Bo Mary ni bakubona bo John, a bapila mwa naha ili mo taba yende yakona kukutazwa kwa babeleki babañata babazwa kwa Philippines. Ka nako ya butuku bobuyambukela bwa COVID-19, bo Mary nebakalisize lituto zeñata za Bibele isiñi mwa naha yabona feela kono mane ni mwa linaha zeñwi. Nebaezize cwañi cwalo?

Bo Mary nebabuzanga baituti babona ba Bibele kuli, “Kana kunani mutu yomuñwi yemuziba yakona kutabela kuituta Bibele?” Hane balumelanga, neba bakupanga kuli babazibahaze ku bona. Hañata kunani zende zezwanga mwa kubuza puzo yeo. Libaka? Kakuli batu babaitebuha Linzwi la Mulimu hañata babatanga kutaluseza ba mwa lubasi lwabona ni balikani babona zebaituta. Ki lika mañi zende zezwile mwa kubuza puzo yeo?

Baituti ba bo Mary bo Jasmin, neba bazibahalize kwa batu babane bane batabela kuituta Bibele. Balibañwi kwa batu bao, bababizwa bo Kristine, nebaikolanga hahulu kuituta kuli mane nebakupile bo Mary kuli baitutange ni bona habeli ka sunda. Bo Mary hane babuzize bo Kristine ka za haiba kunani mutu yomuñwi yebaziba yanaabata kuituta Bibele, nebabulezi kuli, “Eni kunani, nika mizibahaza kwa balikani baka.” Mwa lisunda lisikai, bo Kristine nebazibahalize balikani babona babane, ili bane batabela kuituta Bibele, ku bo Mary. Hasamulaho, bo Kristine nebazibahalize balikani babona babañwi hape ku bo Mary, mi babañwi ku bona nebaezize nto yeswana.

Bo Kristine nebabata kuli lubasi lwabona kwa Philippines ni lona luitute Bibele. Kacwalo, baambola ni mwanaa bona wamusizana yabizwa Andrea. Kwa makalelo, Andrea naanahana kuli, ‘Lipaki bashutana ni babañwi, habalumeli ku Jesu, mi baitusisanga feela Testamente Yakale.’ Kono hamulaho wa kuituta feela hañwi, mubonelo wahae wacinca. Nako kaufela hanaaitutanga taba yenca mwa Bibele, naabulelanga kuli, “Taba ye izwa mwa Bibele; kacwalo, ilukela kuba ya niti!”

Hamulaho wa nako, Andrea azibahaza balikani bahae bababeli ni yanaabeleka ni yena, ku bo Mary. Hape, bo Angela babali libofu ili bo ndatahe Andrea babasali, ni bona nebateelezanga kwa tuto bo Mary basazibi. Kono zazi leliñwi, bo Angela bataluseza Andrea kuli abazibahaze ku bo Mary mi ni bona baikupela kuzamaisezwa tuto ya Bibele. Bo Angela nebatabela hahulu zene baituta. Mwa kweli iliñwi feela, nebakonile kupeta Mañolo amañata mi nebabata kuli baitutange hane ka sunda! Ka kutusiwa ki Andrea, bo Angela bakalisa kufumanehanga kamita kwa mikopano ka kuitusisa progilamu yekonahalisa kuli batu babonane.

 Bo Mary hane balemuhile kuli bo muunaa bo Kristine bababizwa bo Joshua nebabanga bukaufi ka nako ya tuto, bababuza haiba ni bona nebaka tabela kufumaneha kwa tuto. Bo Joshua babulela kuli, “Nikateeleza feela, kono musike mwanibuza lipuzo, haiba munibuza, nikaikema fateñi.” Kwa makalelo feela a tuto, ili mwahalaa mizuzu yeketalizoho, bo Joshua nebabuzize lipuzo zeñata hahulu kufita bo Kristine, mi ni bona nebabata kukalisa kuituta Bibele.

Puzo yebunolo ya bo Mary neitahisize kuli bafumane lituto za Bibele zeñata. Mi nebalukisize kuli lituto zeñata likone kuzamaiswa ki Lipaki babañwi. Lituto kaufela zene bakalisize bo Mary neli ze 28 mi neli mwa linaha zeene.

Bo Jasmin, baituti ba Bibele bapili bababulezwi mwa taba ye, nebakolobelizwe mwa April 2021. Bo Kristine nebakolobelizwe mwa May 2022 mi bakutezi kwa Philippines kuli bayo swalisana ni lubasi lwabona. Mi baituti babañwi bababeli ili bao bo Kristine nebazibahalize ku bo Mary ni bona bakolobelizwe. Hamulaho wa likweli lisikai kuzwa fobakolobelezwa bo Kristine, bo Angela ni bona bakolobezwa mi seli mapaina ba kamita. Bo muunaa bo Kristine, bona bo Joshua, ni mwanaa bona wamusizana Andrea, hamohocwalo ni baituti babañwi ba Bibele basweli baeza zwelopili.

Mwa linako za baapositola, taba yende neiyandulukile kapili mwahalaa mabasi ni balikani. (Joa. 1:​41, 42a; Lik. 10:​24, 27, 48; 16:​25-33) Ni mina mwakona kubuza baituti bamina ba Bibele mane ni batu babañwi babatabela kuli, “Kana kunani mutu yomuñwi yemuziba yakona kutabela kuituta Bibele?” Haiba mubuza puzo yebunolo yeo, ni mina mwakona kufumana batu babañata babatabela kuituta Bibele.