1. Ka kuya ka Mateu 7:13, 14, ki kabakalañi halukona kubulela kuli lu mwa musipili?

KAUFELAA luna lu mwa musipili. Lubata kukena mwa lifasi lelinca lelika busiwa ki Jehova ka nzila yelilato. Zazi ni zazi, lulikanga kuzamaya mwa nzila yelibisa kwa bupilo bobusa feli. Kono sina mwanaataluselize Jesu, nzila yeo ki yesisani mi fokuñwi kutaata kuzwelapili kuzamaya ku yona. (Mubale Mateu 7:13, 14.) Bakeñisa kuli halusika petahala, kukona kulubela bunolo kutuhela kuzamaya mwa nzila yeo.—Magal. 6:1.

2. Lukanyakisisañi mwa taba ye? (Mubone ni mbokisi yeli, “ Kuba ni Buikokobezo Kuka Lutusa Kueza Licinceho.”)

² Haiba lubata kuzwelapili kuzamaya mwa nzila yesisani yelibisa kwa bupilo, luswanela kutabela kueza licinceho ka za lika zelunahana, mubonelo waluna, ni likezo zaluna. Muapositola Paulusi naasusuelize Bakreste ba mwa Korinte kuli bazwelepili ‘kuba babasikululwa.’ (2 Makor. 13:11) Kelezo yeo yakona kulutusa ni luna kacenu. Mwa taba ye, lukanyakisisa mo Bibele ikona kulutuseza kueza licinceho ni mo balikani babatiile kwa moya bakona kulutuseza kuzwelapili kuzamaya mwa nzila yelibisa kwa bupilo. Kuzwa fo, lukanyakisisa zekona kutahisa kuli kulubele taata kulatelela ketelelo yelufiwa ki kopano ya Jehova. Mi hape lukabona mo kuba ni buikokobezo kukona kulutuseza kueza licinceho kusina kufelelwa ki tabo halunze lusebeleza Jehova.

3. Linzwi la Mulimu likona kumitusa cwañi?

³ Haki nto yebunolo kutatuba minahano ni maikuto aluna. Kabakalañi? Kakuli pilu yapuma; kacwalo kukona kulubela taata kuziba zeikona kutahisa kuli lueze. (Jer. 17:9) Kukona kulubela bunolo kuipuma ka “mihupulo ya buhata.” (Jak. 1:22) Kacwalo, luswanela kuitusisa Linzwi la Mulimu kuli luitatube ni kulemuha “mihupulo ni milelo” ya mwa lipilu zaluna. (Maheb. 4:12, 13) Bibele  ilutusa kuziba lika zene lusika lemuha, sina feela mushini wa X-ray haukona kulutusa kubona lika zene lusike lwabona ka meeto aluna. Kono lutokwa kuba ni buikokobezo kuli lutusiwe ki kelezo yefumaneha mwa Bibele kamba yezwa kwa mizwale babaetelela.

4. Ki lika mañi zebonisa kuli Mulena Saule naakalile kuba ni buikuhumuso?

⁴ Mutala wa Mulena Saule, ulutusa kuziba zekona kuezahala haiba lupalelwa kuba ni buikokobezo. Saule naakalisize kuikuhumusa hahulu kuli mane naapalezwi kulemuha kuli naatokwa kucinca munahano ni likezo zahae. (Samu 36:1, 2; Hab. 2:4) Ka mutala, Jehova naafile Saule taelo yenongile yenebonisa zanaaswanela kueza hamulaho wa kutula Maamaleke. Niteñi, Saule naasika mamela taelo ya Jehova. Mi mupolofita Samuele hanaa muatumezi ni kumutaluseza za taba yeo, Saule naasika itumelela mafosisa ahae. Kono naaicemezi ni kubonisa inge kuli taba yeo nesi nto yetuna, mi hape naafile batu mulatu. (1 Sam. 15:13-24) Kwamulaho, Saule hape naaezize nto yeswana. (1 Sam. 13:10-14) Ka bumai, naatuhelezi pilu yahae kuikankabeka. Naasika cinca mubonelo wahae; kacwalo, Jehova amunyaza mi amuhana.

5. Mutala wa Saule ululutañi?

⁵ Kuli lusike lwaeza mafosisa aswana ni anaaezize Saule, luswanela kuipuza lipuzo ze: ‘Kana nalikanga kusebelisa kelezo ya mwa Linzwi la Mulimu kamba nifanga mabaka a kusaisebelisa? Kana nanyinyafazanga mafosisa aka? Kana nifanga babañwi mulatu kabakala likezo zaka?’ Haiba lualaba kuli eni ku yeñwi ya lipuzo zeo, uzibe lutokwa kucinca munahano ni mubonelo waluna. Hakusicwalo, lwakona kukala kuikankabeka mi haluna kuba balikani ba Jehova.—Jak. 4:6.

6. Mutaluse shutano ye mwahalaa Mulena Saule ni Mulena Davida.

⁶ Mulemuhe shutano ye mwahalaa Mulena Saule ni Mulena Davida, yena yanaa muyolile fa bulena, ili muuna yanaalata “mulao wa Jehova.” (Samu 1:1-3) Davida naaziba kuli Jehova upilisa babaikokobeza kono utoile babaikuhumusa. (2 Sam. 22:28) Kacwalo, Davida naatuhelezi mulao wa Mulimu kucinca munahanelo wahae. Naañozi kuli: “Nikalumbeka Jehova, yanifile kelezo. Nihaiba busihu, mihupulo yaka yetibile yanihakulula.”—Samu 16:7.

7. Ki nto mañi yeluka eza haiba lwaikokobeza?

⁷ Haiba lwaikokobeza, lukatuhelela Linzwi la Mulimu kuluhakulula haluba ni minahano yefosahalile mi haluna kueza lika zemaswe. Linzwi la Mulimu likaswana sina linzwi lelilubulelela kuli: “Nzila ki yona ye. Muzamaye ku yona.” Lika lulemusa halubata kueza nto yeñwi yemaswe. (Isa. 30:21) Haiba luteeleza ku Jehova, lukatusiwa mwa linzila zeñata. (Isa. 48:17) Ka mutala, haluna kutokwa kuhakululwa ki mutu yomuñwi, ili nto yekona kutahisa kuli luikutwe maswabi. Mi lukasutelela hahulu ku Jehova bakeñisa kuli lwaziba kuli waluisa pilu sina Ndate yalilato.—Maheb. 12:7.

8. Sina mokuboniselizwe kwa Jakobo 1:22-25, lukona kuitusisa cwañi Linzwi la Mulimu sina siiponi?

⁸ Linzwi la Mulimu liswana sina siiponi. (Mubale Jakobo 1:22-25.) Buñata bwaluna lwaiponanga mwa siiponi pili lusika zwa kale fa lapa. Kueza cwalo kulutusa kuziba haiba lutokwa kueza licinceho pili batu babañwi basika lubona kale. Ka mukwa oswana, haiba lubala Bibele zazi ni zazi, lukalemuha lika zeluswanela kueza kuli lucince munahanelo waluna ni mubonelo waluna. Babañata balemuhile kuli kwatusa kubala liñolo la zazi kakusasana zazi ni zazi pili basika zwa kale fa lapa. Kueza cwalo kubatusa kuba ni mihupulo yeminde habanze banahanisisa litaba zebabalile. Mi mwahalaa lizazi kaufela, bakabata kuziba mobakona kusebeliseza kelezo ye mwa Linzwi la Mulimu. Hape luswanela kuba ni tomahanyo ya kubala Linzwi la Mulimu zazi ni zazi ni kunahanisisa zelubala. Kubala Bibele zazi ni zazi kukona kubonahala inge kuli hakutusi, kono mane kueza cwalo ki yeñwi ya lika za  butokwa hahulu zeluswanela kueza kuli luzwelepili kuzamaya mwa nzila yesisani yelibisa kwa bupilo.

9. Ki lika mañi zekona kutahisa kuli mulikanaa luna alusikulule?

⁹ Kana mukile mwaeza nto yeñwi yenetahisize kuli silikani samina ni Jehova sikale kusinyeha? (Samu 73:2, 3) Haiba mulikani yatiile kwa moya naamisikuluzi, kana nemuteelelize ku yena ni kusebelisa kelezo yahae? Haiba ki cwalo, uzibe nemuezize hande, mi kusina kukakanya, muitebuha hahulu kuli mulikanaa mina naamifile kelezo.—Liprov. 1:5.

10. Muswanela kuezañi haiba mulikanaa mina amifa kalimelo?

¹⁰ Linzwi la Mulimu lilutaluseza kuli: “Litombo zetahiswa ki mulikani zasepahala.” (Liprov. 27:6) Taba yeo italusañi? Halunyakisiseñi mutala wo: Luungeñi kuli mubata kutula mukwakwa opatehile hahulu, mi ka nako yeswana, muyauluzwi ki luwaile lwamina. Mukala kutula mukwakwa musatalimeli komuya. Mi honafo feela mulikanaa mina umiswala kwa lizoho ni kumihohela kwamulaho. Umilambezi kwa lizoho kuli mane muutwa butuku, kono muhato waangile kapili-pili wo utusize kuli musike mwahatiwa ki mota. Nihaike kuli sekufitile mazazi asikai mi musautwa butuku bakeñisa kuli mulikanaa mina naamisweli ka taata, kana muka munyemela kabakala kuli naamiutwisize butuku kwa lizoho? Batili! Mukaitumela hahulu kabakala kuli umitusize. Ka mukwa oswana, haiba mulikanaa mina amilemusa kuli lipulelo zamina kamba likezo zamina halilumelelani ni likuka za Mulimu zelukile, mwendi kwa makalelo mukaikutwa bumaswe. Kono hamuna kumunyemela bakeñisa kuli umifile kalimelo. Kueza cwalo ki butoto. (Muek. 7:9) Muitebuhe kuli mulikanaa mina ubile ni bundume bwa kumiatumela ni kumitaluseza ka za teñi.

11. Ki nto mañi yekona kutahisa kuli mutu ahane kelezo yende ya mulikani?

¹¹ Ki nto mañi yekona kutahisa kuli mutu ahane kelezo yende ya mulikanaa hae yalilato? Ki buikuhumuso. Batu babaikuhumusa batabela ‘kubulelelwa zebalata kuutwa mwa mazebe abona. Bahana kuteeleza kwa niti.’ (2 Tim. 4:3, 4) Baikutwa kuli habatokwi kufiwa kelezo bakeñisa kuli banahana kuli baziba hahulu litaba zeñata, mi ki ba butokwa hahulu kufita babañwi. Nihakulicwalo, muapositola Paulusi naañozi kuli: “Haiba mutu anahana kuli ki wa butokwa kono yena haki sesiñwi, waipuma.” (Magal. 6:3) Mulena Salumoni naatalusize hande taba yeo. Naañozi kuli: “Mwana wa mubotana yanani butali ufita mulena yahulile yali sitoto, yasaatokwile ngana ya kumamela temuso.”—Muek. 4:13.

12. Luitutañi kwa mutala wa muapositola Pitrosi, sina mokuboniselizwe kwa liñolo la Magalata 2:11-14?

¹² Halunyakisiseñi zanaaezize muapositola Pitrosi hanaahakuluzwi ki muapositola Paulusi fapilaa nyangela. (Mubale Magalata 2:11-14.) Pitrosi naakona kunyemela Paulusi mi naakona kuhana kuamuhela kelezo yahae bakeñisa litaba zanaabulezi, ni kuli naamuhakululezi fapilaa nyangela. Kono Pitrosi naabonisize kuli naanani butali. Naaamuhezi kelezo, mi naasika bulukela Paulusi sikoto kwa pilu. Kono hamulaho wa nako, naabulezi kuli Paulusi ki ‘muzwale yalatwa.’—2 Pit. 3:15.

13. Ki lika mañi zeluswanela kunyakisisa halubata kukalimela mutu?

¹³ Haiba muikutwa kuli mutokwa kukalimela mulikanaa mina, ki lika mañi zemuswanela kunyakisisa? Pili musika atumela kale mulikanaa mina, muipuze kuli: ‘Kana niipona kuba “yalukile kufiteleza”?’ (Muek. 7:16) Mutu yaiponahalisa kuba yalukile hahulu uatula babañwi ka kuitusisa likuka zahae isiñi likuka za Jehova, mi ukona kusashwela babañwi makeke. Haiba hamulaho wa kuitatuba, musaikutwa kuli muswanela kukalimela mulikanaa mina, mumutaluseze butata bomulemuhile mi muitusise  lipuzo kuli mumutuse kulemuha mafosisa aezize. Mubone teñi kuli litaba zemubulela litomile fa Mañolo, inze muhupula kuli mulikanaa mina ukaikalabela ku Jehova, isiñi ku mina. (Maro. 14:10) Muitinge fa butali bobufumaneha mwa Linzwi la Mulimu, mi hamueleza mutu yomuñwi, mulikanyise mukekecima wa Jesu. (Liprov. 3:5; Mat. 12:20) Kabakalañi? Kabakala kuli Jehova uka lueza sina moluezeza babañwi.—Jak. 2:13.

14. Kopano ya Mulimu ilulukisezangañi?

¹⁴ Jehova uluetelela mwa nzila yelibisa kwa bupilo ka kuitusisa kalulo ya kopano yahae ya fa lifasi, mi kopano ilulukisezanga mavidio, lihatiso, ni mikopano ilikuli kaufelaa luna lusebelise kelezo yefumaneha mwa Linzwi la Mulimu. Litaba zeo litomile fa Mañolo. Ba Sitopa Sesietelela bakupanga ketelelo ya moya okenile habaeza likatulo za mwakupetela hande musebezi wa kukutaza. Niteñi, kamita banyakisisanga likatulo zebaezize kuli bazibe haiba kunani licinceho zetokwa kuezwa. Kabakalañi? Kabakala kuli “mukwa wa lifasi le wacinca,” mi kopano ya Mulimu itokwanga kueza licinceho ka kuya ka miinelo.—1 Makor. 7:31.

15. Ki butata mañi bobakopana ni bona mizwale ni likaizeli babañwi?

¹⁵ Kusina kukakanya, kopano ya Mulimu hai luzibisa kutwisiso yenca ka za litaba za mwa Bibele zelulumela kamba hai lufa ketelelo yeñwi yeama muzamao, lwaamuhelanga ketelelo yeo. Kono luezanga cwañi kopano ya Mulimu haieza licinceho zeama likalulo zeñwi za bupilo bwaluna? Ka mutala, cwanoñu fa, masheleñi atokwahala kuli kuyahiwe miyaho ya kulapelela ni kuilukisa aekezehile hahulu. Kacwalo, ba Sitopa Sesietelela bafile ketelelo ya kuli liputeho zeñata liitusise Ndu ya Mubuso yeswana. Kabakaleo, liputeho zeñwi likopanyizwe ni zeñwi kueza puteho iliñwi, mi Mandu A Mubuso amañwi alekisizwe. Masheleñi aitusiswa kwa kuyaha Mandu A Mubuso amañwi kwa libaka kwatokwahala hahulu. Haiba mupila kwa libaka, ili ko Mandu A Mubuso asweli kulekiswa mi liputeho lisweli kukopanywa ni liputeho zeñwi kueza puteho iliñwi, mwendi kukona kumibela taata kutwaela miinelo yeminca yeo. Bahasanyi babañwi cwale sebatokwa kutama misipili yemitelele kuli bafumanehe kwa mikopano. Babañwi bane basebelize ka taata kuyaha Ndu ya Mubuso kamba kuilukisa mwendi bakona kupalelwa kuutwisisa libaka kopano haibata kulekisa Ndu ya Mubuso yeo. Bakona kuikutwa kuli basinyize nako yabona  mi musebezi one baezize neli feela wa mbango. Niteñi, basweli balatelela tukiso yenca yeo mi baswanela kubabazwa.

16. Kusebelisa kelezo ye kwa Makolose 3:23, 24, kukona kulutusa cwañi kuzwelapili kuba ni tabo?

¹⁶ Lukazwelapili kuba ni tabo haiba luhupula kuli lusebeleza Jehova, mi Jehova usweli waetelela kopano yahae. (Mubale Makolose 3:23, 24.) Mulena Davida ulutomezi mutala omunde ka kuzwisa linubu kuli lituse mwa musebezi wa kuyaha tempele. Naabulezi kuli: “Na ki na mañi mi sicaba saka ki bo mañi, kuli lukone kufa linubu za kuitatela sina cwana? Kakuli lika kaufela lizwa ku wena, mi zelu kufile lizwa mwa lizoho lahao tota.” (1 Makol. 29:14) Halufa linubu, ni luna lufa Jehova zezwa mwa lizoho lahae tota. Niteñi, Jehova waitebuha haluitusisa nako, maata, ni masheleñi aluna kuli lutuse mwa musebezi wahae.—2 Makor. 9:7.

17. Ki kabakalañi hamusa swaneli kuzwafa haiba mulemuha kuli mutokwa kueza licinceho zeñwi?

¹⁷ Kuli luzwelepili kuzamaya mwa nzila yesisani yelibisa kwa bupilo, kaufelaa luna luswanela kuhata ka busepahali mwanaahatile Jesu. (1 Pit. 2:21) Haiba mulemuha kuli mutokwa kueza licinceho zeñwi, musike mwazwafa. Hamulemuha kuli mutokwa kueza licinceho, mubonisa kuli mubata kulatelela ketelelo ya Jehova. Muhupule kuli Jehova halibeleli kuli lulikanyise mutala wa Jesu ka kutala kakuli waziba kuli halusika petahala.

18. Ki nto mañi yeluswanela kueza kuli luyo kena mwa lifasi lelinca?

¹⁸ Haike kaufelaa luna luise pilu kwa lika zekaezahala kwapili mi lutabele kueza licinceho ka za munahanelo waluna, mubonelo waluna, ni likezo zaluna. (Liprov. 4:25; Luka 9:62) Luzweleñipili kuba ni buikokobezo ni kuba “babatabile, babasikululwa.” (2 Makor. 13:11) Haiba lueza cwalo, “Mulimu wa lilato ni wa kozo ukaba ni [luna].” Mi Jehova uka lutusa kuba ni tabo ka nako ya cwale, mi hape uka lufa bupilo mwa lifasi lelinca.