KWA BASHEMI
6: Kukalimela
ZEKUTALUSA KUKALIMELA
Kukalimela kukona kutalusa kuetelela kamba kuluta. Hape kukona kutalusa kusikulula mwana kuli atuhele mikwa yahae yemaswe. Kono hañata kukalimela kukopanyeleza kutusa mwana kuli aitute mwakuezezanga likatulo zende.
LIBAKA HAMUTOKWA KUEZA CWALO
Mwa lilimo za cwanoñu fa, bashemi babañwi batuhezi kukalimela bana babona, ka kusaba kuli kueza cwalo kukatahisa kuli bana babona baikutwe kuli haki ba butokwa. Nihakulicwalo, bashemi bababutali bona batomezi bana babona milao yebunolo kuilatelela mi balutile bana babona mobakona kulatelelela milao yeo.
“Bana baswanela kutalusezwanga ki bashemi babona zebaswanela kueza ni zebasa swaneli kueza kuli kwapili bayo ba batu babande. Haiba bana habakalimelwi, bakaezanga likatulo zemaswe mi zekazwa mwateñi likaba zemaswe luli.”—Bo Pamela.
ZEMUKONA KUEZA
Musike mwacinca-cinca. Haiba mwanaa mina halateleli milao yemutomile fa lapa, mumufe koto yene mumusepisize. Kono haiba mwanaa mina ulatelezi milao yemutomile, mumubabaze.
“Nibabazanga bana baka habaniutwa, kakuli mwa lifasi le ki babanyinyani bana babautwa bashemi babona. Kubabaza bana baka kutahisanga kuli kubabele bunolo kuniutwa hanibakalimela.”—Bo Christine.
SIKUKA SA MWA BIBELE: “Kaufela sacala mutu, ki sona hape sakakutula”—Magalata 6:7.
Mube ni kutwisiso. Hamukalimela mwanaa mina, munyakisise lika zecwale ka za fakuma, buikoneli bwahae, ni fakuma mafosisa aezize. Hañata ki kokunde kufa mwanaa mina koto kulikana ni mafosisa aezize. Ka mutala, haiba mwanaa mina haitusisi hande foni, mwakona kumuamuha foni yeo kamba kumufa milao ya mwakaitusisezanga yona hande. Kono muambuke kunyemanga haiba mwanaa mina uezize feela mafosisa amanyinyani.
“Nilikanga kubatisisa kuli nizibe haiba mwanaka uezize mafosisa ka kulela kamba ka kusalela. Haiba mwanaa mina saanani mukwa wa kuezanga mafosisa, muswanela kumutusa kuli atuhele kuezanga mafosisa ao, kono haiba ki mafosisa atokwa feela kuhakululwa, mumukalimele.”—Bo Wendell.
SIKUKA SA MWA BIBELE: “Musike mwanyemisa bana bamina, kuli basike bazwafa.”—Makolose 3:21; litaluso ze kwatasi.
Mubonise lilato. Kubunolo kwa bana bamina kuamuhela kalimelo yemubafa haiba balemuha kuli mueza cwalo kabakala kuli mwabalata.
“Mwanaa luna wamushimani hanaaezanga mafosisa, neluitumelanga ku yena kabakala likatulo zende zanaaezize kwamulaho. Nelumubulelelanga kuli mafosisa anaaezize naasike amubisa mutu yamaswe haiba feela naakaeza licinceho, mi nelumubulelelanga kuli neluka mutusa kueza cwalo.”—Bo Daniel.
SIKUKA SA MWA BIBELE: “Lilato linani pilu-telele ni sishemo.”—1 Makorinte 13:4.
Hape Mwendi Mwakona Kutabela Litaba Ze
TAWALA YA MULIBELELI
Mu Swanela ku Kalimela Cwañi Bana ba Mina?
Bibele i talusa lika ze taalu ze tusa mwa ku fa kalimelo ye sebeza.
MUZUHE!
Ki Sikamañi Sesiezahezi Kwa Kalimelo?
Kana cinceho yene kalile ka 1960, isa kona kuama bashemi ni kacenu?
MUZUHE!
Mo mu Kona ku Kalimela Mwanaa Mina ya sa Nonoboka
Ku kalimela ku talusa ku luta. Likuka za Bibele za kona ku mi tusa ku luta mwanaa mina ya sa nonoboka ku mi utwa ku fita ku ba muipanguli.
