Butali bo bu lu Tusa ku ba ni Lipulelo ze Nde

‘KAMBE ne ni si ka bulela taba yani ye ne ni bulezi!’ Kana mu kile mwa ikutwa cwalo? Kaniti, kaufela luna lu fumananga taata ku tokomela lilimi la luna. Bibele i bulela kuli lwa kona ku tapisa ibato ba folofolo ni folofolo, “kono lilimi, ha ku na mutu ya kona ku li tapisa.” (Jakobo 3:7, 8) Kacwalo kana lu swanela ku ikutwa kuli lu palezwi ku tokomela lilimi la luna? Batili! Ha lu nyakisiseñi likuka ze ñwi za Bibele ze kona ku lu tusa ku tokomela hande silama sa mubili se sinyinyani seo kono ili se si maata.

● “Mutu ya bulela hahulu, ha tokwi ku fosa; kono ya ñaña mulomo wa hae, u butali.” (Liproverbia 10:19) Ha lu bulela hahulu, ku ka ba bunolo hahulu ku bulela taba ye si na tuso kamba ye utwisa ba bañwi butuku. Kaniti, lilimi le li sa tokomelwi li swana sina mulilo, li kona ku hasanya kapili-pili lusebo lo lu maswe ni litaba za ku sawana mutu. (Jakobo 3:5, 6) Kono ha lu ‘ñaña mulomo wa luna,’ kamba ku nahana pili lu si ka bulela kale, lu nyakisisa mo manzwi a luna a kona ku amela ba bañwi. Ha lu eza cwalo, lu ka zibahala kuli lu batu ba ba na ni maseme, mi lu ka tahisa kuli ba bañwi ba lu kuteke ni ku lu sepa.

● “Mutu kaufela ibe ya teeleza kapili, ya liyeha kwa ku bulela, ya liyeha ni kwa ku halifa.” (Jakobo 1:19) Ba bañwi ba tabelanga ha lu teeleza ka tokomelo ku ze ba bulela, kakuli ha lu eza cwalo ha lu bonisi feela kuli lwa tabela ze ba bulela kono hape lu bonisa kuli lwa ba kuteka. Kono ku cwañi haiba mutu yo muñwi a bulela nto ye lu utwisa butuku kamba ye lu halifisa? Ha ku ba cwalo, lu swanela ku lika ku ‘liyeha kwa ku halifa’ ka ku sa mu eza sina mwa lu ezelize. Kakuli ha lu koni ku ziba se si tahisize kuli mutu yo a bulele cwalo. Mwendi ku na ni nto ye mu halifisize mi mwendi mane u ka ikupela swalelo kabakala manzwi a maswe a bulezi. Kana ku mi belanga taata ku ‘liyeha kwa ku halifa’? Haiba ku cwalo, mu lapele ku Mulimu kuli a mi tuse ku ba ni buiswalo. Haa na ku palelwa ku alaba litapelo ze cwalo ze buniti.—Luka 11:13.

● “Lilimi le li bulela ka musa li ka loba masapo.” (Liproverbia 25:15) Ka ku fapahana ni mubonelo wa batu ba bañata, musa ki kalemeno ka kande hahulu. Ka mutala, kalabo ye musa i kona ku felisa twaniso ye bonahala ku ba ye taata sina lisapo, ili yeo mwendi i tahiswa ki bunyemi kamba ketululo. Niti kikuli, ku kona ku ba taata ku bonisa musa, sihulu batu ha ba halifile. Kacwalo mu nahane ka za bunde bwa ku eza ze i bulela Bibele ni bumaswe bo bu kona ku tahiswa ki ku sa eza ze i bulela.

Kaniti, likuka za Bibele li iputezi “butali bo bu zwa kwahalimu.” (Jakobo 3:17) Ha lu bonisa butali bo mwa lipulelo za luna, lu ka kuteka ba bañwi, ku ba tabisa, ni ku ba yaha ka manzwi a luna a bulezwi ka nako ye swanela, ili a swana sina “apule ya gauda ye mwa pizana ya silivera.”—Liproverbia 25:11.