Kuli mukone kuambolisananga hande ni bana bamina, mina ni bana bamina muswanela kubulelanga momuikutwela ni momunahanela.

Hañata kuambolisana ni bana bamina babasa nonoboka kubanga taata. Bana bamina hane basali babanyinyani, nebamibulelelanga lika kaufela. Kono cwale hase banonobokile, habasaambolanga hahulu ni mina, mi hamuzibi zebanahana ni mobaikutwela. Kuswana feela inge kuli bana bamina bayemi kwa lineku leliñwi la nuka yetuna mi mina muyemi ku leliñwi. Bana bamina niha babonahala kuli habatabeli kuambola ni mina, muhupulange kuli yeo ki yona nako luli yemutokwa kuambolanga ni bona!

Muitukiseze kuambola ni mwanaa mina ka nako ifi kamba ifi. Muambolange ni bana bamina nihaikaba kuli mwendi seli busihu hahulu.

“Ka kuba bashemi, mwendi mukabata kubulela kuli, ‘Neuli kai lizazi kaufela, haubata kuambola ni na nako ye!’ Kono kana lwaswanela kubilaela bana baluna hababata kulukuluha kuambola ni luna? Kana haki zona zabata mushemi ni mushemi kuli bana bahae balukuluhange kuambola ni yena?”—Bo Lisa.

“Nitabela kulobala kapili, kono nilemuhile kuli bana baka babasa nonoboka baikutwanga kulukuluha kuambola ni na ka nako ya busihu luli.”—Bo Herbert.

SIKUKA SA MWA BIBELE: “Mutu ni mutu asike aipatela sesiswanela yena anosi, kono abate sesiswanela yomuñwi.”—1 Makorinte 10:24.

Musike mwayembululwa ki lika zeñwi. Ndate yomuñwi uitumelela kuli: “Fokuñwi ninahananga lika lisili ka nako yebaambola ni na bana baka. Mi bazibanga kuli kunani zenisweli kunahana mi haniteelezi ku zebabulela!”

Haiba ni mina kona momuezezanga cwalo, mwakona kutimanga TV kamba lipangaliko zeñwi. Muise pilu ku zamibulelela mwanaa mina mi mubonise kuli taba yabulela ki ya butokwa kusina taba kuli mwendi ibonahala kuba yenyinyani.

“Luswanela kukolwisa bana baluna kuli lwaitebuha maikuto abona. Haiba bana baluna balemuha kuli haluisi pilu kwa maikuto abona, habana kulutaluseza mobaikutwela mi bakayo taluseza batu basili.”—Bo Maranda.

“Musike mwaakufa kuhalifa niha mulemuha kuli zabulela mwanaa mina lifosahalile.”—Bo Anthony.

SIKUKA SA MWA BIBELE: “Mutokomele momuteeleleza.”—Luka 8:18.

Muambolisanange ni bana bamina hamunze mueza misebezi yemiñwi. Fokuñwi banana bakona kuikutwa kulukuluha kuambola ni mina hamunze mueza misebezi yemiñwi.

“Luambolanga ni bana baluna haluli mwa mota mi nto yeo ilutusize kuambolisananga hande.”—Bo Nicole.

Hape bashemi bakona kuambola ni bana babona ka nako ya kuca.

“Ka nako ya mulalelo, mañi ni mañi ukandekanga lika zende ni zemaswe zeezahalile mwa lizazi leo. Mukwa wo utahisa kuli luswalisane ni kuhupulanga kuli halukopana ni butata, lukatusananga.”—Bo Robin.

SIKUKA SA MWA BIBELE: “Ulukela kuba yaakufa kuteeleza, yasaakufi kubulela.”—Jakobo 1:19.