Mwa Ku Itusiseza Meeto A Luna Hande

● Liito la mutu li bupilwe hande hahulu. La buheha, kono hape li na ni maata. Buka ye bizwa Visual Impact, Visual Teaching, i talusa kuli: ‘40 pesenti ya misifa ye na ni liselusi za booko, ili ye swalisanisa lilama za mubili kwa booko, i zwa kwa kalulo ye mwahalaa liito ye bizwa retina.’

Jesu Kreste naa bulezi kuli liito ki “lambi ya mubili.” Ka ku talusa manzwi a hae, naa zwezipili ku bulela kuli: “Haiba liito la hao li talimezi feela nto i liñwi [ku talimela feela nto ye nde], mubili wa hao kaufela u ka ba mwa liseli. Kono haiba liito la hao li talimezi ze maswe, mubili wa hao kaufela u ka ba mwa lififi.” (Mateu 6:22, 23) Jesu ha naa bulela manzwi ao, naa lu hupulisa kuli liito la luna, kamba zona lika ze lu bona, za kona ku ama mo lu nahanela, mo lu ikutwela, ni likezo ze lu eza. Haiba mutu a nahana lika ze nde u ka ba mwa liseli, kono haiba a nahana lika ze maswe u ka ba mwa lififi.

Ka mutala, ha mu bone manzwi a Jesu a fumaneha kwa Mateu 5:28, 29, a li: “Mutu kaufela ya swalelela ku talima musali mi a mu lakaza u se a bukile kale ni yena mwa pilu ya hae. Cwale haiba liito la hao la bulyo la ku sitatalisa, u li kule [ku li kula ka swanisezo].” Ki sika mañi sa naa talusa? Naa talusa kuli ku talimela mutu yo muñwi ka nzila ya ku mu lakaza ku kona ku zusulusa maikuto a maswe aa kona ku tahisa kuli mutu a eze buozwa ni ku foseza Mulimu.—Jakobo 1:14, 15.

Ki hande ku bonisa buiswalo niha ku li taata ku eza cwalo, sina feela ha ku li taata ku kula liito! Kakuli, tusi ki ifi, ya ku palelwa ku fumana bupilo bo bu sa feli ka libaka feela la ku bata ku itabisa ka mizuzu i sikai?

Ze lu bona hape za kona ku lu tahiseza mukwañuli. Kamukwaocwalo, Bibele i lu lemusa kuli “takazo ya meeto [ili takazo ya buitati] . . . ha [i] zwi ku Ndate, kono [i] zwa mwa lifasi. Mi lifasi la fela ni takazo ya lona, kono yena ya eza tato ya Mulimu u ina ku ya ku ile.”—1 Joani 2:16, 17.

Kana Bibele i lu palelwisa feela ku eza lika ze ñwi? Ku tokwa ni hanyinyani! Ha lu sa lateleli likuka za mwa Bibele lu ka tahelwa ki butata mi ha lu na ku ba ni tabo mwa bupilo. (Magalata 6:7, 8) Ku latelela se li bulela Linzwi la Mulimu, ku kopanyeleza cwalo ni kelezo ye nde ya kuli lu tokomele lika ze lu bona, ku ka lu tahiseza tabo. Jesu naa bulezi kuli: “Ba ba fuyauzwi [kamba ba ba na ni tabo] ki ba ba utwa linzwi la Mulimu ni ku li mamela.” (Luka 11:28) Mi sa butokwa ni ku fita kikuli, ba ba latelela ze i bulela Bibele, ba na ni sepo ya ku pila ku ya ku ile fa lifasi, kono ba ba na ni liito le li ba libisa kwa buozwa kamba le li ba tahiseza ku ba ni mukwañuli ha ba na tabo mi ha ba na ku fumana bupilo.