1. Kulemuha kuli ‘lutokwa za Mulimu’ kukona kulutusa cwañi kuba ni tabo?

 TABO sakata haki maikuto amande olukona feela kuba ni ona ka nakonyana. Mutu ukona kuzwelapili kuba ni tabo mwa bupilo bwahae kaufela. Ka mukwa ufi? Mwa ngambolo yahae ya fa lilundu, Jesu naabulezi kuli: “Tabo ki ya babalemuha kuli batokwa za Mulimu.” (Mat. 5:3) Jesu naaziba kuli batu babupilwe ni takazo ya kuziba ni kulapela Mubupi wabona, yena Jehova Mulimu. Mi bakeñisa kuli Jehova ki “Mulimu yatabile,” baba mulapela ni bona bakona kuba babatabile.—1 Tim. 1:11.

2-3. (a) Jesu naabulezi kuli ki bo mañi babañwi babakona kuba ni tabo? (b) Lukanyakisisañi mwa taba ye, mi ki kabakalañi kueza cwalo hakuli kwa butokwa?

² Kana lukona feela kuba ni tabo haiba lika kaufela liluzamaela hande mwa bupilo? Batili. Mwa ngambolo yahae ya fa lilundu, Jesu naabulezi taba yeñwi yekomokisa. Naabulezi kuli batu “babalila,” ibe kuli balila kabakala kuikutwa hahulu bumaswe bakeñisa sibi sebaezize kamba kabakala kukopana ni miinelo yetaata mwa bupilo bwabona, bakona kuba ni tabo. Jesu naabulezi kuli batu “babanyandiselizwe kuluka” kamba ‘babashubulwa’ kabakala kuba balateleli ba Kreste ni bona bakona kuba ni tabo. (Mat. 5:4, 10, 11) Kono lukona cwañi kuba ni tabo sakata halukopana ni miinelo yecwalo?

³ Jesu naasatalusi kuli lukona feela kuba ni tabo haiba lika kaufela liluzamaela hande mwa bupilo, kono lwakona kuba ni tabo haiba lulemuha kuli lutokwa za Mulimu mi lusutelela ku  yena. (Jak. 4:8) Lukona kueza cwañi cwalo? Mwa taba ye, lukanyakisisa mihato yemilaalu yelutokwa kuunga kuli lube ni tabo sakata.

4. Ki muhato ufi wapili olutokwa kuunga kuli lube ni tabo sakata? (Samu 1:1-3)

⁴ MUHATO 1: Kuli lube ni tabo sakata, luswanela kuca lico za kwa moya. Batu hamohocwalo ni lifolofolo batokwa kuca lico za kwa mubili kuli bazwelepili kupila. Kono ki batu feela babakona kuca lico za kwa moya. Mi lico zeo lwalitokwa luli. Ki lona libaka Jesu hanaabulezi kuli: “Mutu hana kupila sinkwa feela, kono ukapila ni ka linzwi kaufela lelizwa mwa mulomo wa Jehova.” (Mat. 4:4) Kacwalo, lizazi haliswaneli kulikela lusikaca lico za kwa moya zefumaneha mwa Linzwi la Mulimu la butokwa, yona Bibele. Muñoli yomuñwi wa samu naañozi kuli: ‘Tabo ki ya mutu yatabela mulao wa Jehova, mi waubala musihali ni busihu.’—Mubale Samu 1:1-3.

5-6. (a) Ki lika mañi zelukona kuituta mwa Bibele? (b) Kubala Bibele kukona kulutusa cwañi?

⁵ Mwa Bibele, Jehova ka lilato ulufile litaba zekona kulutusa kuba ni tabo mwa bupilo. Luituta za mulelo wahae ka za bupilo bwaluna. Luituta molukona kusutelela ku yena ni zeluswanela kueza kuli libi zaluna liswalelwe. Mi luituta za lika zende zasepisa kuluezeza kwapili. (Jer. 29:11) Litaba za niti zeo zelufumana haluituta Bibele lilutahiseza tabo yetuna!

⁶ Mwa Bibele hape kunani kelezo yende yekona kulutusa mwa bupilo bwaluna bwa ka zazi. Haiba lusebelisa kelezo yeo, lukaba ni tabo. Nako kaufela hamuikutwa kuimezwa ki miinelo yetaata mwa bupilo, mutande nako  yeñata kubala Linzwi la Jehova ni kunahanisisa litaba zemubala. Jesu naabulezi kuli: ‘Babatabile ki babautwa linzwi la Mulimu ni kulimamela!’—Luka 11:28.

7. Ki lika mañi zemukona kueza kuli mutusiwe hahulu ki litaba zemubala mwa Linzwi la Mulimu?

⁷ Hamunze mubala Linzwi la Mulimu, mubale ka kuiketa kuli muikole litaba zemubala. Kuli luutwisise taba ye, halunyakisiseñi mutala wo. Luungeñi kuli mutu yomuñwi uapehile lico zeñwi zemutabela hahulu. Kono bakeñisa kuli muakufile kamba kunani lika zeñwi zemunahana, muca lico zeo kapili-pili, ili nto yetahisa kuli musike mwaikola zona. Hase mufelize kuca, mulemuha kuli neikaba hande kambe nemucile lico zeo ka kuiketa kuli muikole zona. Kana mukile mwabala Bibele ka kumata-mata kuli mane nemupalezwi kuikola litaba zene mubala? Mubale Linzwi la Mulimu ka kuiketa kuli muikole litaba zemubala, mueze inge bababona lika zeezahala, kuutwa manzwi a batu bababulezwi mwa taba yeo, ni kunahanisisa litaba zemubalile. Kubala Bibele ka nzila yeo kuka mitahiseza tabo yetuna.

8. “Mutanga yasepahala yanani kutwisiso” upeta cwañi buikalabelo bwahae? (Mubone ni litaluso ze kwatasi.)

⁸ Jesu naaketile “mutanga yasepahala yanani kutwisiso” kuli alukise lico za kwa moya ka nako yeswanela, mi lusweli lwafepiwa hande hahulu kwa moya. * (Mat. 24:45) Lico kaufela zelukiswa ki mutanga yasepahala litomile fa Mañolo añozwi ka kususumezwa ki moya wa Mulimu. (1 Mates. 2:13) Lico za kwa moya zeo lilutusa kuziba mwanahanela Jehova sina mokuboniselizwe mwa Bibele. Ki lona libaka halubalanga limagazini za Tawala ya Mulibeleli ni za Muzuhe! ni litaba ze fa webusaiti ya jw.org. Lwaitukisezanga mikopano ya puteho ya mwahalaa sunda ni ya kwa mafelelezo a sunda. Mi kweli ni kweli lwabuhanga tukiso ya JW Broadcasting^®. Haiba luca lico za kwa moya zeñata, lukakona kuunga muhato wabubeli oka lutusa kuba ni tabo sakata.

9. Ki muhato ufi wabubeli olutokwa kuunga kuli lube ni tabo sakata?

⁹ MUHATO 2: Kuli lube ni tabo sakata, lutokwa kupila ka likuka za Jehova. Muñoli yomuñwi wa samu naañozi kuli: “Tabo ki ya mutu kaufela yasaba Jehova, yazamaya mwa linzila Zahae.” (Samu 128:1) Kusaba Jehova kutalusa kumukuteka hahulu kuli mane luambuka nto ifi kamba ifi yesa mutabisi. (Liprov. 16:6) Kacwalo, luzwelapili kueza molukonela kaufela kupila ka likuka za Mulimu ka za lika zelukile ni zesika luka sina mokuboniselizwe mwa Bibele. (2 Makor. 7:1) Lukaba ni tabo haiba lueza lika zalata Jehova ni kutoya lika zatoile.—Samu 37:27; 97:10; Maro. 12:9.

10. Ka kuya ka liñolo la Maroma 12:2, ki lika mañi zeluswanela kueza?

¹⁰ Mubale Maroma 12:2. Kwandaa kuziba feela kuli Jehova unani tukelo ya kutalusa zelukile ni zesika luka, hape luswanela kuikatulela kupila ka likuka za Mulimu. Ka mutala, mutu wakona kuziba kuli muuso unani tukelo ya kutoma milao ka za lubilo loliswanela kumata ka lona limota fa mukwakwa. Kono mwendi hatabeli kulatelela milao yeo. Kabakaleo, uzamaisanga mota ka lubilo lolutuna hahulu. Lubonisa ka likezo zaluna kuli lwalumela luli kuli kupila ka likuka za Jehova ki yona nzila yende hahulu ya kupila ka yona. (Liprov. 12:28) Davida naaikutwile cwalo, ki lona libaka hanaabulezi ka za Jehova kuli: “Unizibisa nzila ya bupilo. Fapilaa hao kutezi tabo yetuna; kwa lizoho lahao la bulyo kunani tabo kuya kuile.”—Samu 16:11.

11-12. (a) Ki lika mañi zeluswanela kutokomela halubilaezwa ki nto yeñwi kamba haluzwafile? (b) Manzwi a kwa Mafilipi 4:8 akona kulutusa cwañi haluketa lika za kuitabisa ka zona?

 ¹¹ Halubilaezwa ki nto yeñwi kamba haluzwafile, lukana lwaikutwa kuli lutokwa kueza nto yeñwi kuli lufelisa butata bolukopana ni bona. Nihaike kuli kueza cwalo hakusika fosahala, luswanela kutokomela kuli haluezi nto yatoile Jehova.—Maef. 5:10-12, 15-17.

¹² Mwa liñolo lanaañolezi Bakreste ba Mafilipi, muapositola Paulusi naasusuelize Bakreste kuzwelapili kunahanisisa lika “zelukile, . . . zekenile, . . . zelatiwa, . . . [ni] zende.” (Mubale Mafilipi 4:8.) Nihaike kuli Paulusi fa naasabuleli za lika za kuitabisa ka zona, litaba zanaañozi zakona kulutusa kuketa hande lika zeo. Mulike muezezo wo: Mwa libaka kaufela za timana ye mokufumaneha linzwi la “lika” muliyolise ka linzwi la “lipina,” “mafilimu,” “libuka,” kamba “lipapali za fa kompyuta.” Kueza cwalo kuka mitusa kuketa za kuitabisa ka zona zetabisa Mulimu ni kutokolomoha zesa mutabisi. Lubata kupila ka likuka za Jehova zepahami. (Samu 119:1-3) Kueza cwalo kuka lutusa kuba ni lizwalo lelikenile, mi lukakona kuunga muhato wabulaalu oka lutusa kuba ni tabo sakata.—Lik. 23:1.

13. Ki muhato ufi wabulaalu olutokwa kuunga kuli lube ni tabo sakata? (Joani 4:23, 24)

¹³ MUHATO 3: Mubone teñi kuli muunga kulapela Jehova kuba yona nto ya butokwa hahulu mwa bupilo bwamina. Ka kuba Mubupi waluna, Jehova unani tukelo ya kulapelwa. (Sin. 4:11; 14:6, 7) Kacwalo, nto ya butokwa hahulu mwa bupilo bwaluna ki kulapela Jehova ka nzila yemutabisa, ili “ka moya ni ka niti.” (Mubale Joani 4:23, 24.) Lubata kuli moya wa Mulimu okenile uluetelele halunze lumulapela ilikuli zelueza lilumelelane ni litaba za niti zefumaneha mwa Linzwi lahae. Luswanela kuunga sebelezo yaluna ku Mulimu kuba ya butokwa hahulu nihaike kuli lupila mwa naha ili mo likalulo zeñwi za musebezi waluna lihanisizwe kamba mane musebezi waluna ukwalilwe. Ka nako ya cwale, mizwale ni likaizeli baluna babafitelela 100 batamilwe ka libaka feela la kuli ki Lipaki za Jehova. * Nihakulicwalo, banani tabo mi baeza mobakonela kaufela kulapela, kuituta, ni kutaluseza batu babañwi ka za Mulimu waluna ni Mubuso wahae. Halushubulwa kamba kunyandiswa, lwakona kuba ni tabo ka kuziba kuli Jehova uinzi ni luna mi uka lufuyaula.—Jak. 1:12; 1 Pit. 4:14.

14. Ki lika mañi zeneezahezi ku muzwale yomuñwi yasali yomunca wa kwa Tajikistan, mi ki kabakalañi?

¹⁴ Zebaipumani ku zona mizwale ni likaizeli babañwi libonisa kuli mihato yemilaalu yelusazo nyakisisa kaniti luli yakona kulutusa kuba ni tabo sakata, kusina taba ni miinelo yetaata yelukopana ni yona. Halunyakisiseñi zeneezahezi ku muzwale wa kwa Tajikistan wa lilimo ze 19 yabizwa Jovidon Bobojonov yanaahanile kukena busole. La October 4, 2019, muzwale yo naangilwe kwa ndu yahae, kukenywa mwa tolongo ka likweli, mi aezwa sina sikebenga. Taba yesika luka yeo neibihilwe ki ba mitai ya makande mwa linaha zeñata. Nebabihile kuli muzwale yo naanatakilwe ilikuli alumele kukena busole ni kutina yunifomu ya sisole. Hasamulaho, kuta yaatula kuli naanani mulatu mi aisiwa kwa tolongo kwanaaizo eza misebezi yetaata kufitela nako yanaa muswalezi mueteleli wa naha ni kulaela kuli  azwisiwe mwa tolongo. Mwahalaa nako yeo kaufela, Muzwale Jovidon naazwezipili kusepahala ku Jehova mi naanani tabo. Ka mukwa ufi? Ka kuzwelapili kulemuha kuli naatokwa lico za kwa moya.

15. Muzwale Jovidon naakonanga cwañi kuca lico za kwa moya hanaali mwa tolongo?

¹⁵ Hanaali mwa tolongo, Muzwale Jovidon naacanga lico za kwa moya, nihaike kuli naasina Bibele kamba hatiso ifi kamba ifi. Taba yeo neikonahalile cwañi? Mizwale ni likaizeli bane bapila mwa sibaka seo neba muisezanga lico mi nebañolanga liñolo la zazi fa mikotana yene bashimbelanga lico zeo. Kacwalo, naakona kubala Bibele ni kunahanisisa litaba zanaabala zazi ni zazi. Hamulaho wa kuzwisiwa mwa tolongo, naaelelize batu babasika kopana kale ni miliko yemituna kuli: “Neikaba hande hane mukaitusisa tukuluho yemunani yona kuli muzibe zeñata ka za Jehova ka kubalanga Linzwi lahae ni lihatiso zaluna.”

16. Muzwale Jovidon naaisize pilu kwañi?

¹⁶ Muzwale waluna naapila ka likuka za Jehova. Mwa sibaka sa kuba ni mihupulo yemaswe ni kuikenya mwa lika zesika luka, naazwezipili kueza lika zetabisa Jehova. Muzwale Jovidon naaitebuha hahulu bunde bwa pupo ya Mulimu. Kakusasana hanaazuhanga,  naautwanga tunyunywani inze tulila. Busihu naabuhanga kweli ni linaleli. Naabulezi kuli: “Limpo zezwa ku Jehova zeo neli nitahisezanga tabo ni kunisusueza.” Haiba luitebuha lico za kwa moya zalufa Jehova ni lika kaufela zaluezeza, lukaba ni tabo mi tabo yeo ika lutusa kuzwelapili kuitiisa.

17. Manzwi a kwa 1 Pitrosi 1:6, 7 akona kutusa cwañi mutu yakona kuba mwa muinelo oswana ni wanaali ku ona Muzwale Jovidon?

¹⁷ Muzwale Jovidon hape naanga kulapela Jehova kuba yona nto ya butokwa hahulu mwa bupilo bwahae. Naaziba butokwa bwa kuzwelapili kusepahala ku Mulimu wa niti. Jesu naabulezi kuli: “Ki Jehova Mulimu wahao yeulukela kulapela, mi ki yena feela anosi yeulukela kufa sebelezo yekenile.” (Luka 4:8) Babahulu ba masole ni masole babañwi nebabata kuli Muzwale Jovidon alatule tumelo yahae. Niteñi, naalapelanga ka taata busihu ni musihali, kukupa Jehova kuli amutuse kuzwelapili kusepahala ku yena ni kuli asike alatula tumelo yahae. Kusina taba kuli naaezizwe maswe, Muzwale Jovidon naazwezipili kusepahala ku Mulimu. Kabakala leo, unani tabo yetuna cwale bakeñisa kuli unani nto yeñwi yanaasina pili asika ngiwa kale kwa ndu yahae, kunatakiwa, ni kukenywa mwa tolongo, ili tumelo yelikilwe.—Mubale 1 Pitrosi 1:6, 7.

18. Ki lika mañi zeka lutusa kuzwelapili kuba ni tabo?

¹⁸ Jehova waziba zelutokwa kuli lube ni tabo sakata. Haiba muunga mihato yemilaalu yekona kutusa mutu kuba ni tabo sakata, mukazwelapili kuba ni tabo kusina taba ni miinelo yetaata yemukopana ni yona. Mi ni mina mukakona kubulela kuli: “Tabo ki ya batu bao Jehova ali Mulimu wabona!”—Samu 144:15.