Ku Fumana Nako ya ku Eza Lika za Butokwa

“Nako [ye siyezi] ki ye kuswani.”—1 Makorinte 7:29.

MWA buka ya bona ye bizwa Working Smart, bo Michael LeBoeuf ne ba ize: “Ku tulaka-tulaka ni ku iselaka mezi ha ku talusi kuli mutu wa tapa.”

Ka mubulelelo o muñwi kikuli, ku tukufalelwa ha ku talusi kuli mutu u peta se siñwi se si butokwa. Mu ikupulise ze mu ezize sunda ye felile. Nako ya mina ne mu itusisize yona kwañi? Ne mu ipatehisize ku eza lika mañi? Kana mu ikutwa kuli mu tokwa nako ye ñata ya ku eza lika ze mu nga ku ba za butokwa hahulu?

Mu nyakisise za na bulezi Jesu ka za linako za luna za mipateho. Na bulezi kuli mafelelezo a muinelo wo ha nze a atumela ni lifasi le linca la Mulimu la ku luka ha li nze li sutelela, balutiwa ba hae ne ba ka pateha. Ku pateha ku ezañi? Ku pateha ku kutaza “evangeli ye ya mubuso” wa Mulimu. Jesu hape na bulezi kuli buñata bwa batu ba ka ipatehisa mi ba ka palelwa ku teeleza kwa taba ya Mubuso. Na bulezi kuli ne ba ka pateha ku bata lika za bupilo. Na ekelize ku talusa kuli ba ba ipatehisa hahulu, ili ba ba palelwa ku teeleza kwa taba ya Mubuso ba ka to timezwa.—Mateu 24:14, 37-39; Luka 17:28-30.

Kacenu, Lipaki za Jehova ba kutaza taba ye nde ya Mubuso wa Mulimu mwa linaha ze fitelela 230. Sina mwa na polofitezi Jesu, ba bañata ha ba teelezi kwa lushango lwa bona, kuti ba “patehile hahulu.” Kono lwa mi kupa kuli niha mu patehile hahulu, shangwe mu fumane nako ya ku nyakisisa ze i luta Bibele ka za Mubuso wa Mulimu. Lu kolwa kuli ha mu ka ituta ka za limbuyoti zeo Mulimu a bulukezi batu kwapili, mu ka lumela kuli ku teeleza ni ku mamela lushango lwa mwa Bibele haki ku sinya nako, kono ku libisa kwa limbuyoti ze ñata. *

[Litaluso za kwatasi]