Mwa taba yeo, neluitutile kuli kunani taba iliñwi ya butokwa hahulu yeama batu kaufela fa lifasi ni mangeloi: ili kukeniswa kwa libizo la Jehova lelituna. Kalulo ya taba ya butokwa hahulu yeo iama tukelo ya Jehova ya kubusa, ili taba ya kuli, nzila yabusa ka yona ki yende hahulu. Ka mukwa oswana, taba ya busepahali bwa batu ki kalulo yeñwi ya taba ya butokwa hahulu yeo.

Ki kabakalañi ka nako ya cwale halukoñomeka kuli taba ya butokwa hahulu ka kufitisisa iama libizo la Jehova ni kukeniswa kwalona? Halunyakisiseñi mabaka amalaalu.

Libaka lapili, mwa simu ya Edeni, Satani naalwanisize libizo la Jehova, kamba butu bwahae. Puzo yeo Satani naabuzize Eva neibonisa inge kuli Jehova naasina bufani mi naasaswaneli kuhanisa babusiwa bahae kueza lika zeñwi. Satani kihona ahanyeza manzwi a Jehova ka kunonga, mi ka kueza cwalo naabulezi kuli Mulimu ki lihata. Kacwalo, naasawanile libizo la Jehova. Aba “Diabulosi,” ili kutalusa “lisawana.” (Joa. 8:44) Bakeñisa kuli Eva naalumezi buhata bwa Satani, naasika utwa Mulimu, mi naakwenuhezi tukelo yahae ya kubusa. (Gen. 3:1-6) Kuto fita ni la kacenu le, Satani usawanile libizo la Mulimu ka kuhasanya litaba za buhata ka za mwainezi Jehova. Batu babalumela litaba za buhata zeo kukona kubabela bunolo kusa utwa Jehova. Kacwalo, batu ba Mulimu baanga kuli kusawana libizo la Jehova lelikenile hakusika luka nihanyinyani. Busawana bo ki bona sihulu bobutahisize manyando amañata ni bumaswe mwa lifasi.

Libaka la bubeli, Jehova uikatulezi kukenisa libizo lahae ka kutala, ili kuli zebupilwe kaufela litusiwe. Taba yeo ki ya butokwa hahulu ku Jehova. Ki lona libaka haabulela kuli: “Nikakenisa luli libizo laka lelituna.” (Ezek. 36:23) Mi Jesu naabonisize hande zeswanela kuba za butokwa hahulu mwa litapelo za batanga ba Jehova kaufela babasepahala, hanaaize: “Libizo lahao likeniswe.” (Mat. 6:9) Bibele ikuta-kutezi kukoñomeka butokwa bwa kukanyisa libizo la Jehova. Halunyakisiseñi mitala feela isikai: “Mufe Jehova kanya yeswanela libizo lahae.” (1 Makol. 16:29; Samu 96:8) “Muopelele libizo lahae lelikanya milumbeko.” (Samu 66:2) “Nikakanyisa libizo lahao kuya kuile.” (Samu 86:12) Yeñwi ya linako zanaabulezi Jehova kasibili kuzwelela kwa lihalimu neli kwa tempele mwa Jerusalema, ili ko Jesu naabulezi kuli: “Ndate, kanyisa libizo lahao.” Jehova naaalabile kuli: “Nilikanyisize mi nika likanyisa hape.”—Joa. 12:28. a

Libaka la bulaalu, mulelo wa Jehova ukazwelapili kulumelelana ni libizo lahae, kamba butu bwahae. Halunyakisiseñi taba ye: Ki lika mañi zekaezahala hamulaho wa tiko ya mafelelezo yekaba teñi kwa mafelelezo a Puso ya Kreste ya Lilimo ze 1,000? Kana batu ni mangeloi bakazwelapili kukauhanywa ki taba yetuna yeama kukeniswa  kwa libizo la Jehova? Kuli lualabe puzo yeo, haluikupuliseñi likalulo zepeli zeswalisana, ili busepahali bwa batu ni tukelo ya Mulimu ya kubusa pupo kaufela. Kana batu babaka bonisa kuli basepahala bakakopana ni miinelo yeka bapaleliswa kuzwelapili kusepahala? Batili. Bakaba batu babapetahalile ni babalikilwe ka kutala. Mi bakabe bafumani bupilo bobusa feli. Kana batu ni mangeloi bakazwelapili kuambola za tukelo ya Mulimu ya kubusa pupo kaufela, kamba mane kukauhanywa ki taba yeo? Batili. Ka nako yeo, batu kaufela ni mangeloi bakaziba kuli Jehova unani tukelo ya kubusa, ki yapahami ka kufitisisa, ni kuli nzila yabusa ka yona ki yende hahulu. Kono kucwañi ka za libizo la Jehova?

Ka nako yeo, batu kaufela bakaziba niti ka za Jehova, mi libizo lahae lika keniswa ka kutala. Nihakulicwalo, libizo la Jehova likazwelapili kuba la butokwa hahulu kwa batanga bahae kaufela babasepahala, kwa lihalimu ni fa lifasi. Libaka? Kakuli bakabona Jehova inzaa zwelapili kueza lika zekomokisa. Munyakisise taba ye: Bakeñisa kuli Jesu ukakutisa bubusi kaufela ku Jehova ka buikokobezo, Mulimu ukaba “lika kaufela kwa batu kaufela.” (1 Makor. 15:28) Hasamulaho, batu fa lifasi bakaikola “tukuluho yemakaza ya bana ba Mulimu.” (Maro. 8:21) Mi Jehova ukataleleza ka kutala mulelo wahae wa kuba ni lubasi lolutuna loluswalisani kwa lihalimu ni fa lifasi.—Maef. 1:10.

Likezahalo zeo likaama cwañi lubasi lwa Jehova kwa lihalimu ni fa lifasi? Kusina kukakanya, lukaba ni takazo yetuna ya kubata kuzwelapili kulumbeka libizo la Jehova lelinde. Davida muñoli yomuñwi wa samu, naasusumelizwe kuñola kuli: “Haike Jehova Mulimu alumbekwe . . . Libizo lahae lelinde lilumbekwe kuya kuile.” (Samu 72:18, 19) Lukazwelapili kufumana mabaka amanca ni atabisa a kueza cwalo kuya kuile.

Libizo la Jehova liyemela lika kaufela ka za hae. Kunahanisisa libizo la Jehova kuluhupulisa lilato lahae. (1 Joa. 4:8) Kamita lukahupulanga kuli Jehova naalubupile kakuli walulata, naalufile sitabelo sa tiululo kakuli walulata, ni kuli naabonisize kuli nzila yabusa ka yona ilukile kakuli walulata. Kono lukazwelapili kubona mo Jehova aboniseza lilato kwa lika zabupile. Mi lukazwelapili kusutelela ku Ndataa luna ni kuopelela libizo lahae lelikanya milumbeko kuya kuile.—Samu 73:28.