Ka ku ya ka Bibele

Badimona ki Bomañi?

KU NA ni libupiwa za moya ze ba lumela batu ba bulapeli bo bu shutana-shutana kuli ki ze nde kamba ki ze maswe, kamba ze ba nga kuli ki ze nde mi ka nako ye swana ki ze maswe. Libupiwa zeo ki ze cwale ka lilumba, libilibita, ni badimona. Batu ba bañwi ha ba lumeli kuli ku na ni libupiwa za moya; ba nga kuli zeo ki litaba feela za tumelo ya balimu kamba za ku ikupulela feela. Bibele i bulelañi?

Bibele i luta kuli Mubupi ki Moya ni kuli libupiwa za hae za pili ne li za moya. (Joani 4:24; Maheberu 1:13, 14) Ku zwa fo, Bibele i bulela ka za mioya ye maswe, mi fokuñwi i biza mioya yeo kuli ki badimona. (1 Makorinte 10:20, 21; Jakobo 2:19) Kono Bibele ha i luti kuli Mulimu ki yena ya naa bupile badimona. Kacwalo, badimona ki bomañi luli, mi ba zwa kai?

“Mangeloi A Naa Fosize”

Mulimu ha naa bupile libupiwa za moya, naa li file tukuluho ya ku ikezeza likatulo; ne li kona ku keta ku eza ze nde kamba ze maswe. Ka bumai, hamulaho wa ku bupiwa kwa batu, mangeloi ba palo ye si ka bulelwa ne ba ketile ku eza bumaswe ka ku fetuhela Mulimu.

Sibupiwa sa moya se ne si kalile ku fetuhela Mulimu, ili se si zibahala hahulu ka bumaswe ne si tilo bizwa Satani. Jesu Kreste naa bulezi kuli Satani “haa ini mwa niti.” (Joani 8:44) Kiñi se ne si tahisize kuli Satani a fetuhele Mulimu? Naa kalile ku lakaza ku lapelwa ili nto ye swanela feela Mubupi, mi a bonisa takazo yeo ka ku ikeza mulimu ya lwanisa Mubupi. Ka ku eza cwalo, naa ikezize “Satani,” ili linzwi le li talusa “mulwanisi.” Lilimo-limo hasamulaho wa fo, Munda wa mwa miteñi ya Nuwe u si ka taha kale, mangeloi a mañwi a kalisa ku swalisana ni Satani, a siya litulo za ona kwa lihalimu ni ku ipetula batu mi a to pila fa lifasi. (Genese 6:1-4; Jakobo 1:13-15) Munda ha ne u ezahalile, ku bonahala kuli “mangeloi a naa fosize” ili a naa ipetuzi batu naa kutile kwa lihalimu. (2 Pitrosi 2:4; Genese 7:17-24) Mangeloi ao ki ona a naa tilo bizwa badimona.—Deuteronoma 32:17; Mareka 1:34.

Mangeloi ao a naa ipanguzi, cwale a ipumana mwa muinelo o shutana hahulu ni wa naa li ku wona pili a si ka kwenuhela kale Mulimu. Liñolo la Juda 6 li bala kuli: “Mangeloi aa si ka tiiseza mwa bunduna bwa ona, kono a zwile mwa litulo za ona, [Mulimu] u a bulukile a tamilwe mwa lififi ku ya ku ile, kuli a libelele Katulo ya lizazi le lituna.” Kaniti, Mulimu naa si ka lumeleza badimona bao ku kutela mwa litulo za bona kwa lihalimu; ka swanisezo u ba ‘tamile ka mawenge a lififi,’ ili ku ba tima liseli la moya.

Ba “Pumanga Lifasi Kamukana”

Nihaike ku bonahala kuli badimona ha ba sa lumelezwa ku ipetula batu hape, ba sa na ni maata a matuna mwa bupilo bwa batu mi ba sa kona ku kukueza hahulu minahano ya batu. Mane Satani ni sikwata sa hae sa badimona, ba “pumanga lifasi kamukana.” (Sinulo 12:9; 16:14) Ka mukwa ufi? Sihulu ka ku itusisa “lituto za badimona.” (1 Timotea 4:1) Lituto za buhata zeo, ili ze banga za bulapeli hañata, li foufalize kutwisiso ya batu ba bañata-ñata kuli ba si ke ba utwisisa niti ka za Mulimu. (2 Makorinte 4:4) Ha mu nyakisise mitala ye miñwi.

● Tuto ya kuli bafu ba sa pila. Ka ku tahiseza batu ku bona lipono ze siyo, ku utwa manzwi, ni ka ku itusisa mashano a mañwi, badimona ba puma batu ku lumela kuli batu ba ba pila ba kona ku ambola ni bafu. Fahalimwaa seo, lishano leo li yemela taba ya buhata ya kuli moyo u zwelangapili ku pila hamulaho wa ku  shwa kwa mubili. Kono Bibele i bulela ka ku ikutwahalela hande kuli “ba ba shwile ha ba na se ba ziba.” (Muekelesia 9:5, 6) Kabakala kuli ba ‘shetumukezi mwa sibaka se si kuzize,’ ha ba koni ku lumbeka Mulimu.—Samu 115:17. *

● Ku tokwa likuka za muzamao. Liñolo la 1 Joani 5:19 li bulela kuli: “Lifasi kamukana li lapalezi mwatasaa ya maswe.” Satani ni badimona ba hae ba sebelisa maswe maata a bona ka ku itusisa mitai ya makande ni linzila ze ñwi ku susueza batu ku ba ni mubonelo o maswe wa kuli ba swanela ku ipilela ka litakazo za bona za nama. (Maefese 2:1-3) Kona libaka mizamao ye maswe ye shutana-shutana, ye kopanyeleza cwalo ni mifuta ya somano ye si ya ka taho i atile hahulu kacenu. Mane mikwa ye cwalo i ngiwa ku ba ye lukile, mi likuka za Bibele hañata li ngiwa kuli ki za ikale kamba ki za batu ba ba siyalezi.

● Ku susueza tumelo ya mioya. Muapositola Paulusi naa kile a kopana ni musizana ya naa na ni “moya wa bunuhi” o no mu konisize ku “fumisa hahulu malenaa hae ka ku nuha.” (Likezo 16:16) Ka ku ziba kuli maata a naa itusisa musizana yo naa zwa kwa mudimona, Paulusi naa hanile ku mu teeleza. Ku zwa fo, Paulusi naa sa lati ku foseza Mulimu, ya nga mifuta kaufela ya tumelo ya mioya, ye kopanyeleza ku nuha ka ku itusisa linaleli kamba ku fitisa likupo kwa mioya, kuli ki masila.—Deuteronoma 18:10-12.

Mu Isileleze Kwa Badimona

Mu kona ku isileleza cwañi kwa mioya ye maswe? Bibele i alaba kuli: “Mu ipeye kwatasaa Mulimu; mu hanele Diabulosi, mi u ka saba ku mina.” (Jakobo 4:7) Lu utwa taelo yeo ka ku pila ka ku lumelelana ni lituto ze mwa Bibele, yona buka inosi ye kenile ye beya Satani, badimona, ni “makilikicani” a bona fa nalela. (Maefese 6:11, Bibele ye Kenile, hatiso ya 1984; 2 Makorinte 2:11) Hape Bibele i lu bulelela kuli mioya ye maswe, hamohocwalo ni batu kaufela ba ba lwanisa Mulimu, ha ba na ku ba teñi ku ya ku ile. (Maroma 16:20) Liñolo la Liproverbia 2:21 li bulela kuli: “Ba ba eza niti ba ka yaha mwa naha, ba ba sa nyazahali ba ine ku yona.”

[Litaluso za kwatasi]

KANA MU KILE MWA IPUZA KULI:

● Kana Mulimu ki yena ya naa bupile badimona?—2 Pitrosi 2:4.

● Kana mutu wa kona ku ambola ni bafu?—Muekelesia 9:5, 6.

● Mutu u kona ku isileleza cwañi kwa badimona?—Jakobo 4:7.

[Siswaniso se si fa likepe 13]

Badimona ba lika ku kukueza batu ka linzila ze ñata