Molukona Kuboniseza Kuli Lwalata Babañwi
Bakeñisa kuli kaufelaa luna lusimuluha ku Adama, lu lubasi lululuñwi. Nihaike kuli batu ba mwa lubasi baswanela kulatana ni kukutekana, batu babañata habasa eza cwalo mazazi a. Mulimu ubata kuli batu baba mwa lubasi balatane ni kukutekana.
ZABULELA MAÑOLO AKENILE KA ZA LILATO
“Ulukela kulata yomuñwi mouitatela.”—LIVITIKE 19:18.
“Muzwelepili kulata lila zamina.”—MATEU 5:44.
ZEKUTALUSA KULATA BATU BABAÑWI
Halunyakisiseñi mo Mulimu alutuseza kuziba zekutalusa kuba ni lilato kwa liñolo la 1 Makorinte 13:4-7:
“Lilato linani pilu-telele ni sishemo.”
Munyakisise taba ye: Muikutwanga cwañi babañwi haba mibonisa pilu-telele ni sishemo ni kusa nyemiswa ki mafosisa emuzize?
“Lilato halina muna.”
Munyakisise taba ye: Muikutwanga cwañi babañwi haba mikakanya ni kumishwela muna?
Lilato “halibati zalona feela.”
Munyakisise taba ye: Muikutwanga cwañi babañwi habakuteka maikuto amina ni kusa ñañelela kuli maikuto abona ki ona a butokwa?
Lilato “halina ndimbelela.”
Munyakisise taba ye: Mulimu utabela kuswalela batu baba mufoselize haiba feela babakela libi zabona. “Haana kubatisisa milatu kamita, mi habuluki ndimbelela kuya kuile.” (Samu 103:9) Lubanga ni tabo haiba mutu yelufoselize aluswalela. Kacwalo, ni luna luswanela kuswalelanga babañwi habalufoseza.—Samu 86:5.
Lilato “halitabiswi ki kusaluka.”
Munyakisise taba ye: Lika zemaswe haliezahala kuluna, halutabelangi kuli batu babañwi batabiswe ki zeezahala ku luna. Kacwalo, haluswaneli kutabanga babañwi habakopana ni miinelo yetaata, nihaikaba kuli batu bao bakile balunyandisa.
Kuli Mulimu alufuyaule, luswanela kulata batu kaufela. Nzila yeñwi yelukona kubonisa ka yona kuli lwalata babañwi, ki ka kubafa zebatokwa.
Hape Mwendi Mwakona Kutabela Litaba Ze
MUZUHE!
Lika Zetahisa Tabo—Lilato
Kubonisa lilato ni kuboniswa lilato litusa hahulu kuli mutu abe ni tabo.
