Mwa taba yefelile, nelunyakisisize ka za sisupo sanaabulezi Jesu. Sisupo seo silutusa kuziba kuli Mubuso wa Mulimu utomilwe mwa lihalimu mi Jesu Kreste ki yena Mulena wa Mubuso wo.

Bibele ilubulelela kuli Jesu hanaafilwe maata a kuba Mulena, naalunduzi Satani ni madimona ahae mwa lihalimu. Satani ni madimona ahae bakona feela kukukueza batu ba fa lifasi, mi ki lona libaka lika halizwezipili kuba zemaswe kuzwa feela ka silimo sa 1914.—Sinulo 12:7, 9.

Ka kuba Mulena wa Mubuso wa Mulimu, Jesu uezize lika zeñwi kuli atuse batu mwa lifasi kaufela kusina taba kuli miinelo izwelapili kutotobela mwa lifasi. Musebezi wa kuluta batu litaba za mwa Bibele wanaapolofitile Jesu, utahisize kuli batu babañata baitute likuka za mwa Bibele ni kulisebelisa mwa bupilo bwabona. (Isaya 2:2-4) Batu babañata-ñata baitutile kuba ni mubonelo  omunde ka za musebezi, kupila bupilo bobunde mwa lubasi, ni kuziba mwakuitusiseza hande lika zebanani zona. Batu bao batusiwa ki lituto zebaituta mi baba batu babata Mulimu kuli bato busiwa ki Mubuso wahae.

Nihaike kuli Jesu ukalisize kale kubusa mwa lihalimu, lifasi lisabusiwa ki mibuso ya batu. Nihakulicwalo, Mulimu ubulelezi Jesu kuli: “Zamaya mwahalaa lila zahao unze ulitula.” (Samu 110:2) Jesu utuha ayundisa balwanisi kaufela ni kufelisa manyando kaufela ebakopana ni ona batu babautwa Mulimu.

Ka nako yeo, Mubuso wa Mulimu

• Ukafelisa bulapeli bwa buhata. Bulapeli bobulutile litaba za buhata ka za Mulimu ni kutatafaza bupilo bwa batu, bukafeliswa. Bibele iswaniseza bulapeli bwa buhata kwa lihule. Bulapeli bwa buhata bo habuka feliswa, babañata bakakomoka hahulu.—Sinulo 17:15, 16.

• Ukafelisa mibuso ya batu. Mubuso wa Mulimu ukafelisa mibuso kaufela ya batu.—Sinulo 19:15, 17, 18.

• Ukayundisa batu babamaswe. Kukaezahalañi kwa batu babazwelapili kueza lika zemaswe ili babahana kuutwa Mulimu? “Haili babamaswe, bakazwiswa mwa lifasi.”—Liproverbia 2:22.

• Ukayundisa Satani ni madimona ahae. Satani ni madimona ahae habana kukona ‘kukelusa macaba hape.’—Sinulo 20:3, 10.

Mubuso wa Mulimu hase upetile lika ze kaufela, ki likamañi zeuka ezeza batu babaka busiwa ki ona?

Ka kuba Mulena mwa lihalimu, Jesu ukapeta lika zeñata kufita mutu ufi kamba ufi yakile abusa. Ukabusa ni batu ba 144,000 ili babaketilwe mwa lifasi. (Sinulo 5:9, 10; 14:1, 3) Jesu ukabona teñi kuli tato ya Mulimu yaezwa fa lifasi. Ki limbuyoti mañi zebaka ikola batu babaka pila fa lifasi ka nako yeo?

• Matuku ni lifu likafeliswa. “Hakuna yayahile mwa naha yakali: ‘Nakula,’” mi “lifu halisana kubateñi.”—Isaya 33:24; Sinulo 21:4.

• Kukaba ni kozo ni buiketo. “Kozo ya bana bahao ikaba yetuna,” mi “bakaina, yomuñwi ni yomuñwi mwatasaa kota yahae ya veine ni mwatasaa kota yahae ya feiga, mi hakuna yaka basabisa.”—Isaya 54:13; Mika 4:4.

• Kukaba ni misebezi yeminde. “Babaketilwe baka bakaikola misebezi ya mazoho abona. Habana kuikataza feela basafumani sesiñwi.”—Isaya 65:22, 23.

• Lifasi likaba sibaka sesinde luli. “Lihalaupa ni naha yeomile likanyakalala, mi lihalaupa likawabelwa ni kutubula lipalisa sina safrani.”—Isaya 35:1.

• Batu bakalutiwa zebatokwa kueza kuli bapile kuya kuile. “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti, ni yene ulumile, yena Jesu Kreste.”—Joani 17:3.

Mulimu ubata kuli muto ikola limbuyoti zeo mwa lifasi lelinca. (Isaya 48:18) Mwa taba yetatama, lukanyakisisa zemukona kueza kuli muto ikola limbuyoti zeo kwapili.