“Hakulicwalo, muzwelepili kutona kakuli hamuzibi lizazi kamba nako.”—MATEU 25:13.

“Muzwelepili kulibelela, muzwelepili kutona, kakuli hamuzibi kuli nako yetomilwe ifita lili.”—MAREKA 13:33.

Hakuna mutu fa lifasi yaziba luli nako foika felela miinelo yemaswe ye mwa lifasi le. Nihakulicwalo, Mulimu utomile “nako” ili “lizazi” luli folika felela lifasi. (Mateu 24:36) Kana taba yeo italusa kuli halukoni kuziba haiba mafelelezo a fakaufi? Batili. Jesu naabulelezi balutiwa bahae lika zeneka bonisa kuli mafelelezo a fakaufi.

Lika zanaabulezi Jesu zeo nelikaba sisupo sa “nako ya kufela kwa lifasi.” Jesu naabulezi kuli: “Sicaba sikalwanisa sicaba sesiñwi, ni mubuso ulwanise mubuso omuñwi, mi lico likataela mi kukaba ni lizikinyeho kuzwa mwa sibaka sesiñwi kuya ku sesiñwi.” (Mateu 24:3, 7) Hape naabulezi kuli nekukaba ni “matuku ayambukela.” (Luka 21:11) Kana mwaiponela lika zanaapolofitile Jesu zeo?

Kacenu, batu banyanda kabakala lindwa, tala, lizikinyeho, ni kuekezeha kwa matuku. Ka mutala, mwa silimo sa 2004, nekubile ni zikinyeho yetuna mwa Liwate la India yene tahisize ñuli yene bulaile batu bababato eza 225,000. Mwa lilimo zetaalu, butuku bwa COVID-19 nebubulaile batu bababato eza 6.9 milioni mwa lifasi kaufela. Jesu naabulezi kuli lika ze hane likaezahala, nelika bonisa kuli mafelelezo a lifasi a fakaufi.

Bibele italusa nako yelupila ku yona kuli ki “mazazi a mafelelezo.” (2 Pitrosi 3:3, 4) Liñolo la 2 Timotea 3:1-5 libonisa kuli batu babañata mwa mazazi a mafelelezo, nebakaba ni mikwa yemaswe. (Mubone mbokisi yeli, “ Nakonyana Pili Lifasi Lisika Fela Kale.”) Kana kacenu mwaiponela batu babanani buitati, ba mukwañuli, bababuhali, ni babasina lilato ku babañwi? Taba ye ibonisa kuli lifasi lelupila ku lona lituha lifela.

Mazazi a mafelelezo akaanga nako yekuma kai? Bibele italusa kuli mazazi a mafelelezo akaanga “nako yenyinyani” feela. Mi Mulimu ukayundisa “babasinya lifasi.”—Sinulo 11:15-18; 12:12.

Mulimu utomile kale lizazi ni nako fakafeliseza miinelo yemaswe ye mwa lifasi le. (Mateu 24:36) Mi mane taba yende hahulu ni kufita ki ya kuli Mulimu “hatabeli kuli mutu ufi kamba ufi atimezwe.” (2 Pitrosi 3:9) Ulufa kolo ya kuli luitute ka za hae ni kueza zalata. Libaka? Ubata kuli lupunyuhe mafelelezo a lifasi le, ni kuli luto pila mwa lifasi lelinca lelili paradaisi.

Mulimu uonga-ongile musebezi wa kuluta batu mwa lifasi kaufela kuli bazibe zebatokwa kueza kuli bato pila mwa lifasi lelinca Mubuso wahae hauka busa. Jesu naabulezi kuli taba yende ya Mubuso ikakutazwa “mwa lifasi kaufela.” (Mateu 24:14) Mwa lifasi kaufela, Lipaki za Jehova nebatandile lihora zeñata-ñata mwa musebezi wa kukutaza ni kuluta batu niti ya mwa Bibele yetusa batu kuba ni sepo. Jesu naabulezi kuli musebezi wa kukutaza wo, neuka ezwa mwa lifasi kaufela pili mafelelezo asika taha kale.

Mibuso ya batu ituha ifeliswa. Kono taba yende ki ya kuli mwakona kuto punyuha ka nako yelika feliswa lifasi le ni kuto pila mwa lifasi lelikaba paradaisi lasepisize Mulimu. Mwa taba yetatama, lukanyakisisa zemutokwa kueza kuli muto pila mwa lifasi lelinca leo.