TABA YA KUITUTA 8
PINA 130 Munoswalela
Mukona Kulikanyisa Cwañi Jehova ka Kuswalela Babañwi?
“Sina Jehova hamiswalezi ka pilu kaufela, ni mina mueze nto yeswana.”—MAKOLO. 3:13.
ZEKAITUTIWA
Mwa taba ye, lukanyakisisa mihato yelutokwa kuunga kuli lukone kuswalela baba lufoselize.
1-2. (a) Ki lili fokukona kulubela hahulu taata kuswalela mutu yomuñwi? (b) Bo Denise nebabonisize cwañi kuli balata kuswalela?
KANA kumibelanga hahulu taata kuswalela babañwi? Buñata bwaluna kulubelanga taata, sihulu haiba mutu yomuñwi ubulezi kamba kueza nto yeluutwisize hahulu butuku. Nihakulicwalo, kunani lika zeñwi zelukona kueza kuli lufelise butuku bo ni kuswalela. Ka mutala, halunyakisiseñi zeneezahezi ku kaizeli yabizwa Denise, a ili yanaaswalezi hahulu mutu yomuñwi. Mwa 2017, bo Denise ni lubasi lwabona nebaizo potela Ofisi Yetuna Yeetelela Musebezi wa Lipaki za Jehova Mwa Lifasi Kaufela yene isazo kwalulwa. Hane bakutela kwa ndu, mumatisi yomuñwi anata mwa mota yabona. Bo Denise bawelela kabakala kozi yeo. Hase bawetulukile, batalusezwa kuli bana babona nebaholofezi hahulu ni kuli bo muunaa bona, bo Brian, nebashwile. Bo Denise habahupula zeneezahezi ka nako yeo, batalusa kuli: “Nenilobehile hahulu pilu mi nenisa zibi feela za kueza.” Hasamulaho, bo Denise batalusezwa kuli mumatisi yo naasika nwa bucwala, kuitusisa milyani yekola, kamba kuyaululwa ki nto yeñwi.
2 Mumatisi yo naafilwe mulatu wa kubulaya mutu isi ka mulelo. Kuta hane ika mufumana ni mulatu, naaka lengiwa mwa tolongo. Nihakulicwalo, bo Denise batalusezwa kuli kuta neika atulela muuna yo kulikana ni zene bakabulela. Bo Denise batalusa kuli: “Bakeñisa kuli nenitokwa kutalusa lika zene niutwisize hahulu butuku, neniikutwile inge kuli ninani sitombo mi mutu yomuñwi wasiapula ni kusela mwateñi lizwai leliñata.” Lisunda lisikai kuzwa fo, bo Denise nebaile kwa kuta mi nebaitukiselize kubonana ni muuna yo yanaatahiselize lubasi lwabona butata bobutuna hahulu. Ki lika mañi zene babulezi? Bo Denise nebakupile muatuli kuli ashwele muuna yo makeke. b Hase bafelize kubulela, muatuli yo akala kulila. Naabulezi kuli: “Mwa lilimo ze 25 kaufela zenibile muatuli, hanisika bona kale taba yecwalo mwa kuta. Hanisika bona kale lubasi lolufoselizwe halukupa kuli sifosi aboniswe sishemo. Hanisika bona kale batu bababonisana lilato ni kuswalelana.”
3. Ki lika mañi zenesusuelize bo Denise kubonisa moya wa kuswalela?
3 Ki lika mañi zenetusize bo Denise kubonisa moya wa kuswalela? Nebanahanisisize mo Jehova aswalelanga libi zaluna. (Mika 7:18) Haiba luitebuha hahulu kuli Jehova uluswalezi, ni luna lukasusuezwa kuswalela babañwi.
4. Ki lika mañi zabata Jehova kuli lueze? (Maefese 4:32)
4 Jehova ubata kuli luswalela babañwi ka pilu kaufela sina feela yena haluswalezi ka pilu kaufela. (Mubale Maefese 4:32.) Ubata kuli luswalele baba lufoselize. (Samu 86:5; Luka 17:4) Mwa taba ye lukanyakisisa lika zetaalu zeka lutusa kuba hahulu ni moya wa kuswalela.
MUSIKE MWATIBELA MAIKUTO AMINA
5. Ka kuya ka Liproverbia 12:18, lukona kuikutwa cwañi haiba mutu yomuñwi alufoseza?
5 Lukona kuutwa hahulu butuku kwa pilu haiba mutu yomuñwi alufoseza ka lipulelo kamba ka likezo, sihulu haiba mutu yo ki mulikanaa luna yomutuna kamba ki yomuñwi wa mwa lubasi lwaluna. (Samu 55:12-14) Ka linako zeñwi, butuku boluutwanga bukona kuswanisezwa kwa kutabiwa nto yeñwi. (Mubale Liproverbia 12:18.) Lwakona kutibela maikuto aluna kamba kueza inge kuli halusika utwa butuku. Kueza cwalo kuswana feela inge kuli lutabilwe tipa mi tipa yeo haicomolwi fa sitombo. Ka nzila yeswana, haluswaneli kulibelela kuli butuku boluutwa bukafela haiba lutibela maikuto aluna.
6. Ki lika mañi zelukona kueza mutu yomuñwi halufoseza?
6 Mutu yomuñwi halufoseza, mwendi nto yapili yelukona kueza ki kunyema. Bibele ibonisa kuli lwakona kufilikana. Nihakulicwalo, ilulemusa kuli haluswaneli kuzwelapili kufilikana. (Samu 4:4; Maef. 4:26) Kabakalañi? Kakuli hañata luezanga lika ka kuya ka moluikutwela. Mi zezwanga mwa bunyemi hañata halibangi zende. (Jak. 1:20) Muhupule kuli mutu yomuñwi halufoseza lwakona kunyema, kono lunani maata a kuiketela kuzwelapili kunyema kamba kutokwa.
Mutu yomuñwi halufoseza lwakona kunyema, kono lunani maata a kuiketela kuzwelapili kunyema kamba kutokwa
7. Mutu yomuñwi halufoselize, ki maikuto mañi amañwi elukona kuba ni ona?
7 Halusika ezwa hande, lwakona kuba ni maikuto amañwi autwisa butuku. Ka mutala, kaizeli yabizwa Ann utalusa kuli: “Hane nisali mwanana, bo ndate nebayubekile bo ma ni kunyala musali yanaakenyizwe musebezi wa kunibabalela. Neniikutwile kuyubekiwa. Hane babile ni bana, neniikutwile kuli nebaisa hahulu pilu ku bona kufita na. Hane ninze nihula, nenizwezipili kuikutwa kusaba wa butokwa.” Kaizeli yabizwa Georgette utalusa mwanaaikutwezi bo muunaa hae hane baezize bubuki, uli: “Neluli balikani kuzwa feela kwa bwanana. Nelueza bupaina hamoho! Nenilobehile hahulu pilu.” Mi kaizeli yabizwa Naomi utalusa kuli: “Nenisa nahani kuli bo muunaaka nebakona kuniutwisa butuku. Kacwalo, hane banitaluselize kuli nebanani mukwa wa kubuha maswaniso a mapunu, neniikutwile kupumiwa ni kubetekiwa.”
8. (a) Ki afi mabaka amañwi haluswanela kuswalela babañwi? (b) Kuswalela babañwi kukona kulutusa cwañi? (Mubone mbokisi yeli, “ Kucwañi Haiba Mutu Yomuñwi Uluutwisize Hahulu Butuku?”)
8 Haluna maata fahalimwaa lika zebakona kubulela kamba kueza ku luna batu babañwi, kono lunani maata a kuiketela za kueza mwa muinelo wo. Mi hañata nto yende yelukona kueza ki kuswalela. Kabakalañi? Kakuli lwalata Jehova, mi ubata kuli lube ni moya wa kuswalela. Haiba luzwelapili kunyema ni kusaswalela, lwakona kueza ka bukuba, mi mwendi mane lwakona kuikutwisa butuku. (Liprov. 14:17, 29, 30) Halunyakisiseñi mutala wa kaizeli yabizwa Christine. Utalusa kuli: “Haniutwa hahulu butuku kabakala kufosezwa, kunibelanga taata kumenya. Haniketangi hande zenica. Hanibangi ni nako yeñata ya kupumula, mi kunibelanga hahulu taata kufelisa maikuto amaswe, ili nto yetahisanga kuli nisike naeza hande bakuluna ni kuswalisana hande ni babañwi.”
9. Ki kabakalañi haluswanela kufelisa ndimbelela?
9 Nihaikaba kuli mutu yalufoselize haakupi swalelo, lwakona kueza lika zeñwi kuli lusike lwautwa hahulu butuku. Lukona kueza cwañi cwalo? Bo Georgette bababulezwi kwamulaho, batalusa kuli: “Nihaike kuli neku niingezi nako, nenituhezi kuba ni ndimbelela ni kunyemela bane babanga bo muunaaka. Kabakaleo, nenibile ni kozo yetuna ya mwa munahano.” Haiba lufelisa ndimbelela, haluna kuutwa hahulu butuku kwa pilu mi lukaswalisana hande ni babañwi. Kueza cwalo hape kwakona kulutusa ka nzila yeñwi—lwakona kutuhela kunahana ka za taba yeo ni kuba ni tabo hape mwa bupilo. (Liprov. 11:17) Kono kucwañi haiba kusalubela taata kuswalela, nihaiba hamulaho wa kusatibela maikuto aluna?
ZEKONA KUMITUSA KUFELISA BUNYEMI
10. Ki kabakalañi haluswanela kutuhelela nako kuli ifite ilikuli butuku boluutwa bukone kukusufala? (Mubone ni maswaniso.)
10 Ki lika mañi zekona kumitusa kufelisa bunyemi? Nzila yeñwi yemukona kueza cwalo ka yona ki kutuhelela nako kuli ifite ilikuli butuku bomuutwa bukusufale. Mutu yaholofezi hahulu hafilwe likalafo, utokwanga nako yeñata kuli afole. Ka nzila yeswana, ni luna kukona kuluungela nako kuli butuku boluutwa bukusufale pili lusika swalela kale mutu yalufoselize, kuzwelela kwatasaa pilu.—Muek. 3:3; 1 Pit. 1:22.
Mutu yanani sitombo utokwa kusibabalela mi kukona kuunga nako kuli sifole, ka nzila yeswana, kukona kuunga nako kuli butuku boluutwa kwa pilu bufele (Mubone paragilafu 10)
11. Tapelo ikona kumitusa cwañi kuba ni moya wa kuswalela?
11 Mukupe Jehova kuli amituse kuba ni moya wa kuswalela. c Bo Ann bababulezwi kwa makalelo, batalusa mone batuselizwe ki tapelo. Babulela kuli: “Nenikupile Jehova kuli aswalele mañi ni mañi mwa lubasi lwaluna kabakala lika zene lusika eza hande. Hasamulaho, nañolela bo ndate ni bakubona kubataluseza kuli nibaswalezi.” Bo Ann baitumelela kuli nesi nto yebunolo kueza cwalo. Kono babulela kuli: “Ninani sepo ya kuli kulikanyisa Jehova ka kuswalela bo ndate, kukasusueza bona ni bakubona kuituta zeñata ka za Jehova.”
12. Ki kabakalañi haluswanela kusepa Jehova kufita kunahana kuli maikuto aluna kamita alukile? (Liproverbia 3:5, 6)
12 Musepe Jehova, mi musike mwanahana kuli maikuto amina kamita alukile. (Mubale Liproverbia 3:5, 6.) Jehova kamita waziba zekona kulutusa. (Isa. 55:8, 9) Mi nikamuta haana kulubulelela kuli lueze lika zekona kulutahiseza butata. Kacwalo, halususueza kuba ni moya wa kuswalela, luswanela kukolwa kuli kueza cwalo kuka lutusa. (Samu 40:4; Isa. 48:17, 18) Kono haiba lusepa maikuto aluna, mwendi haluna kukona kuswalela babañwi. (Liprov. 14:12; Jer. 17:9) Bo Naomi bababulezwi kwamulaho, batalusa kuli: “Kwa makalelo, neniikutwa kuli nenisa tokwi kuswalela bo muunaaka kabakala mukwa wabona wa kubuha maswaniso a mapunu. Nenisaba kuli bakona kuniutwisa butuku hape kamba kuli nebaka libala kuli baniutwisize hahulu butuku. Mi neniikutwa kuli Jehova naautwisisa mone niikutwela. Kono nakala kulemuha kuli taba ya kuli Jehova wautwisisa maikuto aka haitalusi kuli walumelelana ni ona. Waziba moniikutwela mi waziba kuli kukaanga nako kuli bunyemi bwaka bufele, kono hape ubata kuli nibe ni moya wa kuswalela.” d
MUBE NI MAIKUTO AMANDE
13. Ka kuya ka Maroma 12:18-21, ki lika mañi zeluswanela kueza?
13 Kuswalela mutu yaluutwisize hahulu butuku hakutalusi feela kutuhela kuambola ka za zeneezahezi. Haiba mutu yaluutwisize butuku ki muzwale kamba kaizelaa luna, mulelo waluna ki kutahisa kozo mwahalaa luna. (Mat. 5:23, 24) Kufita kunyema, luswanela kubonisa sishemo ni kuswalela. (Mubale Maroma 12:18-21; 1 Pit. 3:9) Ki lika mañi zekona kulutusa kueza cwalo?
14. Luswanela kuikataza kuezañi, mi ki kabakalañi?
14 Luswanela kuikataza kuunga mutu yalufoselize sina mwamuungela Jehova. Jehova uketanga kubona zende kwa batu. (2 Makol. 16:9; Samu 130:3) Haiba luisa hahulu pilu kwa kubata mafosisa kwa batu, luka afumana; kono haiba luisa pilu kwa kubata bunde luka bufumana. Haiba luisa hahulu pilu kwa bunde bwa babañwi, kuka lubela hahulu bunolo kubaswalela. Ka mutala, muzwale yabizwa Jarrod utalusa kuli, “Kunibelanga hahulu bunolo kuswalela muzwale waka hanibapanya mafosisa aezize kwa lika zende zeñata zenitabela ka za hae.”
15. Ki kabakalañi kutaluseza mutu kuli mumuswalezi hakukona kutusa?
15 Nto yeñwi ya butokwa yeluswanela kueza, ki kutaluseza mutu yo kuli lumuswalezi. Ki kabakalañi? Mulemuhe zanaabulezi kaizeli Naomi yabulezwi kwa makalelo, uli: “Bo muunaaka neba nibuzize kuli, ‘Kana muniswalezi?’ Nekunibezi taata kubulela kuli, ‘Nimiswalezi.’ Nenilemuhile kuli nenisika baswalela luli kuzwelela kwatasaa pilu. Hamulaho wa nako, nenikonile kubabulelela ka bunolo kuli, ‘Nimiswalezi.’ Bo muunaaka baenga-enga miyoko hane nibabulelezi kuli nibaswalezi, nenikomokile hahulu kubona kuli taba yeo nei batusize kuikutwa kuimuluha mi ni na neniikutwile kuimuluha. Kuzwa feela ka yona nako yeo, nenikalile kubasepa hape mi seluli balikani hape.”
16. Ki lika mañi zemuitutile ka za kuswalela?
16 Jehova ubata kuli lube ni moya wa kuswalela. (Makolo. 3:13) Nihakulicwalo, kukona kulubela hahulu taata kuswalela babañwi. Kono lwakona kueza cwalo haiba lusatibeli maikuto aluna ni kueza molukonela kaufela kufelisa bunyemi. Haiba lueza cwalo, lwakona kuba ni maikuto amande.—Mubone mbokisi yeli, “ Lika Zetaalu Zemukona Kueza Kuli Muswalele Babañwi.”
MUNAHANE LIMBUYOTI ZEMUKABA NI ZONA HAIBA MUBA NI MOYA WA KUSWALELA
17. Kuba ni moya wa kuswalela kuka lutusa cwañi?
17 Lunani mabaka amañata haluswanela kuswalela babañwi. Halunyakisiseñi feela mabaka asikai. Libaka lapili kikuli, lulikanyisa ni kutabisa Ndataa luna yasishemo, yena Jehova. (Luka 6:36) Libaka la bubeli kikuli, lubonisa kuli lwaitumela hahulu ku Jehova kabakala kuli uluswalezi. (Mat. 6:12) Mi libaka la bulaalu kikuli, lukaba ni buiketo bwa kwa mubili mi lukazwelapili kuswalisana hande ni babañwi.
18-19. Ki lika mañi zekona kuzwa mwa kuswalela babañwi?
18 Haluswalela babañwi, lwakona kufumana limbuyoti zene lusika libelela. Ka mutala, mulemuhe zeneezahezi ku bo Denise bababulezwi kwamulaho. Nihaike kuli hakuna sene baziba ka nako yeo, muuna yanaatahisize kozi naalelile kuipulaya hamulaho wa kuatulelwa. Niteñi, naaitumezi hahulu kabakala kuli bo Denise neba muswalezi kuli mane akalisa kuituta Bibele ni Lipaki za Jehova.
19 Lukona kuikutwa kuli kuswalela mutu yomuñwi ki yeñwi ya lika zekona kulubela hahulu taata kueza—kono hape nto yeo ikona kuba yeñwi ya lika zetusa hahulu. (Mat. 5:7) Kacwalo, haike kaufelaa luna lueze molukonela kaufela kulikanyisa Jehova ka kuswalela babañwi!
PINA 125 “Tabo ki ya Babanani Sishemo!”
a Mabizo amañwi acincizwe.
b Mwa muinelo ocwalo, Mukreste ni Mukreste uswanela kueza katulo ya zakaeza.
c Mukene fa jw.org mi mubone mavidio a lipina zeñwi ali, “Muswalele,” ni “Luutwane Hape.”
d Nihaike kuli kubuha maswaniso a mapunu ki sibi mi kukona kuutwisa butuku yafoselizwe, haki libaka la ka Mañolo lelikona kutahisa teleko.
