1, 2. Ki kezahalo mañi yekaswalisanisa hahulu batu mwa silimo sa 2018, mi ki kabakalañi? (Mubone siswaniso sesi fahalimu.)

LA MARCH 31, 2018, lizazi halinze lilikela, batu ba Mulimu ni batu babañwi babañata babatabela, bakakopana hamoho kueza mukiti wa ka silimo wa Mulalelo wa Mulena. Manzibwana a lizazi leo, batu babañata-ñata bakakopana hamoho kueza Kupuzo ya lifu la Kreste. Silimo ni silimo, mukiti wo uswalisanisanga hahulu batu mwa lifasi kaufela kufita kezahalo ifi kamba ifi!

² Kaniti, Jehova ni Jesu babanga ni tabo yetuna kubona batu babañata-ñata mwa lifasi habafumaneha kwa kezahalo yeipitezi yeo ka linako zeshutana-shutana fa lizazi leo. Bibele neipolofitile kuli “buñata bobutuna bwa batu, [babasina] yanaakona kubabala, babazwa mwa macaba kaufela ni mishobo ni batu ni malimi” nebaka huweleza kuli: “Kupiliswa kwaluna kuzwa ku Mulimu, yainzi mwa lubona, ni ku Ngunyana.” (Sin. 7:9, 10) Kwatabisa luli kuli Jehova ni Jesu balumbekiwanga ka nako ya mukiti wo wa Kupuzo, oezwanga silimo ni silimo!

3. Ki lipuzo lifi zekaalabiwa mwa taba ye?

³ Kunani lipuzo zebuzizwe zekaalabiwa mwa taba ye. (1) Lukona kuitukiseza cwañi ka butu ni kutusiwa ka kufumaneha kwa Kupuzo?  (2) Kupuzo iswalisanisa cwañi batu ba Mulimu? (3) Mañi ni mañi waluna ukona kueza cwañi kuli kube ni swalisano mwahalaa batu ba Mulimu? (4) Kana muta omuñwi lukaba ni Kupuzo ya mafelelezo? Haiba ki cwalo, ikaba lili?

4. Ki kabakalañi haluswanela kueza molukonela kaufela kufumaneha kwa Kupuzo?

⁴ Munahanisise butokwa bwa kufumaneha kwa Kupuzo. Muhupule kuli mikopano ya puteho ki kalulo ya bulapeli bwaluna. Jehova ni Jesu balemuhanga batu babaeza buikatazo kuli bayo fumaneha kwa mukopano wa butokwa hahulu wo mwa silimo. Kaniti, lubata kuli Jehova ni Jesu babone kuli lwaeza molukonela kaufela kufumaneha kwa Kupuzo, konji haiba luipumana mwa miinelo yelusa koni kuikayutula ku yona. Haiba lubonisa kuli luunga mikopano yaluna kuli ki ya butokwa, Jehova ukaba ni libaka leliñwi la kubuluka libizo laluna mwa “buka ya kupulo,” yona “buka ya bupilo”—mokuñozwi mabizo a batu babaka fiwa bupilo bobusa feli.—Mala. 3:16; Sin. 20:15.

5. Mazazinyana pili Kupuzo isika fita kale, lukona ‘kuitekula cwañi kuli lubone haiba lusali mwa tumelo’?

⁵ Mazazinyana pili Kupuzo isika fita kale, lwakona kulukisa nako ya kulapela ni kunahanisisa ka tokomelo za silikani saluna ni Jehova. (Mubale 2 Makorinte 13:5.) Lukona kueza cwañi cwalo? Ka ‘kuitekula kuli lubone haiba lusali mwa tumelo.’ Kuli lueze cwalo, lutokwa kuipuza lipuzo zelatelela: ‘Kana luli nalumela kuli ni mwa kopano inosi yaitusisa Jehova kueza tato yahae? Kana naeza monikonela kaufela kukutaza ni kuluta batu taba yende ya Mubuso? Kana likezo zaka zabonisa luli kuli nalumela kuli lupila mwa mazazi a mafelelezo ni kuli puso ya Satani ituha ifeliswa? Kana nisanani tumelo ku Jehova ni Jesu yeswana ni yene ninani yona hanineela bupilo bwaka ku Jehova Mulimu?’ (Mat. 24:14; 2 Tim. 3:1; Maheb. 3:14) Kunahanisisa likalabo kwa lipuzo zeo kuka lutusa kuziba seluli sona.

6. (a) Lukona feela kufumana bupilo bobusa feli haiba luezañi? (b) Muuna-muhulu yomuñwi uitukisezanga cwañi Kupuzo silimo ni silimo, mi mukona kumulikanyisa cwañi?

⁶ Mubale ni kunahanisisa Mañolo abonisa butokwa bwa Kupuzo. (Mubale Joani 3:16; 17:3.) Lukona feela kufumana bupilo bobusa feli haiba ‘luzwelapili kuziba’ Jehova ni ‘kubonisa tumelo’ ku Jesu, yena Mwanaa hae wa libanda. Mwakona kuitukiseza Kupuzo ka kuketa kubala litaba zeka mitusa kusutelela hahulu bukaufi ni Jehova ni Jesu. Munyakisise zaezanga muzwale yomuñwi yabile muuna-muhulu ka nako yetelele. Mwa lilimo zefelile, muzwale yo ukubukanyize litaba zeñata za mwa Tawala ya Mulibeleli zebulela za Kupuzo ni lilato lalubonisize Jehova ni Jesu. Lisunda lisikai pili Kupuzo isika fita kale, muzwale yo ukutelanga kubala litaba zeo ni kunahanisisa butokwa bwa mukiti wo. Ka linako zeñwi, uekezanga taba iliñwi kamba zepeli kwa litaba zakubukanyize zeo. Muuna-muhulu yo ulemuhile kuli hakutelanga kubala litaba zeo ni kubala Mañolo a Kupuzo ni kuanahanisisa, uitutanga lika zenca silimo ni silimo. Sa butokwa ni kufita kikuli, uikutwanga kuli lilato lahae ku Jehova ni Jesu latiiswanga silimo ni silimo. Kubalanga litaba zecwalo ni mina kuka mitusa kulata hahulu Jehova ni Jesu, ni kuitebuha hahulu zeba miezelize, mi hamuka eza cwalo, mukatusiwa hahulu ki Kupuzo.

7. (a) Ki lika mañi zanaakupile Jesu mwa tapelo fa busihu bwanaakalisize kueza Mulalelo wa Mulena? (b) Ki lika mañi zebonisa kuli Jehova ualabile tapelo ya Jesu?

⁷ Fa busihu bwanaakalisize kueza Mulalelo wa Mulena, Jesu naalapezi kuli balateleli  bahae kaufela baswalisane ni kuli baikole swalisano yeswana ni yanaanani yona yena ni Ndatahe. (Mubale Joani 17:20, 21.) Kaniti, Jehova ualabile tapelo yeo ya Mwanaa hae yalatwa, mi kacenu batu babañata balumela kuli Jehova naalumile Mwanaa hae. Kupuzo iswalisanisanga batu ba Mulimu kufita mukopano ufi kamba ufi, mi mukiti wo ubonisanga swalisano yetuna yebanani yona Lipaki za Jehova. Mwa linaha zeñata, batanga ba Jehova ba mishobo yeshutana-shutana mwa lifasi kaufela, bakopananga hamoho mwa libaka zabona za kulapelela. Mwa libaka zeñwi, hakukonahali feela kuli batu ba mishobo yeshutana-shutana bakopane hamoho kulapela Mulimu, mane babañwi banyaziseza taba yeo. Kono Jehova ni Jesu babanga ni tabo yetuna kubona batanga ba Mulimu babazwa mwa mishobo yeshutana-shutana habaswalisana!

8. Jehova naapolofitileñi ka za swalisano ka kuitusisa Ezekiele?

⁸ Ka kuba batu ba Jehova halukomoki haluikola swalisano. Mane Jehova naapolofitile kuli batanga bahae bakaswalisana. Halunyakisiseñi lushango lwanaafile ku mupolofita Ezekiele ka za kukopanya milamu yemibeli, ili ‘mulamu wa Juda’ ni ‘mulamu wa Josefa.’ (Mubale Ezekiele 37:15-17.) Taba yefumaneha mwa “Lipuzo Zezwa Kwa Babali,” yehatisizwe mwa Tawala ya Mulibeleli ya July 2016 neitalusize kuli: “Ka mupolofita wahae Ezekiele, Jehova naapolofitile kuli batu bahae bakakutela mwa Naha ya Sepiso ni kuli bakaswalisana hape kuba sicaba silisiñwi. Bupolofita bo hape nebubonisize kuli batu babaka lapela Mulimu mwa mazazi a maungulelo bakaba babaswalisani.”

9. Swalisano yebulezwi mwa bupolofita bwa Ezekiele ibonahalanga cwañi silimo ni silimo fa Kupuzo?

⁹ Kuzwa ka silimo sa 1919, Jehova naakalisize kuonga-onga ni kuswalisanisa Bakreste babatozizwe, babaswanisezwa ki ‘mulamu wa Juda.’ Hasamulaho, Bakreste babañata babanani sepo ya kupila fa lifasi, babaswanisezwa ki ‘mulamu wa Josefa,’ bakalisa kuswalisana ni Bakreste babatozizwe, mi likwata zepeli zeo zaba “mutapi ulimuñwi.” (Joa. 10:16; Zak. 8:23) Jehova naasepisize kuli naakakopanya milamu yemibeli yeo ni kuieza mulamu ulimuñwi mwa lizoho lahae. (Ezek. 37:19) Kacenu, likwata zepeli zeo liswalisani hamoho mi lietelelwa ki Mulena alimuñwi, yena Jesu Kreste yapahamisizwe, yataluswa mwa bupolofita bo kuli ki “Davida” mutangaa Mulimu. (Ezek. 37:24, 25) Swalisano yende yeo yenebulezwi mwa bupolofita bwa Ezekiele yabonahalanga fokusweu silimo ni silimo muta Bakreste babatozizwe babasali teñi fa lifasi, ni ba “lingu zeñwi,” bakopananga hamoho kueza mukiti wa Kupuzo ya lifu la Kreste! Kono lukona kuezañi ka butu kuli lubukeleze ni kuzwisezapili swalisano yeo?

10. Lukona kutusa cwañi kuli kube ni swalisano mwahalaa batu ba Mulimu?

¹⁰ Nzila yapili yelukona kutusa ka yona kuli kube ni swalisano mwahalaa batu ba Mulimu ki kuba ni buikokobezo. Jesu hanaasali fa lifasi, naaelelize balutiwa bahae kuli babe ni buikokobezo. (Mat. 23:12) Haiba luikokobeza, haluna kuba ni moya wa lifasi wa kuipahamisa. Kono buikokobezo buka lutusa kuipeya kwatasaa babaetelela mwa puteho, mi moya ocwalo wa kuutwa babaetelela, ukatahisa kuli kube ni swalisano mwa puteho. Sa butokwa ni kufita kikuli, haluikokobeza lutabisa Mulimu, kakuli Mulimu “uhanyeza babaikankabeka, kono ufa sishemo sahae ku babaikokobeza.”—1 Pit. 5:5.

11. Kunahanisisa zeliyemela liswanisezo za fa Kupuzo kukona kulutusa cwañi kutahisa kozo?

¹¹ Nzila yabubeli yelukona kutusa ka yona kuli kube ni swalisano mwahalaa batu ba Mulimu  ki ka kunahanisisa zeliyemela liswanisezo za fa Kupuzo. Lizazi la butokwa leo lisika fita kale, mi sihulu fa lizazi leo, munahanisise hahulu mulelo wa sinkwa sesisikaya mumela ni waine yefubelu. (1 Makor. 11:23-25) Sinkwa siyemela mubili wa Jesu osina sibi wanaafile sina sitabelo, mi waine iyemela mali ahae anaasuluzwi. Kono haluswaneli feela kuziba zeliyemela liswanisezo zeo. Muhupule kuli sitabelo sa tiululo sanaafile Kreste sibonisa lilato lelituna hahulu lanaabonisize Jehova ka kufana Mwanaa hae kuli ato lushwela, ni lilato lanaabonisize Jesu ka kuitatela kuto lushwela. Kunahanisisa lilato labonisize Jehova ni Jesu kuswanela kulususueza kubalata. Mi lilato laluna ni la Bakreste babañwi ku Jehova, liswana sina muhala olutamahanya, mi litahisa kuli luswalisane.

12. Mwa swanisezo ya mulena yanaabata kuli batanga bahae bamulife sikoloti, Jesu naabonisize cwañi fokusweu kuli Jehova ubata kuli luswalele babañwi?

¹² Nzila yabulaalu yelukona kutusa ka yona kuli kube ni swalisano mwahalaa batu ba Mulimu ki ka kuswalela babañwi. Haiba luswalela baba lufoselize, lubonisa kuli lwaitebuha tukiso ya Jehova ya kuswalela libi zaluna ka sitabelo sa Kreste sa tiululo. Halunyakisiseñi yeñwi ya liswanisezo zanaafile Jesu kwa Mateu 18:23-34. Muipuze kuli: ‘Kana naikatazanga kusebelisa zanaalutile Jesu? Kana nabonisanga pilu-telele ni kutwisiso kwa Bakreste babañwi? Kana nalata kuswalela baba nifoselize?’ Ki niti kuli, kunani bufosi bobunyinyani ni bufosi bobutuna, mi batu babasika petahala bafumananga hahulu taata kuswalela bufosi bobuñwi. Kono swanisezo ye, ilubonisa zalibelela ku luna Jehova. (Mubale Mateu 18:35.) Jesu naatalusize ka kuutwahala kuli haiba lusaswaleli mizwale baluna bababakile habuniti, Jehova haana kuluswalela. Luswanela kunahanisisa hahulu taba yeo! Haiba luswalela babañwi sina mwanaa lulutezi Jesu, lukabukeleza swalisano yaluna ni mizwale baluna.

13. Kulata kozo kukona kutahisa cwañi kuli luswalisane ni batu babañwi?

¹³ Haluswalela babañwi lubonisa kuli lwalata kozo. Muhupule kelezo ya muapositola Paulusi ya kuli luswanela ‘kulika ka taata  kubuluka buñwi bwa moya ka kozo yetamahanya.’ (Maef. 4:3) Ka nako ya Kupuzo ye, sihulu manzibwana a lizazi la Kupuzo, munahanisise za momupilisanela ni batu babañwi. Muipuze kuli: ‘Kana likezo zaka zabonisa kuli ni mutu yasabulukangi ndimbelela? Kana nizibahala kuba mutu yalikanga ka taata kutahisa kozo ni swalisano?’ Ze ki lipuzo za butokwa hahulu zeluswanela kunahanisisa ka nako ye ya silimo.

14. Lukona kubonisa cwañi kuli ‘lwaswalelana ka lilato’?

¹⁴ Nzila yabune yelukona kutusa ka yona kuli kube ni swalisano mwahalaa batu ba Mulimu ki kulata babañwi, mi halueza cwalo, lulikanyisa Jehova, yena Mulimu yalilato. (1 Joa. 4:8) Haluswaneli kubulela ka za mizwale baluna kuli, “Naziba kuli niswanela kulata mizwale baka kono hani batabeli”! Mubonelo ocwalo haulumelelani ni kelezo ya Paulusi ya kuli luswanela ‘kuswalelana ka lilato.’ (Maef. 4:2) Mulemuhe kuli Paulusi naasika bulela feela kuli luswanela ‘kuswalelana.’ Kono naaekelize kubulela kuli luswanela kueza cwalo “ka lilato.” Kunani shutano yeliteñi fo. Mwa liputeho zaluna kufumaneha batu ba mifuta kaufela bahohezi ku yena Jehova. (Joa. 6:44) Bakeñisa kuli Jehova ubahohezi ku yena, kuswanela kuba ni libaka lelitahisa kuli abalate. Kacwalo, haiba Jehova walata batu bao, luna lukona kupalelwa cwañi kubalata? Luswanela kubonisa lilato labata Jehova kuli lubonise kwa batu babañwi!—1 Joa. 4:20, 21.

15. Luziba cwañi kuli kukaba ni Kupuzo ya mafelelezo?

¹⁵ Zazi leliñwi lukaeza Kupuzo ya mafelelezo. Luziba cwañi cwalo? Mwa liñolo lapili lanaañolezi puteho ya Korinte ka kususumezwa ki moya wa Mulimu, Paulusi naañolezi Bakreste babatozizwe kuli ka kuezanga mukiti wa kuhupula lifu la Jesu silimo ni silimo, ‘nebazwelapili kushaela lifu la Mulena, kufitela ataha.’ (1 Makor. 11:26) Pulelo ya kuli “ataha” yeitusisizwe mwa timana ye, iama kwa kezahalo yeswana ya ‘kutaha’ yanaabulezi Jesu, hanaapolofita za nako ya mafelelezo. Hanaabulela ka za ñalelwa yetuna yetuha ikalisa, naaize: “Sisupo sa Mwanaa mutu sikabonahala mwa lihalimu, mi batu ba mishobo kaufela mwa lifasi bakainata fa lifuba kabakala kuutwa butuku, mi bakabona Mwanaa mutu hataha fa malu a lihalimu ka maata ni ka kanya yetuna. Mi [Jesu] ukaluma mangeloi ahae ka mulumo omutuna wa tolombita, mi akakubukanya baketiwa bahae kuzwa mwa maneku amane, kukala kwa mafelelezo amañwi a mahalimu kuisa kwa mafelelezo amañwi aona.” (Mat. 24:29-31) ‘Kukubukanywa kwa baketiwa’ kokutaluswa fa kuama kwa nako yeo Bakreste babatozizwe babasa liteñi fa lifasi bakaamuhela mupuzo wabona wa kuya kwa lihalimu. Taba yeo ikaezahala kwa makalelo a ñalelwa yetuna kono pili ndwa ya Armagedoni isika kalisa kale. Mi cwale ba 144,000 bakaswalisana ni Jesu kutula malena ba lifasi. (Sin. 17:12-14) Kupuzo yekaezwa pili babatozizwe basika kubukanyezwa kale kwa lihalimu, ki yona yekaba ya mafelelezo, kakuli ka nako yeo Jesu ukabe ‘atile.’

16. Ki kabakalañi hamuikatulela kuli mukaeza momukonela kaufela kufumaneha kwa Kupuzo ya silimo se?

¹⁶ Haike lueze molukonela kaufela kuli lutusiwe ka kufumaneha kwa Kupuzo yekaezwa la March 31, 2018. Mi haike lukupe Jehova kulutusa kuli luzwelepili kutahisa swalisano mwahalaa batu bahae! (Mubale Samu 133:1.) Muhupule kuli Kupuzo yeluka eza zazi leliñwi ikaba yona ya mafelelezo. Ka nako ya cwale, haike lueze molukonela kaufela kufumaneha kwa Kupuzo, mi luitebuhe swalisano yende yebanga teñi ka nako ya Kupuzo.