KAUFELAA luna lwaziba kuli Jehova usweli waetelela batu bahae ni kubafepa kwa moya mwa “mazazi a mafelelezo” a. (2 Tim. 3:1) Kono yomuñwi ni yomuñwi waluna utokwa kuutwa Jehova. Lukona kubapanya muinelo waluna kwa muinelo one bali ku ona Maisilaele hane bali mwa lihalaupa. Nebatokwa kuunga muhato hane bautwanga tolombita hailila.

Jehova naabulelezi Mushe kuli aeze litolombita zepeli za silivera mi naakaitusisanga zona “kubiza kopano ni kufundula sicaba mwa mafulo abona.” (Num. 10:2) Baprisita nebalizanga litolombita zeo ka linzila zeshutana-shutana kuli bazibise kopano zene itokwa kueza. (Num. 10:3-8) Kacenu, batu ba Mulimu baamuhelanga litaelo ka linzila zeshutana-shutana. Mwa taba ye, lukanyakisisa linzila zetaalu zaitusisa Jehova kuli alufe litaelo, mi luka libapanya ni litolombita zeneliziwanga mwa linako za Isilaele wa kwaikale. Batu ba Mulimu kacenu bamemiwanga kuya kwa mikopano yemituna, baana-bahulu bakenanga likolo, mi litaelo zefiwanga kwa liputeho zalukiswanga sinca.

Jehova hanaabatanga kuli “kopano kaufela” ikopanele kwa makenelo a upa wa tabernakele, baprisita nebalizanga litolombita zepeli. (Num. 10:3) Masika kaufela a mwa likwata zeene anaatomile mafulo aona kupotoloha tabernakele, naautwanga litolombita zeo halilila. Kubonahala kuli batu bane batomezi mafulo abona bukaufi ni makenelo a tabernakele nebaanganga muhato kapili. Kono babañwi nebapila kwahule mi mwendi nebatokwanga nako yeñata ni kueza buikatazo kuli bayo fita. Kusina taba kuli nebapila fakaufi kamba kwahule, Jehova naabata kuli batu kaufela bakopane mi bautwe litaelo zahae.

Kacenu, halukopanelangi kwa tabernakele, kono lumemiwanga kwa mikopano ya batu ba Mulimu. Mikopano yeo ikopanyeleza mikopano yemituna ni yemiñwi yeipitezi, ili ko luamuhelanga litaba za butokwa ni litaelo. Mwa lifasi kaufela, batu ba Jehova baitutanga litaba zeswana. Kacwalo, batu babafumanehanga kwa mikopano yeo baikolanga kuba hamoho sina sikwata. Babañwi bazamayanga misipili yemitelele. Nihakulicwalo, batu kaufela babayo fumanehanga kwa mikopano yeo balemuhanga kuli nebaezize hande kuyo fumaneha kwateñi.

Kono kucwañi ka za mizwale ni likaizeli babapila kwahule hahulu ni libaka za mikopano? Bakeñisa lipangaliko zezwezipili, mizwale ni likaizeli babañata babapila kwa libaka zecwalo ni bona batusiwanga ki mikopano yeo mi baikutwanga kuli ni bona baikola tukiso yeswana. Ka mutala, ka nako yanaapota Muyemeli wa Ofisi  Yetuna Yeetelela, mutai wa Benin neulukisize kuli mizwale babapila mwa tolopo ya Arlit kwa Niger bakone kubuha tukiso yenezwelela kwa mutai. Batu kaufela bane bafumanehile kwa tukiso yeo neli ba 21, ili mizwale ni likaizeli hamohocwalo ni bane batabela. Nihaike kuli mizwale bao nebali kwa sibaka sa kwahule, nebaikutwile kuswalisana ni mizwale ni likaizeli ba 44,131 bane bakopani. Muzwale yomuñwi naañozi kuli: “Luitumezi hahulu kuzwelela kwatasaa lipilu zaluna kwa kulukisa kuli lubuhe tukiso kaufela kuzwelela kwa mutai. Tukiso ye, ilutusize kulemuha kuli mwalulata luli.”

Baprisita ba Maisilaele hane balizanga feela tolombita iliñwi, “ki manduna feela, bona litoho za bana ba Isilaele babaeza likiti” bane batahanga kwa tende ya kopano. (Num. 10:4) Mushe naababulelelanga litaba zeñwi ni kubafa litaelo. Litaba zeo neli batusanga kupeta hande buikalabelo bone bafilwe mwa masika abona. Kambe nemuli yomuñwi wa manduna bao, kana nemusike mwaeza momukonela kaufela kufumaneha kwa mukopano wo ni kulutiwa?

Kacenu, baana-bahulu haki “manduna” mi hababusi mutapi wa Mulimu obafilwe kuli bababalele. (1 Pit. 5:1-3) Kono baeza mobakonela kaufela kulisa mutapi. Kabakaleo, baanganga muhato kapili habamemiwa kukena likolo, inge cwalo Sikolo sa Bukombwa Bwa Mubuso. Habali kwa sikolo seo, baana-bahulu baitutanga zebaswanela kueza kuli bababalele puteho. Sikolo seo situsanga baana-bahulu hamohocwalo ni mizwale ni likaizeli kusutelela ku Jehova. Nihaike kuli hamusika fumaneha kale ku zeñwi za likolo zeo, musweli mwatusiwa ki mizwale babakeni likolo zeo.

Fokuñwi, baprisita ba Maisilaele nebalizanga litolombita ka mulumo ocinca-cinca. Mulumo wo neuzibisanga batu kuli Jehova naabata kuli kopano kaufela ifunduke. (Num. 10:5, 6) Batu hane batutanga, nebaezanga cwalo ka kulatelela litaelo, kono kuli baeze cwalo nebatokwa kusebeza ka taata. Fokuñwi, Maisilaele babañwi nebasa tabelangi kututa. Kabakalañi?

Batu babañwi mwendi nebaikutwanga kuli nebatuta-tutanga hahulu mi nebatutanga ka nako yene basika libelela. “Fokuñwi lilu nelisiyalanga fahalimwaa tabernakele kukala manzibwana kuisa kakusasana feela.” Mi fokuñwi lilu nelisa shenyangi ka “mazazi amabeli, ka kweli iliñwi, kamba kufitelela.” (Num. 9:21, 22) Batu nebatutisize hakai mafulo abona? Liñolo la Numere kauhanyo 33 libulela za libaka ze 40 fone batomezi mafulo abona Maisilaele.

Fokuñwi, Maisilaele nebatomelanga mafulo abona fokunani muluti. Kutoma mafulo mwa muluti nekukatulusa hahulu mwa ‘lihalaupa lelituna, lelisabisa.’ (Deut. 1:19) Kacwalo, mwendi batu nebanahananga kuli hane bakatutela kwa sibaka sisili, nebasike bafumana sibaka sesinde.

Masika hasaakalisize kututa, babañwi neku babelanga taata kulibelela nako yabona ya kututa. Batu kaufela nebautwanga tolombita ya mulumo ocinca-cinca, kono nebasa tutangi ka nako yeswana. Tolombita yeo hane ililanga, neilemusanga ba masika anaatomezi mafulo abona kwa upa, ili lusika lwa Juda, lwa Isakare, ni lwa Zabuloni kuli aswanela kufunduka. (Num. 2:3-7; 10:5, 6) Masika ao hasaafundukile, baprisita nebalizanga tolombita lwabubeli ka mulumo ocinca-cinca, ili kulemusa sitopa sa masika amalaalu atomezi mafulo aona kwa mboela kuli afunduke. Baprisita nebazwelangapili kueza cwalo kufitela kopano kaufela ifunduka.

Mwendi nekumibezi taata kuamuhela licinceho zeezizwe mwa kopano. Mi mwendi nemuikutwa kuli licinceho zesweli kueziwa ki zeñata hahulu. Kamba mwendi nemutabela lika mone liinezi sapili mi nemuikutwa kuli halitokwi kucinciwa. Hape mwendi nekumibezi taata kuba ni pilu-telele ni kutwaela licinceho zeo zeezizwe. Nihakulicwalo, haiba lueza molukonela kaufela kuamuhela licinceho zeeziwa mwa kopano ya Jehova, lukalemuha kuli Mulimu usweli walufuyaula.

Mwa linako za Mushe, Jehova naaetelezi batu babañata-ñata mwa lihalaupa, ili baana, basali, ni banana. Kambe naasika bababalela ni kubaetelela, nebasike bapila. Kacenu, Jehova usweli waluetelela mwa mazazi a mafelelezo amaswe a. Ulutusa kuba bukaufi ni yena ni kuzwelapili kutiisa tumelo yaluna. Kacwalo, sina Maisilaele bane basepahala, haike kaufelaa luna luungange muhato kapili haluutwa tolombita hailila!