BUÑATA bwa lifolofolo zepila mwa mawate mokunani mezi abata hahulu, linani mukita omutuna wa mafula mwatasaa litalo zazona ili olitusa kufutumalelwa. Mbao ya mwa liwate yona iitusisanga boya bwayona bobutitihani hahulu kuli ifutumalelwe.

Munyakisise taba ye: Mbao ya mwa liwate inani boya bobutitihani hahulu kufita folofolo ifi kamba ifi ya mwa mezi. Mbao hainze itapa, boya bwayona buhohanga moya oli bukaufi ni mubili wayona. Moya wo utibelanga mezi abata kuli asike afita fa litalo la folofolo yeo ilikuli folofolo yeo izwelepili kufutumalelwa.

Ba sayansi balumela kuli batu bakona kuituta sesiñwi kwa boya bwa mbao ya mwa liwate. Balikile kupanga liapalo za silami ka kuitusisa bwanda bobuswana inge boya, ka kulika kutitihanisa bwanda bo ni kuitusisa bwanda bobutelele. Babatisisi balemuhile kuli “haiba kuli bwanda butitihani mi ki bobutelele, bwanda bo bukatibela silami kamba bukatibela hahulu mezi kukena.” Ka mubulelelo omuñwi, limbao za mwa liwate zona halitokwi siapalo sa silami, kakuli linani kale boya bobutitihani hahulu ili bobulitusa kufutumalelwa.

Babatisisi banani sepo ya kuli lituto zabona likabatusa kueza zwelopili mwa kupanga masila atibela mezi kukena fa mubili. Taba yeo ikona kutahisa kuli babañwi banahane kuli batu babatulelanga mwa mawate mokunani mezi abata, bakona kutina feela liapalo zenani bwanda bobuswana ni boya bwa mbao ya mwa liwate!

Mubona cwañi? Kana boya bobutusa mbao ya mwa liwate kufutumalelwa, nebuitahezi feela ka kuipilaula? Kamba kana nebuezizwe ki Mubupi?