Kana ba sayansi bakona kutalusa mone likalezi lika ze mwa lihalimu ni fa lifasi? Batili. Batu babañwi babulelanga kuli ba sayansi bababatisisanga ka za lika ze mwa lihalimu ni fa lifasi bakona kutalusa mone likalezi lika zeo. Nihakulicwalo, caziba yaitutile za linaleli yabizwa Marcelo Gleiser, wa fa Sikolo Sesipahami sa Dartmouth, yalumela kuli hakukonahali kuziba haiba Mulimu uteñi kamba haayo, naabulezi kuli: “Lupalezwi kutalusa mone likalezi lika ze mwa lihalimu ni fa lifasi.”

Ka kuswana, taba yeñwi ya mwa magazini yebizwa Science News neibulezi cwana ka za makalelo a bupilo: “Kukona kuba taata kutalusa hande mone bukalezi bupilo fa lifasi: Buñata bwa macwe akona kulutusa kuziba hande zeneezahezi ka nako yene likalile kuba teñi lifasi haasaliyo.” Litaba zeo zakona kulutusa kuutwisisa kuli ba sayansi bapalezwi kualaba puzo yeli, Lika ze mwa lihalimu ni fa lifasi ni bupilo nelikalile cwañi?

Kono mwakona kuipuza kuli, ‘Haiba lika zepila fa lifasi nelibupilwe, ki mañi yanalibupile?’ Hape mwakona kubuza lipuzo zelatelela: ‘Haiba kunani Mubupi ya lilato ni ya butali, ki kabakalañi hakona kutuhelela batu babupile inze banyanda? Ki kabakalañi hakona kutuhelela kuli kube ni bulapeli bobushutana-shutana? Ki kabakalañi batu babaipapata kumulapela habaezanga lika zemaswe?’

Halukoni kufumana likalabo kwa lipuzo zeo mwa litaba za sayansi. Kono fo hakutalusi kuli halukoni kufumana likalabo zekolwisa. Batu babañata mane sebafumani likalabo zekolwisa mwa Bibele.

Haiba mubata kuziba libaka ba sayansi babañwi babaitutile litaba za mwa Bibele habalumela kuli kunani Mubupi, muye fa jw.org. Mubate taba yeli, “zebabulela babañwi ka za mone bukalezi bupilo.”