Mulimu Wamiisa Pilu
BIBELE inani likelezo zende zekona kulutusa bakeñisa kuli ki mpo yezwa ku Mulimu. Nihaike kuli haki buka yenani litaba za likalafo, yakona kulutusa halutalimana ni butata bwa kulembwala, halupalelwa kunahana hande, halulobehile pilu, kamba halutalimana ni miinelo yekona kutahisa kuli lube ni butuku bwa mwa munahano.
Sa butokwa ni kufita ki kuli Bibele ilukolwisa kuli Mubupi waluna, yena Jehova Mulimu, a wautwisisa moluikutwela kufita mutu ufi kamba ufi. Watabela kulutusa kuli lukone kutiyela miinelo kaufela yelukopana ni yona. Ka mutala, halunyakisiseñi litaba zepeli za mwa Bibele zeomba-omba:
“Jehova ufakaufi ni babalobehile lipilu; upilisa babaswabile.”—SAMU 34:18.
“Kakuli na, Jehova Mulimu wahao, nisweli lizoho lahao la bulyo, ki na yali ku wena: ‘Usike wasaba. Nika kutusa.’”—ISAYA 41:13.
Kono Jehova ulutusa cwañi kutalimana ni miinelo yetaata yetiswa ki butuku bwa mwa munahano? Sina moluka bonela mwa litaba zelatelela, Jehova ubonisa kuli waluisa pilu mwa linzila zeñata.
a Jehova ki libizo la Mulimu.—Samu 83:18
