Ka ku ya ka Bibele

Kana Mwa Swanela ku Lifiswa ha mu Ezezwa Lisebelezo za Bulapeli?

MWA linaha ze ñata, ba bahulu ba likeleke ze ipapata ku ba za Sikreste ni ba ba bahulu ba bulapeli bo buñwi ba lifisanga batu ha ba ba ezeza lisebelezo za bulapeli. Lisebelezo zeo li kana za kopanyeleza likolobezo, linawenga, kamba lisebelezo za fa malilo. Litifo ze lifiswa li kona ku fita fa madola a mianda-nda, kamba mane a likiti-kiti.

Ba bahulu ba bulapeli ba bañwi ba fiwanga lituwelo ki muuso kabakala lisebelezo za bulapeli ze ba ezanga ni kabakala ku kwalulanga mikopano ya muuso ka litapelo. Batu ba kona ku itebuha lisebelezo ze cwalo, mi ki niti kuli likeleke li banga ni lisinyehelo ze swanela ku lifiwa. Kono kana Bibele ya lumeleza mukwa wo, wo atile wa ku lifisa batu kabakala lisebelezo za bulapeli ze ba ezezwa kamba mane wa ku hapeleza batu ku lifa masheleñi?

Kana ki ‘Ndu ya Lilekelo’?

Jesu Kreste ha na li fa lifasi, ba bahulu ba bulapeli bwa Sijuda ni ba bañwi ne ba itusisanga mikiti ya bulapeli sina kolo ya ku fumanela fateñi masheleñi, sihulu ka nako ya Paseka. Kana Jesu na babalize mukwa wo? Batili! Mane Bibele i lu bulelela kuli Jesu ‘na sululezi fafasi mali a ba ba cinca, mi na wisize litafule za bona.’ Na ize: “Ndu ya Ndate mu si ke mwa i eza lilekelo.”—Joani 2:14-16.

Muinelo o swana ne u kile wa ba teñi ni mwa miteñi ya mupolofita Mika ya na pilile mwa lilimo za ma-700 B.C.E. Bibele i biha kuli ba bahulu ba bulapeli ba mwa Isilaele ne ba “toile likatulo za niti” mi baprisita ne ba “luta batu ka bubeleki.” Kono ka nako ye swana ne ba ikutwa kuli ne ba yemelwa ki Mulimu, kakuli ne ba li: “Ha lu li, Muñaa Bupilo u teñi ku luna?” (Mika 3:9, 11) Kono Jehova Mulimu na siyo ku bona. Mane Jehova na nyenya likezo za bona ze maswe mi na ba taluselize cwalo patalaza ka mupolofita wa hae.

Kacenu ba bahulu ba bulapeli ba bañata ba na ni mukwañuli o swana, mi kacwalo libaka za bona za bulapeli li swana feela inge ‘lilekelo.’ Mane likopano za bulapeli kaufela zona li ikenyize mwa litekisano, kakuli hañata li ezanga pisinisi ye fumisa ya ku lekisa milimu ya maswaniso ni tubongo-bongo to tuñata twa bulapeli. *—1 Joani 5:21.

‘Mu Filwe Feela, mu Fane Feela’

Ha na lumile baapositola ba hae ku yo kutaza taba ye nde, ku folisa bakuli, mane ni ku zusa ba ba shwile, Jesu na ize: ‘Mu filwe feela, mu fane feela.’ (Mateu 10:7, 8) Jesu fo na talusa kuli balateleli  ba hae ne ba sa swaneli ku lifisa batu ha ba ba ezeza lisebelezo ze ñwi. Mi yena Jesu ka sibili na tomile mutala o munde wa ku kombwekela ba bañwi ku si na ku ba lifisa se siñwi.

Ka ku latelela mutala wa Jesu, muapositola Paulusi na ezize bukombwa bwa hae a “sa fumani se siñwi kwateñi.” (1 Makorinte 9:18) Ha na tokwa masheleñi, na ipelekelanga ka ku eza litende. (Likezo 18:1-3) Kona libaka ha na bulezi kuli yena ni balumiwa ba bañwi ne ba sa “swani sina ba bañata” ba ne ba itusisa Linzwi la Mulimu kuli ba fumanele fateñi mali. (2 Makorinte 2:17, NW) Kono cwale lu kona ku fumana cwañi mali a ku itusisa sina puteho kwa lika ze cwale ka ku leka kamba ku lifela sibaka sa makopanelo?

“Mulimu U Lata ya Fana A Tabile”

Lipaki za Jehova ba fumananga mali a tokwahala ka linubu ze fiwa ka ku itatela. Lipaki ba latelela sikuka se: “Mutu ni mutu a zwise mwa hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7) Kacwalo, Lipaki ha ba lekisi lihatiso za bona kamba ku lifisa batu ha ba eza lisebelezo ze cwale ka likolobezo, linawenga, kamba lisebelezo za fa malilo. Mi kwa mikopano ya bona, ha ba fi za bulishumi kamba ku fitisa mukeke wa likoleko. Mañi ni mañi ya bata ku zwisa nubu kuli a tuse kwa musebezi wa bona wa ku kutaza mwa lifasi kaufela u kona ku eza cwalo ka ku beya nubu ya hae mwa kambokisi ka linubu mwa libaka za bona za makopanelo.

Mwa lifasi kaufela, Lipaki za Jehova ba itusisa linubu ze fiwa ka ku itatela kwa ku yaha ni ku babalela Mandu a Mubuso, Mandu a Mikopano, liofisi za mitai, hamohocwalo ni kwa ku hatisa lihatiso ni kwa ku tusa ba ba tahezwi ki likozi. Ba bañwi, ka ku swana sina mbelwa ya shebile ya na babalize Jesu, ba zwisanga malinyana. (Luka 21:2) Ba bañwi bona ba zwisanga mali a mañata. Ibe kuli nubu ye ba zwisa ki ye nyinyani kamba ki ye tuna, ba ba latelela likuka ze bonisizwe mwa Bibele ni ku zwisa linubu ka ku ya ka buikoneli bwa bona ba na ni mwangalwa, ba kapwekwa limbuyoti ki Mulimu, mi ba na ni tabo sakata.—Likezo 20:35; 2 Makorinte 8:12.

[Litaluso za kwatasi]

KANA MU KILE MWA IPUZA KULI:

● Jesu na buleziñi ku ba ne ba eza litekisano mwa tempele?—Joani 2:14-16.

● Kana muapositola Paulusi na lifisanga batu ha na ba ezezanga lisebelezo za bulapeli?—2 Makorinte 2:17.

● Jehova u tabela bufani bo bu cwañi?—2 Makorinte 9:7.

[Manzwi a fa likepe 15]

“Ndu ya Ndate mu si ke mwa i eza lilekelo.”—Joani 2:14-16