Kona mwanaaikutwezi musizana wa lilimo ze 13 cwalo hanaafilwe kanjanana sina mpo. Musali yomuñwi wa lipisinisi naabulezi kuli naaitumezi hahulu kwa mpo ya kompyuta yene bamufile bo ndatahe hanaasali kwa sikolo. Muuna yomuñwi yanaasazo kena mwa linyalo naaikutwile kuli kadi ya kuhupula lizazi lene banyalani yanaafilwe ki musalaa hae ili yanaamuezelize musalaa hae yo, neli yona mpo yende ka kufitisisa yanaafilwe.

Silimo ni silimo batu babañata batandanga nako yabona ni kuikataza kubata mpo yebaanga batu kuli ki mpo yende ka kufitisisa ya kufa mulikanaa bona kamba mutu yomuñwi wahabo bona fa kezahalo yeipitezi. Mi batu babañata habafanga mpo mutu yomuñwi, batabelanga kuli mutu yafiwa aikutwe inge mone baikutwezi batu bababulezwi kwa makalelo a taba ye. Mina bo? Kana nemukatabela kufa kamba kufiwa limpo zende ka kufitisisa?

Mwakona kutabela kueza cwalo bakeñisa kuli mutu yafiwa mpo ubanga ni tabo mi hape mufani wa mpo ni yena uikutwanga hande. Bibele mane ibulela kuli: “Kunani tabo yetuna mwa kufana yefita ye mwa kufiwa.” (Likezo 20:35) Mane mutu yafa mpo ukona kuba hahulu ni tabo haiba mutu yafilwe mpo yeo aitebuha hahulu yona.

Ki lika mañi zekona kutahisa kuli mube ni tabo hamufa limpo ni kutahisa kuli batu bemufa limpo baitebuhe zona? Mi haiba hamukoni kufa mpo yeengiwa kuba yende ka kufitisisa, ki lika mañi zemukona kueza kuli mutu yemufa mpo aitebuhe hahulu yona?