TABA YA KUITUTA 32
Muzamaye ni Mulimu ka Buikokobezo ni ka Buishuwo
“Uzamaye ka buikokobezo ni Mulimu wahao!”—MIKA 6:8.
PINA 31 Muzamaye ni Mulimu!
ZELUKA ITUTA *
1. Davida naabuleziñi ka za buikokobezo bwa Jehova?
KANA luli kwaswanela kubulela kuli Jehova unani buikokobezo? Eni. Davida naabulezi kuli: “Unifa tebe yahao yeenipilisa, mi buikokobezo bwahao bunibisa yomutuna.” (2 Sam. 22:36; Samu 18:35) Davida hanaabulela manzwi ao mwendi naanahana ka za lizazi lanaatile mupolofita Samuele kwa ndu ya ndatahe kuto toza mutu yanaakaba mulena wa Isilaele. Nihaike kuli Davida neli yena mwanana ka kufitisisa kwa bana ba Jese ba 8, Jehova naamuketile kuyola Mulena Saule.—1 Sam. 16:1, 10-13.
2. Lukanyakisisañi mwa taba ye?
2 Davida ni yena naaikutwa sina muñoli yomuñwi wa samu yanaabulezi cwana ka za Jehova: “Uinama kuli abone lihalimu ni lifasi, kuli azwise wa mayemo a kwatasi mwa liluli. Unanula mubotana . . . kuli amuinise ni babakutekeha.” (Samu 113:6-8) Mwa taba ye, lukaituta lituto za butokwa ka za buikokobezo ka kunyakisisa mo Jehova naaboniselize buikokobezo kao mwa miinelo yeshutana-shutana. Hasamulaho, lukanyakisisa zelukona kuituta kwa mutala wa Mulena Saule, mupolofita Daniele, ni Jesu ka za kuba ni buishuwo.
LUKONA KUITUTAÑI KWA MUTALA WA JEHOVA?
3. Jehova usebelisana cwañi ni luna, mi taba yeo ibonisañi?
3 Jehova ubonisa kuli waikokobeza ka mwasebelisanela ni batanga bahae babasika petahala. Jehova habati feela kuli lumulapele, kono hape ubata kuli lube balikani bahae. (Samu 25:14) Jehova naafile Mwanaa hae sina sitabelo kuli alutuse kuba balikani bahae, mi sitabelo seo sitahisa kuli libi zaluna liswalelwe. Kaniti luli, Jehova unani musa, mi ulubonisize mukekecima!
4. Ki lika mañi zalufile Jehova, mi ki kabakalañi?
4 Halunyakisiseñi nzila yeñwi yabonisa ka yona Jehova kuli waikokobeza. Ka kuba Mubupi, Jehova naakona kulubupa inze lusina buikoneli bwa kuiketela za kueza. Kono naasika eza cwalo. Naalubupile ka siswaniso sahae mi ulufile tukuluho ya kuiketela za kueza. Nihaike kuli lubabanyinyani hahulu halupanywa ku yena, Jehova ubata kuli lumusebeleze kuzwelela kwatasaa pilu yaluna kabakala kuli lwamulata ni kuli lwaziba tuso yelukona kufumana halu muutwa. (Deut. 10:12; Isa. 48:17, 18) Kaniti luli, luitumela kuli Jehova unani buikokobezo!
Jesu ubonahala inze ali mwa mahalimu. Uyemi ni batu babusa ni bona. Kaufelaa bona batalimezi mangeloi amañata-ñata. Mangeloi amañwi aya fa lifasi kuyo eza musebezi omuñwi wafilwe. Jehova ufile maata libupiwa kaufela zebonisizwe mwa siswaniso se (Mubone paragilafu 5)
5. Jehova ululuta cwañi kuba ni buikokobezo? (Mubone siswaniso sesi fa kava.)
5 Jehova ululuta kuba ni buikokobezo ka mwasebelisanela ni luna. Jehova ki yena yabutali ka kufitisisa mwa pupo kaufela. Nihakulicwalo, waamuhelanga liakalezo za babañwi. Ka mutala, Jehova naalumelelize Mwanaa hae kumutusa kubupa lika kaufela. (Liprov. 8:27-30; Makolo. 1:15, 16) Mi nihaike kuli Jehova ki yena Yamaata Kaufela, ufanga babañwi buikalabelo. Ka mutala, naaketile Jesu kuli abe Mulena wa Mubuso wahae, mi hape ukafa buikalabelo bobuñwi kwa batu ba 144,000 babaka busa ni Jesu. (Luka 12:32) Niteñi, Jehova ulutile Jesu kuba Mulena ni Muprisita Yapahami. (Maheb. 5:8, 9) Hape usweli kuluta batu babaka busa ni Jesu kuli bapete hande buikalabelo bwabona, kono haabatangi kuzamaisa musebezi wabona. Usepile kuli bakaeza tato yahae.—Sin. 5:10.
Lulikanyisa Jehova haluluta babañwi musebezi ni kubafa buikalabelo (Mubone paragilafu 6 ni 7) *
6-7. Ki lika mañi zelukona kuituta ku Ndataa luna wa kwa lihalimu ka za kufa babañwi buikalabelo?
6 Haiba Ndataa luna wa kwa lihalimu, yena yasatokwi kutusiwa ki mutu ufi kamba ufi, afa buikalabelo ku babañwi, uzibe luna lutokwa kuezanga hahulu cwalo. Ka mutala, kana mu toho ya lubasi kamba mu baana-bahulu mwa puteho? Mulikanyise mutala wa Jehova ka kufanga babañwi musebezi mi muambuke moya wa kubata kuzamaisa nto ni nto kaufela yebaeza. Haiba mulikanyisa Jehova, mukatusa kuli musebezi otokwahala uezwe, mi hape mukatahisa kuli babañwi baitute musebezi ni kubatusa kuba ni buikolwiso bwa kuli bakona kueza hande musebezi wo. (Isa. 41:10) Batu babanani buikalabelo bakona kuituta lika mañi zeñwi ku Jehova?
7 Bibele ibonisa kuli Jehova utabelanga kuutwa maikuto a bana bahae babali mangeloi. (1 Mal. 22:19-22) Bashemi, mukona kulikanyisa cwañi mutala wa Jehova? Ka linako zeñwi, mwakona kubuza bana bamina kuli bamitaluseze mobabatela kuezeza musebezi omuñwi. Mi haiba kwaswanela, mwakona kusebelisa liakalezo zabona.
8. Jehova naabonisize cwañi pilu-telele ku Abrahama ni Sara?
8 Jehova hape ubonisa kuli waikokobeza ka kuba ni pilu-telele. Ka mutala, Jehova ubonisanga pilu-telele batanga bahae habasa lumelelani ni likatulo zaezize. Naateelelize ku Abrahama hanaabulezi kuli katulo ya Jehova ya kusinya muleneñi wa Sodoma ni Gomora neisa swaneli. (Gen. 18:22-33) Mi muhupule mo Jehova naasebelisanezi ni Sara, musalaa Abrahama. Jehova naasika halifa kamba kuikutwa kufosezwa Sara hanaasehile ka za sepiso ya kuli naakaitwala inzaa supezi. (Gen. 18:10-14) Kono naakutekile Sara.
9. Bashemi ni baana-bahulu mwa puteho bakona kuitutañi kwa mutala wa Jehova?
9 Bashemi ni baana-bahulu mwa puteho, muitutañi kwa mutala wa Jehova? Muezanga cwañi bana bamina kamba mizwale ni likaizeli mwa puteho habasa lumelelani ni likatulo zemuezize? Kana mubatanga kubahakulula kapili-pili? Kamba kana mulikanga kuutwisisa mubonelo wabona? Kaniti, ba mwa lubasi ni mizwale ni likaizeli mwa puteho batusehanga haiba babaetelela balikanyisa Jehova. Selunyakisisize zelukona kuituta kwa mutala wa Jehova wa buikokobezo. Cwale halunyakisiseñi zelukona kuituta ka za buishuwo kwa mitala ya batu bababulezwi mwa Linzwi la Mulimu.
LUKONA KUITUTAÑI KWA MITALA YA BABAÑWI?
10. Linzwi la Mulimu lilutusa cwañi?
10 Ka kuba “Muluti Yapahami,” Jehova ululuta ka kuitusisa mitala ya batu bababulezwi mwa Linzwi lahae. (Isa. 30:20, 21) Kacwalo, lukona kuituta lituto zende ka kunahanisisa mitala ya batu bababulezwi mwa Bibele bane babonisize tulemeno twatabela Mulimu, mi kakañwi ka tulemeno to ki buishuwo. Hape lukona kuituta ku zeneezahezi kwa batu bane basika bonisa tulemeno totunde to.—Samu 37:37; 1 Makor. 10:11.
11. Lukona kuitutañi kwa mutala omaswe wa Saule?
11 Muhupule zeneezahezi ku Mulena Saule. Saule naali mutu yaishuwa hanaasali mutangana. Naaziba kuli naasina maata a kueza lika zeñwi mi mane hanaafilwe buikalabelo bobutuna, naasika buamuhela honafo feela. (1 Sam. 9:21; 10:20-22) Kono Saule hasaabile mulena, akala kuikuhumusa mi aeza lika zanaasa swaneli kueza. Nako yeñwi naapalezwi kubonisa pilu-telele hanaanzaa libelela mupolofita Samuele kuli atahe. Kufita kusepa Jehova kuli atuse sicaba sahae, Saule naafile sitabelo sa kucisa nihaike kuli naasika lumelezwa kueza cwalo. Kabakaleo, Jehova atuhela kushemuba Saule, mi hasamulaho amuamuha bulena. (1 Sam. 13:8-14) Kacwalo, mutala wo ubonisa kuli luswanela kuambuka kueza lika zelusika lumelezwa kueza.
12. Daniele naabonisize cwañi buishuwo?
12 Halunyakisiseñi mutala wa mupolofita Daniele, ili yanaashutana ni Saule. Mwa bupilo bwahae kaufela, Daniele naabonisize kuli naali mutangaa Mulimu yaikokobeza ni yaishuwa, mi kamita naakupanga Jehova kuli amuetelele. Ka mutala, hanaaitusisizwe ki Jehova kuli ataluse tolo ya Nebukadenezare, Daniele naasika bulela kuli naatalusize tolo yeo ka butali bwahae. Kono ka buikokobezo, naafile kanya kaufela ku Jehova. (Dan. 2:26-28) Luitutañi kwa taba yeo? Haiba lulumbiwa bakeñisa kuli mizwale baikolanga lingambolo zaluna, kamba haiba lupeta hande bukombwa bwaluna, luswanela kuhupula kufa tumbo kaufela ku Jehova. Luswanela kulemuha kuli nelusike lwakona kupeta lika zeo kaufela kambe nelusika tusiwa ki Jehova. (Mafil. 4:13) Haluba ni mubonelo ocwalo, hape lulikanyisa mutala wa Jesu omunde. Ka mukwa ufi?
13. Manzwi añozwi kwa liñolo la Joani 5:19, 30 alulutañi ka za Jesu?
13 Nihaike kuli Jesu neli Mwanaa Mulimu yapetahalile, naaitingile ku Jehova. (Mubale Joani 5:19, 30.) Nikamuta, naasika nahana za kuamuha Ndatahe wa kwa lihalimu maata. Liñolo la Mafilipi 2:6 lilutaluseza kuli Jesu “naasika nahana za kuba ni maata a Mulimu, fo kikuli, abate kulikana ni Mulimu.” Jesu naali Mwana yaipeya kwatasi, mi naaziba kuli naasina maata a kueza lika zeñwi, kono Ndatahe ki yena yanaanani maata kaufela.
Jesu naaziba kuli naasina maata a kueza lika zeñwi (Mubone paragilafu 14)
14. Jesu naaezize cwañi hanaakupilwe kuli aeze nto yeñwi yanaasina maata a kuieza?
14 Halunyakisiseñi zanaaezize Jesu muta balutiwa bahae bo Jakobo ni Joani hamohocwalo ni maa bona, neba muatumezi ni kumukupa kuli abafe tohonolo yeñwi yanaasina maata a kuifa. Honafo feela, Jesu abataluseza kuli ki Ndatahe feela wa kwa lihalimu yanaanani maata a kuketa mutu yanaaka ina Jesu kwa lizoho la bulyo kamba ku la nzohoto mwa Mubuso. (Mat. 20:20-23) Jesu naabonisize kuli maata anaafilwe naanani maciñekelo. Naaishuwa. Naasika eza nto ifi kamba ifi yanaasika mubulelela Jehova kuli eze. (Joa. 12:49) Lukona kulikanyisa cwañi mutala wa Jesu?
Lukona kulikanyisa cwañi mutala wa Jesu wa kuba ni buishuwo? (Mubone paragilafu 15 ni 16) *
15-16. Lukona kusebelisa cwañi kelezo ya mwa Bibele ye kwa 1 Makorinte 4:6?
15 Lulikanyisa mutala wa Jesu wa buishuwo ka kusebelisa kelezo ya mwa Bibele ye kwa 1 Makorinte 4:6. Liñolo leo libulela kuli: “Musike mwaikezeza kufita zeñozwi.” Kacwalo, mutu yomuñwi halukupa kuli lumufe kelezo, haluswaneli kumuhapeleza kuli aange lika sina moluliingela luna kamba kubulela lika kusina kunahanisisa. Kono luswanela kumubonisa zeibulela Bibele ni lihatiso zaluna zetomile fa Bibele. Halueza cwalo, lubonisa kuli halusika itinga fa butali bwaluna. Kono ka buishuwo, lubonisa kuli lusepile ‘litaelo zelukile’ zezwa ku Yamaata Kaufela.—Sin. 15:3, 4.
16 Haluba ni buishuwo, lukutekehisa Jehova, kono kunani mabaka amañwi haluswanela kueza cwalo. Cwale halunyakisiseñi mo kuba ni buikokobezo ni buishuwo kukona kulutuseza kuba ni tabo ni kulutusa kusebelisana hande ni babañwi.
MOLUTUSEZWA HALUIKOKOBEZA NI HALUBA NI BUISHUWO
17. Ki kabakalañi batu babaikokobeza ni babanani buishuwo hababanga ni tabo?
17 Haluikokobeza ni haluba ni buishuwo, lubanga ni tabo. Kabakalañi? Kakuli haiba lulemuha kuli kunani lika zeñwi zelusa koni kueza, lukaitebuha tuso yelufiwa ki babañwi mi lukaba ni tabo. Ka mutala, muhupule zeneezahezi nako yeñwi Jesu hanaafolisize baana baalishumi bane bakula mbingwa. Ku baalishumi bao, ki alimuñwi feela yanaakutile kuto itumela ku Jesu kabakala kumufolisa kwa butuku bobumaswe bo, ili butuku bwanaasa koni kufolisa yena muñi. Muuna yaikokobeza ni yanani buishuwo yo, naaitumezi kwa tuso yanaafilwe mi naakanyisize Mulimu.—Luka 17:11-19.
18. Kuba ni buikokobezo ni buishuwo kukona kulutusa cwañi kusebelisana hande ni babañwi? (Maroma 12:10)
18 Batu babaikokobeza ni babanani buishuwo baswalisananga hande ni babañwi mi babanga ni balikani babande. Kabakalañi? Kabakala kuli balemuha kuli batu babañwi ni bona banani tulemeno totunde mi banani buikoneli. Batu babaikokobeza ni babanani buishuwo batabanga babañwi habakondisa mwa musebezi obafilwe mi babababazanga ni kubakuteka.—Mubale Maroma 12:10.
19. Ki kabakalañi halusa swaneli kuba ni moya wa buikuhumuso?
19 Batu babaikuhumusa bona habatabelangi kubabaza babañwi, ka kubata kuli bona bafiwe tumbo. Batabela kuibapanya ku babañwi mi banani moya wa kukangisana ni batu. Mutu yaikuhumusa unahananga kuli uswanela kueza nto yeñwi yena muñi kabakala kuli uikutwa kuli babañwi habaka eza nto yeo habana kukondisa. Mutu yaikuhumusa hañata ubatanga kuungiwa kuba wa butokwa hahulu kufita babañwi mi unani muna. (Magal. 5:26) Batu babacwalo hababangi ni balikani. Haiba lulemuha kuli lunani buikuhumuso, luswanela kulapela ka taata ku Jehova kuli alutuse ‘kucinca munahano waluna,’ ilikuli moya wo usike watoma mibisi mwa lipilu zaluna.—Maro. 12:2.
20. Ki kabakalañi haluswanela kuikokobeza ni kuishuwa?
20 Luitumela hahulu kuli Jehova ulutomezi mutala omunde. Ubonisanga buikokobezo ka mwasebelisanela ni batanga bahae, mi lubata kumulikanyisa. Kuzwa fo, lubata kulikanyisa mitala yeminde ya batu bane banani buishuwo bababulezwi mwa Bibele, ili bane babanani tohonolo ya kuzamaya ni Mulimu. Haike kamita lufange Jehova kanya ni likute zemuswanela. (Sin. 4:11) Haiba lueza cwalo, ni luna lukazamaya ni Ndataa luna wa kwa lihalimu yalata batu babaikokobeza ni babanani buishuwo.
PINA 123 Kuipeya ka Busepahali Kwatasaa Zamaiso ya Mulimu
^ para. 5 Mutu yaikokobeza ki mutu yamusa ni yanani mukekecima. Kacwalo, kwaswanela kubulela kuli Jehova waikokobeza. Mwa taba ye, lukanyakisisa zelukona kuituta kwa mutala wa Jehova wa buikokobezo. Hape lukanyakisisa zelukona kuituta kwa mutala wa Mulena Saule, mupolofita Daniele, ni Jesu ka za kuba ni buishuwo.
^ para. 58 LITABA ZETALUSA SISWANISO: Muuna-muhulu uluta muzwale wa mukulwani musebezi wa kuaba likalulo za mwa simu za puteho. Hasamulaho, utuhelela muzwale wa mukulwani kueza musebezi wo anosi.
^ para. 62 LITABA ZETALUSA SISWANISO: Kaizeli ubuza muuna-muhulu ka za haiba kwaswanela kuamuhela memo ya kuyo fumaneha kwa mukiti wa sinawenga okaezezwa mwa keleke. Muuna-muhulu yo habuleleli kaizeli yo mihupulo yahae kono unyakisisa ni yena likuka za mwa Bibele.
