelo wa ku biza pula kuli i nele. Ha ku na pula ye ka nela, kono mina ki mina mu ka topwela feela.”

Mu like muezezo wo. Mu tatube fo i kuma kutwisiso ya mina ka ku itusisa lipuzo ze latelela.

▪ Ki lili fo ne mu lumbezi bakumina?

▪ Ki lili fo ne mu nyazelize bakumina?

Mu eze katulo ye tiile. Haiba ne ku mi bezi taata ku fumana kalabo kwa puzo ya pili ye mwa sikwenda kono mu alabile ka bunolo puzo ya bubeli, mu nahane ka za sikonkwani se mu kona ku itomela kuli mu kone ku ba ni kutwisiso ha mu belekisana ni ba bañwi.

Kiñi ha mu sa ambolisani ni bakumina ka za likatulo ze mu kona ku eza sibeli sa mina?

Mu nahane ka za likatulo ze ba kona ku ikezeza bana ba mina ba ba sa nonoboka ili ba ba se ba bonisize kuli baa kona ku peta hande lika.

Ki kabakalañi ha mu sa ikamboti ni mwanaa mina ya sa nonoboka ka za litaba ze cwale ka nako ya swanela ku fitanga fa lapa?

[Siswaniso se si fa likepe 7]

Ka ku swana ni muzamaisi wa motikala ya na ni tokomelo, mutu ya na ni kutwisiso u fanga sibaka sa pili ku ba mwa lubasi lwa habo