KANA mulemuhile kuli batu babañata kacenu baikutwa kuli baswanela kueziwa hande hahulu kufita babañwi ni kufiwa matohonolo amañwi? Niha baeziwa ka nzila yeipitezi, basaikutwa kuli baswanela kufiwa matohonolo amañwi. Batu babanahana ka nzila yeo banani buitati mi habaitebuhi zebanani zona; Bibele neibulezi kuli batu bakaba cwalo mwa mazazi a mafelelezo.—2 Tim. 3:2.

Niti kikuli, kuzwa feela kwamulaho kunani batu bababonisize buitati. Ka mutala, bo Adama ni Eva nebabata kuba ni tukelo ya kuiketela zende ni zemaswe, mi kaufelaa luna lwanyanda kabakala katulo yabona. Mutala omuñwi ki wa Oziasi, mulena wa Juda, yanaanahana kuli uswanela kulumelezwa kucisa insense kwa tempele, kono mubonelo wo neufosahalile hahulu. (2 Makol. 26:​18, 19) Ka mukwa oswana, Bafalisi ni Basaduki nebanahana kuli Mulimu naaswanela kubashemuba hahulu kufita babañwi bakeñisa kuli nebasimuluha ku Abrahama.—Mat. 3:9.

Lupila ni batu babanani buitati mi lwakona kukukuezwa ki mubonelo wabona. (Magal. 5:26) Lwakona kukala kunahana kuli lunani tukelo ya kufiwa tohonolo yeñwi kamba kuezwa ka nzila yeipitezi. Lukona kuambuka cwañi mubonelo wo? Luswanela kuutwisisa mwaangela taba ye Jehova. Likuka zepeli za mwa Bibele zakona kulutusa.

Jehova ki yena yaatulanga zelulukela kufiwa. Halunyakisiseñi mitala isikai.

• Mwa lubasi, muuna uswanela kuikutwa kuli musalaa hae wamukuteka, mi musali uswanela  kuikutwa kuli muunaa hae wamulata. (Maef. 5:33) Babanyalani habaswaneli kueza linyawe ni batu basili. (1 Makor. 7:3) Bashemi baswanela kulibelela kuli bana babona baka bautwa, mi bana baswanela kuboniswa lilato ni kutusiwa ki bashemi babona.—2 Makor. 12:14; Maef. 6:2.

• Mwa puteho, baana-bahulu babasebeza ka taata baswanela kufiwa likute. (1 Mates. 5:12) Nihakulicwalo, habana tukelo ya kuzamaisa mizwale ni likaizeli babona.—1 Pit. 5:​2, 3.

• Mulimu ufile babusi maata a kuunga mitelo kwa batu bobabusa ni kufiwa likute ki bona.—Maro. 13:​1, 6, 7.

Jehova ka lilato ulufile lika zeñata hahulu kufita zeluswanela. Bakeñisa kuli lubaezalibi, sesi luswanela feela ki lifu. (Maro. 6:23) Niteñi, Jehova ulufanga limbuyoti zeñata kabakala lilato lahae lelisa feli. (Samu 103:​10, 11) Limbuyoti kaufela zalufanga ulufanga zona kabakala sishemo sahae sesituna.—Maro. 12:​6-8; Maef. 2:8.

Mutokomele mubonelo wa lifasi. Ka kusalemuha, lwakona kukala kunahana kuli lunani tukelo ya kufiwa lika zeñata kufita babañwi. Jesu naaitusisize nguli ya babeleki bane bafilwe dinari iliñwi kuli abonise kuli kubunolo hahulu kuba ni mubonelo wo. Babeleki babañwi nebakalile kubeleka isali kakusasana mi nebabelekile lizazi kaufela inze balengiwa ki kazazi; babañwi bona nebabelekile feela hora iliñwi. Bane bakalile kakusasana kubeleka nebanahana kuli banani tukelo ya kufiwa masheleñi amañata kabakala musebezi one baezize. (Mat. 20:​1-16) Jesu hanaatalusa swanisezo yeo, naabonisize kuli balateleli bahae baswanela kukolwa ka lika zabafa Mulimu.

Mube ni buitumelo mi musike mwalibelela kufiwa lika ki babañwi. (1 Mates. 5:18) Mulikanyise muapositola Paulusi, ili yanaasika kupa kutusiwa kwa mubili ki mizwale ba mwa Korinte niha naanani tukelo ya kueza cwalo. (1 Makor. 9:​11-14) Luswanela kuitebuha lika kaufela zelufiwa mi haluswaneli kulibelela kufiwa lika ki babañwi.

Mube ni buikokobezo. Haiba mutu unahana hahulu ka za hae, hañata ukalisanga kunahana kuli uswanela kufiwa zeñata kufita zanani zona. Kuba ni buikokobezo kuka lutusa kusanahana ka nzila yefosahezi yeo.

 Mupolofita Daniele ulutomezi mutala omunde hahulu wa kubonisa buikokobezo. Naasimuluha mwa lusika lolutumile, naabuheha, naanani zibo mi naanani buikoneli mwa lika zeñata; kacwalo, naakona kuikutwa kuli naaswanela kuezwa ka nzila yeipitezi. (Dan. 1:​3, 4, 19, 20) Kono Daniele naazwezipili kuikokobeza, mi kalemeno kao nekatahisize kuli abe wa butokwa ku Jehova.—Dan. 2:30; 10:​11, 12.

Haike luambuke moya wa buitati, ili oatile hahulu mwa lifasi kacenu. Kono haike luzwelepili kuba ni tabo kabakala lika kaufela zalufile Jehova ka sishemo sahae sesituna.