Hakubonahali cwalo. Diabulosi naasika taluseza Eva kuli hanaakaca kwa muselo wanaahanisizwe ki Mulimu, mubili wahae neuka shwa kono moya wahae ona neuka zwelapili kupila kwa sibaka sesiñwi. Ka kuitusisa noha, Satani naapihile kuli Eva hanaakaca kwa muselo wa kota yeo, ‘naasike ashwa’ nikamuta. Ka kubulela cwalo, naatalusa kuli Eva naakazwelapili kupila ni kuikola bupilo bobunde hahulu fa lifasi, asatokwi kuzamaiswa ki Mulimu.—Gen. 2:17; 3:3-5.

Haiba tuto ya kuli moya wa mutu haushwangi haisimuluhi mwa simu ya Edeni, neikalile lili he? Haluzibi hande. Seluziba feela kikuli bulapeli bwa buhata kaufela nebufelisizwe ka nako ya Muunda wa Nuwe. Bakeñisa kuli Nuwe ni lubasi lwahae ki bona feela bane bapunyuhile Muunda mi kaufelaa bona nebali balapeli ba niti, hakuna mutu yanaaka hasanya lituto za buhata.

Kacwalo, kubonahala kuli tuto ya kuli moya wa mutu haushwangi, sina mobalumelela batu babañwi kacenu, neikalisize hamulaho wa Muunda. Kulukela kuba kuli Mulimu hanaalyanganisize puo yene babulela batu kwa muleneñi wa Babele, ni kubahasanyeza “mwa lifasi kaufela,” batu nebakalile kuhasanya tuto ya kuli moya wa mutu haushwangi. (Gen. 11:8, 9) Kusina taba kuli tuto ya buhata yeo neikalile lili, lunani buikolwiso bwa kuli Satani Diabulosi, yena “ndatahe buhata,” ki yena musimululi wa tuto yeo mi naatabile kubona batu haba ihasanya.—Joa. 8:44.