LITABA ZE TUSA MABASI | LINYALO

Mwa ku Swalela yo Muñwi

BUTATA BO BU KONA KU BA TEÑI

Mina ni bakumina ha mu kanana, mu zusanga litaba za kwamulaho, ka ku londoloza mafosisa a naa lukelwa ku tatululwa kale. Kana butata ki bufi? Mwendi yo muñwi ku mina kamba bubeli bwa mina ha mu zibi ku swalela.

Mwa kona ku ituta ku swalela. Kono pili, ha mu nyakisise libaka muuna ni musalaa hae ha ba kona ku fumana taata ku swalelana.

KI KABAKALAÑI HA KU BANGA CWALO?

Ku ba ni maata. Baana kamba basali ba bañwi ha ba swalelangi bakubona ilikuli ba kone ku ba ni maata fahalimwaa bakubona. Ha ba shelana ni bakubona ba itusisanga litaba ze ne ezahezi kwamulaho ku zamaisa bakubona.

Ndimbelela. Fokuñwi, ku kona ku nga nako ye telele kuli mu libale mafosisa. Yo muñwi mwa linyalo u kona ku bulela kuli ‘Ni mi swalezi’ kono inze a sa na ni ndimbelela mwa pilu—mane mwendi ni ku lela ku yolisa misuha.

Ku zwafa. Ba bañwi ba kenanga mwa linyalo inze ba ikolwisize kuli bupilo bwa mwa linyalo bu ka ba bo bu si na matata. Kamukwaocwalo, ha ba sa lumelelani ni bakubona mwa taba ye ñwi, ba ñañelelanga muhupulo wa bona ni ku komoka kuli mutu ye ne ba nahana kuli ba ka lumelelana hahulu ni yena wa kona ku ba ni mubonelo o shutana hahulu ni wa bona. Ku libelela lika ze sa konahali mwa linyalo ku kona ku tahisa kuli mutu a bonange hahulu mafosisa, ni ku fumana taata ku swalela.

Ku sa utwisisa. Buñata bwa batu ba ba nyalani ha ba swalelanangi kabakala ku sa utwisisa ze ku talusa ku swalela. Ka mutala, ba kana ba nga kuli:

Haiba ni swalela, ni ka keshebisa mafosisa a ezizwe.

Haiba ni swalela, ni na ni ku libala ze ne ezahalile.

Haiba ni swalela, ni ka tahisa kuli ni fosezwe hape.

Niti kikuli, lika ze talusizwe fahalimu haki zona ze talusa ku swalela. Nihakulicwalo, ku swalela ku kona ku ba taata—sihulu mwahalaa balikani ba batuna sina cwalo bo mutu ni musalaa hae.

 ZE MU KONA KU EZA

Mu utwisise ze ku talusa ku swalela. Mwa Bibele, fokuñwi pulelo ya “ku swalela” i talusa “ku tuhelela.” Kamukwaocwalo, ku swalela ha ku talusi ku libala ze ne ezahalile kamba ku nyinyafaza bufosi bo ne bu ezizwe. Fokuñwi ku talusa ku tuhelela feela taba ilikuli mu kone ku ba ni buiketo bo bunde ni ku sileleza linyalo la mina.

Mu lemuhe ze zwa mwa ku sa swalela. Licaziba ba bañwi ba bulela kuli ku ba ni ndimbelela ku kona ku tahisa matata a shutana-shutana a kwa mubili ni mwa munahano, hamohocwalo ni ku lembwala ni butuku bwa BP—mane ni ku sinya linyalo la mina. Kwa utwahala Bibele ha i bulela kuli: “Mu ezane ka sishemo, mu be ni mukekecima yo muñwi ku yo muñwi, mu nze mu swalelana ka pilu kaufela.”—Maefese 4:32.

Mu lemuhe bunde bwa ku swalela. Moya wa ku swalelana u ka tusa mina ni bakumina ku sepana ni ku sa nahananga kuli bakumina ba na ni milelo ye maswe mi ha mu na ku bulukanga ndimbelela mwa pilu. Mi ku eza cwalo ku ka mi tusa ku sa buluka ndimbelela mwa pilu ha mu foselizwe, mi lilato la mina li ka hula.—Sikuka sa Bibele: Makolose 3:13.

Mu nge lika ka mo li inezi. Ku bunolo ku swalela haiba mu nga bakumina ka mo ba inezi ku si na taba ni mifokolo ya bona. Buka ye bizwa Fighting for Your Marriage i bulela kuli: “Haiba mu isa feela mamelelo kwa lika ze ne mu si ka ezezwa, ku ka mi bela bunolo ku libala lika kaufela ze ne mu ezelizwe. Ka nako ya cwale, ne mu ka tabela ku isa pilu kwañi, kwa lika ze ne mu ezelizwe kamba ze ne mu si ka ezezwa?” Mu hupule kuli ha ku na mutu ya petahalile—nihaiba mina.—Sikuka sa Bibele: Jakobo 3:2.

Mu be ni kutwisiso. Nako ye tatama ha mu ka fosezwa ki bakumina mwa lipulelo kamba ka likezo za bona, mu ipuze kuli: ‘Kana ye, ki taba ye tuna luli? Kana ni tokwa kuli bakuluna ba kupe swalelo, kamba kana na kona ku libala feela ka za teñi?’—Sikuka sa Bibele: 1 Pitrosi 4:8.

Mu ambolisane haiba mu tokwa ku eza cwalo. Ka ku wisa pilu, mu taluse ze mi nyemisize ni libaka ha li mi nyemisize. Mu si ke mwa nahana kuli bakumina ne ba eza cwalo ka milelo ye maswe mi mu si itusisi lipulelo ze bonisa kuli ze mu bulela mina ki zona ze lukile, kakuli ku eza cwalo ku ka tahisa kuli ba kale ku ikemela. Kono mu ba bulelele feela mo li mi amezi likezo za bona.

[Mbokisi fa likepe 11]

MAÑOLO A BUTOKWA

“Mu zwelepili ku tuhelelana ni ku swalelana ka pilu kaufela mutu ni kwa na ni libaka la ku tongoka yo muñwi.”—Makolose 3:13.

“Kaufelaa luna lwa sitatalanga hañata.”—Jakobo 3:2.

“Lilato li kwahela libi ze ñata.”—1 Pitrosi 4:8.

[Mbokisi fa likepe 11]

HA MU TOKWA KU KUPA SWALELO

Haiba mu utwisize bakumina pilu butuku ka mukwa o muñwi, mu ikupele swalelo ku zwelela kwatasaa pilu. Niha mu sa lumelelani ni mubonelo wa bakumina fa taba yeo, mwa kona ku ba kupa kuli ba mi swalele kabakala ze ne mu ezize ze tahisize kuli ba utwe pilu butuku. Haiba mu eza ka taata ku sa kutela mafosisa a ne mu ezize, bakumina ba ka kolwa kuli ne mu kupile swalelo ha buniti.