Sepiso ya Bupilo bo bu si na Manyando ya Sepeha

“[Mulimu] u ka takula miyoko kaufela kwa meeto a bona, mi lifu ha li sa na ku ba teñi, nihaiba ku tahelwa ki maswabi kamba ku lila kamba ku utwa butuku. Za pili li felile.”—Sinulo 21:4.

KANA sepiso ye tabisa yeo ya kona ku sepeha? Ha mu nahane ka za mamela ye ñwi ya pili ye ne ba filwe batu. Mulimu naa bulelezi Adama kuli ha naa si ke a mu utwa naa “ka shwa luli.” (Genese 2:17) Mi Adama naa shwile, sina feela mwa naa bulelezi Mulimu. Taba yeo hamohocwalo ni lifu ni manyando ze tahezi batu li fa bupaki bo bu bonisa kuli Mulimu wa kona ku sepiwa. Kaniti, ha ku na se si kona ku lu kakanyisa kuli Mulimu u ka taleleza sepiso ya hae ya ku kutisa lifasi mwa muinelo o petehile o ne li li ku ona sapili.

Hape ha mu hupule tulemeno twa Mulimu to tu nyakisisizwe mwa taba ye felile. Takazo ya luna ya ku felisa manyando i bonisa feela kuli lu na ni tulemeno to tu swana ni twa Mulimu, to tu cwale ka mufelañeke, lilato, ni katulo ye lukile. Ku tuha fo, likezahalo za mwa lifasi ni mikwa ye se atile kacenu li bonisa kuli nako ya kuli Mulimu a nge muhato i taha i cibilika.—Mu bone kambokisi ka ka na ni toho ya taba ye li:  “Lika Zeo li ka Ezahala Lili?”

Ki kabakalañi Jehova Mulimu ha i li yena feela ya na ni nzila ye nde ka ku fitisisa ya ku felisa ka yona manyando a batu? Mu nahane buikoneli bwa na ni bona Mulimu bwa ku felisa ze tahisa manyando ni mwa lukiselize ku feza manyando—ili ka ku itusisa Mwanaa hae Jesu.

Liketo za ka butu. Ndataa luna Adama naa ezize keto ye tahisize butata bo butuna kwa bana ba hae kaufela. Muapositola Paulusi naa ñozi kuli: “Ze bupilwe kaufela li zwelapili ku tonga hamoho ni ku utwa butuku hamoho.” (Maroma 8:22) Nzila ya ka itusisa Mulimu ku tatulula ka yona butata bo ki ye lukile hahulu, ili ye bonisa makeke a hae a matuna, mi ki ye bunolo hahulu. Liñolo la Maroma 6:23 li talusa kuli: “Mupuzo wa sibi ki lifu, kono mpo ya fa Mulimu ki bupilo bo bu sa feli ka Kreste Jesu Mulenaa luna.”

Jesu, ya naa li mutu ya petehile, naa si ka eza sibi mwa bupilo bwa hae. Lifu la hae fa kota ya linyando ne li kwaluzi nzila ya kuli batu ba ba ipeya ku utwa ba lukululwe kwa sikuto sa sibi ni lifu. Cwale lu na ni sepo ya ku ba ni bupilo bo bu sa feli mwa lifasi mo lu si ke lwa ba mwa muinelo wa sibi, ili ona o tahisanga kuli lu eze liketo ze maswe. Batu ba ba nyandisa ba bañwi ka bomu ni bona ha ba na ku ba teñi, kakuli “ba ba maswe ba ka yundiswa.”—Samu 37:9.

Likezahalo za ka sipundumukela ni ku sa petahala. Jesu Kreste, yena Mulena ya ketilwe ki Mulimu, u na ni maata a ku zamaisa maata a ka taho a lifasi. Mwa lilimo za mwanda wa pili C.E., nako ye ñwi Jesu ni baapositola ba hae ne ba li mwa sisepe sa ku yambela mi “kwa zuha liñungwa le lituna, mi mezi naa sweli ku kena mwa sisepe kabakala mandinda, kuli mane sisepe ne si tuha si tiba.” Baapositola ha ne ba kupile Jesu kuli a fe tuso, Jesu a “zuha mi a kalimela  moya mi a li kwa liwate: ‘Kuza! U li tuu!’ Mi moya wa yema, mi kwa ombala luli.” Baapositola ba hae ne ba komokile hahulu. Ne ba ize: “Nihaiba moya ni liwate za mu utwa.”—Mareka 4:37-41.

Mwatasaa puso ya Jesu, batu ba ba ipeya ku utwa ba ‘ka pila mwa kozo, mi ba ka iketa ba sa sabi kozi.’ (Liproverbia 1:33) Kozi ye bulelwa yeo i kopanyeleza ni likozi za ka taho. Ku tuha fo, lika ze cwale ka ku sa babalela hande lifasi, miyahelo ye maswe, ku tokwa zibo ka za maata a ka taho a lifasi, hamohocwalo ni mafosisa a mañwi a butu, li ka fela. Ha ku sa na ku ba ni mutu ya ka nyanda kabakala ku ba mwa sibaka se si sa swaneli ka nako ye maswe.

Ha naa li fa lifasi, Jesu naa bonisize kalulo ye ñwi ye ama puso ya hae, ili kalulo ye kona ku felisa manyando kaufela e ba ipumananga ku wona batu kacenu ili a tahiswanga ki likezahalo za ka sipundumukela. Jesu naa ize: “Ki na zuho ni bupilo.” (Joani 11:25) Kaniti, Jesu u na ni maata ni takazo ya ku kutiseza kwa bupilo batu ba bañata-ñata ba ba shwile mafu a maswe a tahisizwe ki likozi za ka taho. Kana sepiso yeo ki ya mbango? Jesu naa tiisize sepo ya luna ku yena ka ku eza limakazo za ku zusa batu ha naa sa pila fa lifasi. Ze taalu kwa limakazo zeo li ñozwi mwa Bibele.—Mareka 5:38-43; Luka 7:11-15; Joani 11:38-44.

“Mubusi wa lifasi le.” Kreste Jesu u ketilwe ki Mulimu kuli a “[yundise] yena ya na ni maata a ku tahisa lifu, fo kikuli, Diabulosi.” (Maheberu 2:14) Jesu naa zibahalize kuli: “Se li katulo ya lifasi le; cwale mubusi wa lifasi le u ka lundulwa.” (Joani 12:31) Jesu u ka “[sinya] misebezi ya Diabulosi” ka ku felisa kukuezo ya Diabulosi mwa lifasi. (1 Joani 3:8) Mu nahane feela mo ba ka bela batu muta moya wa Diabulosi wa mukwañuli, bumutendasilya, ni buitati u ka feliswa!

[Mbokisi fa likepe 9]

 “Lika Zeo li ka Ezahala Lili?”

Balutiwa ba Jesu ne ba mu buzize kuli: “Lika zeo li ka ezahala lili, mi sisupo sa ku ba teñi kwa hao ni sa maungulelo a muinelo wa lifasi si ka ba sifi?” (Mateu 24:3) Kalabo ya naa file Jesu hamohocwalo ni mañolo a mañwi a tahile ka moya wa Mulimu a naa ñozwi hamulaho wa lifu la hae, li lu bulelela lika ze ne ka ezahala nako ya kuli Mulimu a feze manyando ha ne i ka ba bukaufi. * Ha mu bapanye bupolofita bo bu latelela kwa miinelo ni mikwa ye atile kacenu.

● Lindwa mwa lifasi kaufela—Mateu 24:7; Sinulo 6:4.

● Matala ni matuku—Luka 21:11; Sinulo 6:5-8.

● Ku sinya lifasi—Sinulo 11:18.

● “Ba ba lata masheleñi”—2 Timotea 3:2.

● “Ba ba sa utwi bashemi ba bona”—2 Timotea 3:2.

● “Ba ba lata minyaka ku fita ku lata Mulimu”—2 Timotea 3:4.

Lipaki za Jehova ba ka tabela ku mi tusa ku ziba kuli bupilo bo bu si na manyando se bu li fakaufi. Mu ambole ni Lipaki za Jehova ba mwa silalanda sa mina. Ba ka tabela ku ituta Bibele ni mina mwa ndu ya mina kamba kwa sibaka se siñwi se si swanela.

[Litaluso za kwatasi]