Mwa litaba zefelile, luitutile kuli Mulimu atuha ayundisa batu babasa muutwi ni kufelisa matata kaufela ebakopana ni ona batu. Lunani buikolwiso bwa kuli taba yeo ikaezahala. Libaka? Kakuli Linzwi la Mulimu, yona Bibele ilusepisa kuli:

“Lifasi lafela.”—1 JOANI 2:17.

Lwaziba kuli kunani babaka punyuha mafelezo a lifasi kakuli Bibele mwa timana yefahalimu ilusepisa hape kuli:

“Yaeza tato ya Mulimu uina kuya kuile.”

Kacwalo, mutokwa kueza zabata Mulimu kuli muto punyuha. Kuli luzibe zabata Mulimu, luswanela kuituta ka za hae pili.

Jesu naabulezi kuli: “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti.” (Joani 17:3) Kuli lutopunyuha ni kupila kuya kuile, lutokwa ‘kuzwelapili kuziba’ Mulimu. Taba yeo haitalusi feela kuziba kuli Mulimu uteñi kamba kuziba litaba lisikai ka za hae. Luswanela kuba balikani bahae. Kuli lutiise bulikani bwaluna ni mutu yomuñwi, lutokwa kutandanga nako yeñata ni mutu yo. Lutokwa kueza nto yeswana haiba lubata kutiisa silikani saluna ni Mulimu. Halunyakisiseñi lituto za butokwa ze mwa Bibele zekona kulutusa kuzwelapili kuba ni silikani sesitiile ni Mulimu.

Lucanga lico zazi ni zazi kuli luzwelepili kupila. Jesu naabulezi kuli: “Mutu hana kupila sinkwa feela, kono ukapila ni ka linzwi kaufela lelizwa mwa mulomo wa Jehova.”—Mateu 4:4.

Kacenu, lwakona kufumana manzwi a Jehova mwa Bibele. Ka kuituta Bibele, mukaziba mwanaasebelisanezi Mulimu ni batu kwamulaho, mwaezeza cwalo ka nako yacwale, ni mwakaezeza cwalo kwapili.

Ki lika mañi zemukona kueza haiba mubata kulatelela milao ya Mulimu, kono kumibela taata kutuhela lika zemaswe? Nto yekona kumitusa ki kuzwelapili kuziba Mulimu.

Halunyakisiseñi mutala wa musali yomuñwi yeluka biza Sakura, yanaanani muzamao omaswe. Hane bakalile kuituta Bibele, nebaitutile ka za mulao wa Mulimu oli: “Musabe kwa muzamao wa buhule.” (1 Makorinte 6:18) Bo Sakura nebakupile Mulimu kuli abatuse mi nebakonile kutuhela muzamao wabona omaswe. Nihakulicwalo, basazwelapili kutiyela miliko. Bo Sakura batalusa kuli: “Hanibanga ni mihupulo yemaswe, nitalusezanga Jehova moniikutwela luli kakuli naziba kuli hanikoni kutiyela butata bo ninosi. Kulapelanga kunitusize kutiisa silikani saka ni Jehova.” Sina bo Sakura, batu babañata bazwelapili kuituta za Mulimu. Mulimu usweli wabatusa kueza licinceho mwa bupilo ni kubatusa kupila ka nzila yemutabisa.—Mafilipi 4:13.

Hamunze muzwelapili kuziba Mulimu, ‘mukazibwa ki yena’ ni kuba mulikanaa hae yomunde. (Magalata 4:9; Samu 25:14) Mi mukato pila mwa lifasi lelinca la Mulimu. Miinelo mwa lifasi lelinca ikaba cwañi? Lukanyakisisa taba yeo mwa taba yetatama.