Katengo ka Silikani sa Linaha za Lifasi (United Nations) kasweli kususueza batu kaufela mwa lifasi kuli baswalisane, bakuteke litukelo za batu, ni kuli bababalele hande lifasi. Ki kabakalañi katengo kao hakasweli kususueza batu kueza lika zeo kaufela? Caziba wa libizo la Maher Nasser naabulezi cwana mwa mutende wa UN Chronicle, “Litaba zecwale ka kucinca kwa mayemo a lihalimu, likwata za likebenga, kusa likanelela mwa mupilelo wa batu, lindwa zesafeli, kuekezeha kwa palo ya batu babasweli kubaleha mwa linaha zabona, bukwenuheli bobusweli kuezahala mwa lipuso za linaha, ni matuku amañata ayambukela” lisweli zaezahala mwa lifasi kaufela.

Batu babañwi mane basweli kuzibahaza muhupulo wa kuli kambe lifasi libusiwa ki mutu alimuñwi. Batu babañwi bane babile ni muhupulo oswana ni wo, ki caziba mwa litaba za litoko wa kwa naha ya Italy, ili yanaazibahala hahulu mwa litaba za lipolitiki wa libizo la Dante (yanaapilile kuzwa 1265 kuisa 1321) ni caziba wa za sayansi yabizwa Albert Einstein (yanaapilile kuzwa 1879 kuisa 1955). Dante naalumela kuli kozo haina feela kuba teñi kakuli lifasi lialuhani ka lipuso za lipolitiki. Caziba yo mane naabulezi manzwi anaabulezi Jesu Kreste ali: “Mubuso kaufela okauhani kuitwanisa washandauka.”—Luka 11:17.

Nakonyana hamulaho wa Ndwa ya Lifasi Yabubeli, ili fo limbomba zepeli za atomiki nelitunyisizwe, Albert Einstein naañolezi ba Katengo ka Silikani sa Linaha za Lifasi (United Nations) mi liñolo leo nelihatisizwe mwa mitende kaufela. Caziba yo naabulezi kuli: “Ba Katengo ka Silikani sa Linaha za Lifasi (United Nations) baswanela kuunga muhato kapili-pili ka kueza mobakonela kaufela kuli kube ni mubuso ulimuñwi okabusa lifasi kaufela.”

Kono kana lwakona kuba ni buikolwiso bwa kuli babusi babakabusa mubuso ocwalo bakasepahala, kupeta hande musebezi, ni kusa hatelela babañwi? Kamba kana bakapalelwa kubusa sina mobapalelezwi babañwi kaufela kubusa hande? Lipuzo zeo liluhupulisa manzwi anabulezi caziba wa litaba za kwa kale wa kwa naha ya Britain yabizwa Lord Acton, yanaabulezi kuli: “Maata asinya mi maata amatuna hahulu asinya kufeleleza.”

Nihakulicwalo, luswanela ku swalisana kuli lukone kuba ni kozo ya niti. Kono lukona kueza cwañi cwalo? Kana kwakonahala luli kuba ni kozo ni swalisano? Bibele ibonisa kuli kwakonahala luli. Kozo ni swalisano likaba teñi kwapili. Likabateñi ka mukwa ufi? Kozo ni swalisano halikoni feela kuba teñi, lifasi nihalika busiwa ki mutu alimuñwi, kakuli batu habasepahali. Kono kozo ni swalisano, likatahiswa ki mubuso watomile Mulimu. Mi mane, Mulimu ukaitusisa tukelo yahae ya kubusa batu ka Mubuso wahae. Mubuso wo ki nto mañi? Bibele ibiza mubuso wo kuli ki “Mubuso wa Mulimu.”—Luka 4:43.

Jesu Kreste naanahana ka za Mubuso wa Mulimu hanaabulezi mwa tapelo yahae yeli mutala kuli: “Mubuso wahao utahe. Tato yahao iezwe fa lifasi.” (Mateu 6:9, 10) Ka niti, Mubuso wa Mulimu ukatahisa kuli tato ya Mulimu iezwe fa lifasi, isiñi tato ya batu babaitusisa maswe maata a kubusa ni babaipatela zabona feela.

Hape Mubuso wa Mulimu ubizwa kuli ki “Mubuso wa mahalimu.” (Mateu 5:3) Ki kabakalañi haubizwa hape cwalo? Nihaike kuli Mubuso wa Mulimu ukabusa lifasi, hauna kubuseza fa lifasi kono ukabusa kuzwelela kwa lihalimu. Munahane feela zeitalusa taba yeo. Mubuso wo hauna kutokwa masheleñi kwa batu inge cwalo ka kubatelisa. Taba yeo ikaimulula luli batu babaka busiwa ki mubuso wo!

Sina molitalusezwa linzwi le la “mubuso,” Mubuso  wa Mulimu wona ki mulonga wa silena. Mulena wa Mubuso wo ki Jesu Kreste ili yanaafilwe maata akubusa ki Mulimu. Bibele ibulela cwana ka za Jesu:

• “Mi puso ikaba fa liheta lahae . . . Puso yahae ikazwelapili mi kozo haina kufela.”—Isaya 9:6, 7.

• “Afiwa bulena, likute, ni mubuso, kuli batu kaufela, macaba kaufela, ni ba lipuo kaufela bamusebeleze. Bulena bwahae ki . . . bobusike bwafela.”—Daniele 7:14.

• “Mubuso wa lifasi ufetuhile Mubuso wa Mulenaa [Mulimu wa] luna ni wa Kreste wahae.”—Sinulo 11:15.

Ka kutaleleza tapelo yeli mutala ya Jesu, Mubuso wa Mulimu ukapeta tato ya Mulimu ka kutala fa lifasi. Mwa Mubuso wa Mulimu, batu kaufela bakaituta mwakubabalela lifasi kuli libe lihae lelinde mi hape batu ni zepila kaufela baka ikola kupila mwateñi.

Hape, Mubuso wa Mulimu ukaluta babaka busiwa ki ona. Batu kaufela bakalutiwa likuka zeswana, mi kaufela bona bakaswalisana. Liñolo la Isaya 11:9 libulela kuli: “Habana kutahisa kozi ifi kamba ifi kamba kutahisa sinyeho . . . kakuli lifasi likatala zibo ya Jehova sina mezi mwakwahelezi liwate.”

Mwa Mubuso wo batu mwa lifasi kaufela bakaswalisana ni kuba ni kozo mwahalaa bona, ili nto yebapalezwi kueza ba Katengo ka Silikani sa Linaha za Lifasi (United Nations). Liñolo la Samu 37:11 libulela kuli: “Bakataba hahulu kabakala kozo yetuna.” Ka nako yeo, mwa makande aluna halusana kuambola litaba zecwale ka za “bukebenga,” “kusinyeha kwa lifasi,” “bubotana,” ni “lindwa.” Kono lika zeo kaufela likaezahala lili? Mubuso wa Mulimu ukakalisa lili kubusa lifasi kaufela? Mubuso wo ukabusa cwañi lifasi? Ki limbuyoti mañi zemuka amuhela mubuso wo hauka kalisa kubusa? Halunyakisiseñi lipuzo zeo.