Ka Ku Ya Ka Bibele

Kana Mulimu wa Yemela Lindwa za Mwa Miteñi ya Luna?

MULENA DAVIDA wa Isilaele wa kwaikale naa bulezi cwana ka za musebezi wa hae sina ndwalume: “[Mulimu] u luta mazoho a ka ndwa; mi cwale mazoho a ka a kopamisa buta bwa kopa.”—Samu 18:34.

Muapositola Paulusi naa ñozi cwana ka za Bakreste: “Niha lu zamaya ka nama, ha lu lwani ka ku ya ka se lu li sona ka nama. Kakuli lilwaniso za luna haki za nama.”—2 Makorinte 10:3, 4.

Kana mañolo ao a lwanisana? Kamba kana ku na ni mabaka a utwahala Mulimu ha naa lumelela Isilaele wa kwaikale ku lwananga lindwa ni ha naa sa lumeleli Bakreste ku eza cwalo? Kana mubonelo wa Mulimu ka za lindwa u cincize? Lu kona ku utwisisa hande likalabo za lipuzo zeo ka ku nyakisisa lishutano ze taalu ze tuna ze mwahalaa Isilaele ni puteho ya Sikreste ya niti.

Lishutano ze Taalu ze Tuna

1. Isilaele wa kwaikale ne li sicaba se ne si na ni naha luli ye ne i na ni milulwani ili ye ne si filwe ki Mulimu, mi sicaba seo ne si potolohilwe ki macaba a naa li a situhu hañata. Kabakaleo, Mulimu naa laezi batu ba hae ku sileleza naha ya bona, mi mane naa ba tusanga ku tula lila za bona. (Baatuli 11:32, 33) Kono puteho ya Sikreste yona ha i na milulwani, mi batu ba ba ku yona ba fumaneha mwa linaha kaufela. Kamukwaocwalo, haiba balateleli ba Kreste ba mwa naha ye ñwi ba ikenya mwa ndwa ya ku lwanisa naha ye ñwi, ne ba ka lwanisa balumeli ka bona—mizwale ni likaizeli ba bona ba kwa moya—ili bo ba laezwi ku lata kamba mane ku shwela.—Mateu 5:44; Joani 15:12, 13.

2. Sicaba sa Isilaele wa kwaikale ne si na ni mulena wa butu, mi lubona lwa hae ne lu li mwa Jerusalema. Kono Bakreste ba niti ba busiwa ki Jesu Kreste, ili ya li sibupiwa sa moya se si maata ka nako ya cwale, mi lubona lwa hae lu kwa lihalimu. (Daniele 7:13, 14) Jesu kasibili naa ize: “Mubuso wa ka hasi wa lifasi le. Kabe mubuso wa ka ki wa lifasi le, kabe likombwa za ka li ni lwanezi kuli ni si ke na fiwa kwa Majuda. Kono cwale, sina mo ku inezi, Mubuso wa ka ha u zwi mwa lifasi le.” (Joani 18:36) Kamukwaocwalo, mwa lifasi ha ku na mubuso wa bupolitiki, kamba mulonga, o kona ku ipapata kuli ki wa Kreste. Taba ye i ama cwañi “likombwa” za Kreste, kamba bona balateleli ba hae? Sisupo sa bulaalu si alaba puzo yeo.

3. Ka ku swana sina macaba a mañwi, sicaba sa Isilaele hañata ne si lumanga batu, kamba be lu kona ku biza kacenu kuli lindumeleti kamba linumwana. (2 Malena 18:13-15; Luka 19:12-14) Kreste ni yena u ezize cwalo, nihaike kuli ku na ni lishutano ze peli ze tuna ze mwahalaa mo a ezelize yena ni mo ne si ezezanga sicaba sa Isilaele. Sapili, balateleli ba Jesu kaufela ba sebeza sina lindumeleti kamba linumwana. Ki lona libaka muapositola Paulusi naa ñozi cwana ka ku yemela Bakreste ka yena: “Kamukwaocwalo lu lindumeleti ze keni mwa sibaka sa Kreste.” (2 Makorinte 5:20) Ka ku ba lindumeleti za kozo, ne ba si ka ikenya mwa lindwa. Sa bubeli, balateleli ba Jesu ba kutazanga kwa batu kaufela ba ba tabela ku teeleza kwa lushango lwa bona. Jesu naa bulezi kuli: “Taba ye nde ye ya Mubuso i ka kutazwa mwa lifasi kaufela kuli ibe bupaki kwa macaba kamukana.” (Mateu 24:14) Hape naa bulezi kuli: “Ha mu ye, mi mu lute batu ba macaba kaufela ku ba balutiwa, . . . mu ba lute ku mamela lika kaufela ze ni mi laezi.”—Mateu 28:19, 20.

Ka bumai, likombwa za Kreste ha ba amuhelwangi hande fokuñwi. Ki lona libaka muapositola Paulusi naa ñolezi Timotea, mukutazi wa Sikreste kuli: “Sina lisole le linde la Kreste Jesu, u itukiseze ku nyanda.” (2 Timotea 2:3) Niteñi, lilwaniso za Timotea ne li za kwa moya, mi ne li kopanyeleza  Linzwi la Mulimu le li ñozwi, ili le li bizwa “mukwale wa moya.”—Maefese 6:11-17.

Ki Kabakalañi Mulimu ha Naa Tuhezi ku Shemuba Isilaele ni ku Kalisa ku Shemuba Puteho ya Sikreste?

Ka lilimo ze bato ba 1,500, sicaba sa Isilaele ne si ikozi swalisano ye ipitezi ni Mulimu, ili swalisano ye ne tomile fa bulikani bwa naa itamile ni sona, kamba tumelelano. (Exoda 19:5) Muyema-mwahali wa tumelelano yeo ne li Mushe, mi tumelelano yeo ne i kopanyeleza Milao ye Lishumi hamohocwalo ni milao ye miñwi; milao yeo kaufela ne i zwisezapili bulapeli bwa niti ni ku susueza batu ku ba ni likuka ze pahami za muzamao. (Exoda 19:3, 7, 9; 20:1-17) Kono ka bumai, sicaba sa Isilaele ka nañungelele ne ba si ka sepahala ku Mulimu, mane ne ba bulaile bapolofita ba hae.—2 Makolonika 36:15, 16; Luka 11:47, 48.

Kwa nalule-lule, Jehova naa lumile Mwanaa hae, yena Jesu Kreste, ya naa pepilwe sina Mujuda. Mwa sibaka sa ku amuhela Jesu sina Mesia, sicaba sa Majuda ne si mu hanile. Ka libaka leo, Mulimu a felisa tumelelano ya naa na ni yona ni sicaba sa Isilaele ka nako ye telele, mi limota la swanisezo le ne li kauhanya Majuda ni batu ba ne ba si Majuda la wa. * (Maefese 2:13-18; Makolose 2:14) Ibato ba ka nako ye swana yeo, Mulimu naa tomile puteho ya Sikreste, mi a keta Jesu ku ba Toho ya yona. Fahalimwaa seo, lilimo za mwanda wa pili C.E. li si ka fela kale, puteho yeo kaniti ne se i kopanyeleza batu ba macaba a mañata a shutana-shutana. Muapositola Pitrosi ya naa li Mujuda naa bulezi kuli: “Mwa sicaba ni sicaba mutu kaufela ya saba [Mulimu] ni ku eza se si lukile u lumelelwa ki yena.”—Likezo 10:35.

Lipaki za Jehova ba latelela mutala wa Bakreste ba kwa makalelo. Kamukwaocwalo, Lipaki ba zibahala ka musebezi wa bona wa ku kutaza kwa nyangela ni ka buikambuso bwa bona kwa litaba za bupolitiki ni kwa lindwa. (Mateu 26:52; Likezo 5:42) Kaniti, ha ba tuheleli nto ifi kamba ifi ku ba palelwisa ku zibahaza taba ye nde ya Mubuso wa Mulimu, ili ona mulonga u nosi o ka felisa bumaswe ni ku tahisa kozo ye inelela fa lifasi. Ka ku beya sepo ye nde yeo mwa munahano, muapositola Paulusi naa ñozi kuli: “Sina ba ba keni mwa sibaka sa Kreste, lwa mi kupa, lu li: ‘Mu kutele ku Mulimu.’” (2 Makorinte 5:20) Ki kwa butokwa hahulu kuli batu ba utwe manzwi ao ka putako kacenu, bakeñisa kuli se lu atumela kwa mafelelezo a “mazazi a maungulelo” a lifasi le li maswe le.—2 Timotea 3:1-5.

[Litaluso za kwatasi]

KANA MU KILE MWA IPUZA KULI:

● Ki kalemeno mañi ka butokwa hahulu ke ba swanela ku bonisana Bakreste?—Joani 13:34, 35.

● Ki sifi silwaniso sa kwa moya sa butokwa hahulu ku Mukreste wa niti?—Maefese 6:17.

● Bayemeli ba Kreste ba sweli ku zibahaza lushango lufi lwa butokwa?—Mateu 24:14; 2 Makorinte 5:20.

[Siswaniso se si fa likepe 15]

Lipaki za Jehova ki batu ba ba zwelela mwa linaha ze ñata ze shutana-shutana mi ba zwelapili ku ikambusa kwa lindwa za macaba