Lu Tokwa Kuli Manyando A Feliswe!

Manyando a bo Khieu naa kalile ka nako yeo bo ndataa bona ne ba bulailwe kabakala ku tuhelela likomu za bona ku kena mwa simu ya mbonyi ye ne i li bukaufi. Hasamulaho, bo maa bona bo Khieu ni likaizeli za bona ba babeli ne ba bulailwe ki kopano ya Khmer Rouge ya mwa naha ya Cambodia. Ku zwa fo, bo Khieu ba holofazwa ki ndalamiti. Ba libelela tuso mwa mushitu o tibani ka mazazi a 16. Ne ba na ni ku pumiwa lihutu. Bo Khieu ba li: “Ne ni sa tabeli ku zwelapili ku pila.”

MWENDI se mu lemuhile kuli manyando ha keti. Likozi za ka taho, makulanu ni buhole, bukebenga bo butuna, ni likozi ze ñwi li kona ku wela mutu ufi kamba ufi, mwa sibaka sifi kamba sifi, ka nako ifi kamba ifi. Likopano ze tusa batu ba ba nyanda li likile ka taata ku tibela manyando e ba ipumana ku wona batu kamba ku imulula batu kwa manyando ao. Kono ki lika mañi ze zwile mwa buikatazo bwa likopano zeo?

Ha mu nyakisise feela mutala u li muñwi wo—ili buikatazo bwa ku lika ku felisa tala. Ka ku ya ka mutende o bizwa Toronto Star, likozi za ka taho li tahiselize batu ba bañata ku tokwa maino ni lico. Kono mutende wo u biha kuli, “buikatazo bwa likopano ze lika ku imulula batu kwa tala bu kutisezwa mwamulaho ki bukebenga bo bu sweli ku ekezeha.”

Baeteleli ba bupolitiki, ba sicaba, ni ba za bualafi, kaufelaa bona ba likile ka mo ba konela kaufela kuli ba imulule batu kwa manyando, kono ba palezwi. Litukiso za ku zwisezapili za sifumu sa linaha li palezwi ku felisa bunjebwe. Mipende, milyani, ni linzila ze ipitezi za ku alafa batu ka ku ba pazula ha li koni ku feza matuku kaufela. Mapokola ni masole ba ba likanga ku tahisa kozo kwa libaka ze na ni lindwa ba palelwa ku fa tuso ya ku felisa bukebenga bo bu zwelapili kamba mane bo bu sweli ku ekezeha.

Ki kabakalañi ha ku na ni manyando a mañata cwana mwa lifasi? Kana Mulimu u na ni taba ni manyando e ba sweli ku talimana ni ona batu? Batu ba bañata-ñata se ba fumani likalabo ze omba-omba za lipuzo zeo ku zwelela mwa Bibele, sina mo lu ka bonela.