Ka nzila yeswana, kaufelaa luna lukakopana ni nto yeswana sina liñungwa, ili yanaabulezi Jesu kuli ki “ñalelwa yetuna.” (Mateu 24:21) Hakuna feela sibaka kolukona kuyo ipata ko kusike kwaba ni ñalelwa yetuna. Kono kunani zelukona kueza kuli luisileleze. Luswanela kuezañi?

Hanaafa ngambolo fa lilundu, Jesu Kreste naalaezi kuli: “Cwale muzwelepili kubata pili Mubuso ni kuluka kwahae.” (Mateu 6:33) Lukona kueza cwañi cwalo?

Mubate pili Mubuso wa Mulimu. Taba ye italusa kuli luswanela kuunga Mubuso wa Mulimu kuba wa butokwa hahulu kufita nto ifi kamba ifi. (Mateu 6:25, 32, 33) Libaka? Libaka ki la kuli batu habakoni kufelisa matata ebakopana ni ona mwa lifasi. Ki Mubuso feela wa Mulimu okona kufelisa matata ao.

Mubate kuluka kwahae. Luswanela kulika molukonela kaufela kupila ka kulumelelana ni milao ya Mulimu ni likuka za mwa Bibele. Libaka? Kakuli haiba luiketela zeluunga kuba zelukile ni zesika luka, lukaeza likatulo zemaswe mi zekazwa mwateñi halina kuba zende. (Liproverbia 16:25) Kono haiba lupila ka kulumelelana ni likuka za Mulimu, lukatabisa Mulimu mi hape lukaba ni tabo mwa bupilo.—Isaya 48:17, 18.

Muzwelepili kubata pili Mubuso wa Mulimu ni kuluka kwahae. Jesu naalulemusize kuli  batu babañwi nebaka yembululwa, mi nebakaba ni mubonelo wa kuli kuba ni masheleñi amañata kwakona kubasileleza. Babañwi bona nebaka tuhelela lipilaelo za mwa bupilo kubafokolisa kuli mane nebaka palelwa kufumana nako ya kusebeleza hande Mulimu.—Mateu 6:19-21, 25-32.

Nihakulicwalo, Jesu naasepisize batu babaswalisana ni Mubuso wa Mulimu kuli bakaba ni lika zebatokwa cwale mane ni kuto ikola limbuyoti za kuya kuile kwapili.—Mateu 6:33.

Nihaike kuli balutiwa ba Jesu ba mwa linako za baapositola nebabata pili Mubuso wa Mulimu ni kuluka kwahae, nebasika bona lika zeutwisa butuku ni manyando inze lifeliswa. Kono nebasilelelizwe. Ka mukwa ufi?

Balutiwa bao nebapila ka kulumelelana ni likuka za Mulimu zelukile, ili zene batusize kusa ipumana mwa matata ene bakopana ni ona batu bane basaezi zanaabata Mulimu. Bakeñisa kuli nebanani tumelo yetuna ya kuli Mubuso wa Mulimu ukataha, nebaitiisize hane bakopani ni miinelo yetaata hahulu. Mi Mulimu naabafile “maata afita a butu” kuli bakone kuitiisa.—2 Makorinte 4:7-9.

Bakreste ba mwa linako za baapositola nebamamezi taelo ya Jesu ya kubata pili Mubuso. Nebakutazanga taba yende ya Mubuso kwa batu kaufela. (Makolose 1:23) Kana kunani babasweli kueza musebezi wo kacenu?

Eni. Lipaki za Jehova baziba kuli Mubuso wa Mulimu utuha ufelisa lifasi lelimaswe le. Kacwalo, baeza mobakonela kaufela kulatelela taelo yanaafile Jesu ya kuli: “Mi taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”—Mateu 24:14.

Kana mukaamuhela taba yende yeo? Lumisusueza kuli mulikanyise batu ba mwa linako za baapositola bane bapila mwa muleneñi wa Berea wa mwa Masedonia. Muapositola Paulusi hanaa babulelezi taba yende ya Mubuso wa Mulimu, nebaamuhezi taba yeo “ka kutukufalelwa hahulu.” Batu bao ‘nebatatubanga Mañolo ka tokomelo’ kuli bazibe haiba lika zeo neli za niti, mi nebasebelisanga zene baituta mwa bupilo bwabona.—Likezo 17:11, 12.

Ni mina mwakona kueza cwalo. Haiba mubata pili Mubuso wa Mulimu ni kuluka kwahae, mukasilelezwa ka nako yacwale mi mukato pila mwa kozo ni buiketo kwapili.