1. Muapositola Paulusi naaitumeleziñi?

MUAPOSITOLA PAULUSI naaitumelezi kuli fokuñwi naaikutwanga kuli wafokola. Naabulezi kuli mubili wahae neunze ‘usinyeha’ kuli mane naatokwa kuikataza kuli aeze zelukile, mi Jehova naasaalabangi litapelo zahae sina mwanaalibelelela. (2 Makor. 4:16; 12:7-9; Maro. 7:21-23) Paulusi hape naabulezi kuli batu bane bamulwanisa neba muunga kuli naafokola. * Nihakulicwalo, naasika tuhelela kuli mubonelo omaswe wa batu babañwi kamba mifokolo yahae itahise kuli aikutwe kuli naasi wa butokwa.—2 Makor. 10:10-12, 17, 18.

2. Ka kuya ka liñolo la 2 Makorinte 12:9, 10, ki tuto mañi ya butokwa yanaaitutile Paulusi?

² Paulusi naaitutile tuto ya butokwa ya kuli mutu wakona kuba ni maata niha ikutwa kuli wafokola. (Mubale 2 Makorinte 12:9, 10.) Jehova naabulelezi Paulusi kuli maata ahae ‘naabonahala mwa bufokoli,’ kutalusa kuli Jehova naaka mutiisa ka kumufa maata anaatokwa. Halunyakisiseñi libaka halusa swaneli kuzwafa lila zaluna hali lusheununa.

3. Ki kabakalañi haluswanela kutabela halulwahakiwa?

³ Hakuna mutu yatabela kulwahiwa. Kono haiba lila zaluna lilulwahaka mi lubilaezwa hahulu ki taba yeo, lwakona kuzwafa. (Liprov. 24:10) Kono luswanela kueza cwañi halulwahakiwa ki batu baba lulwanisa? Sina Paulusi, ni luna lwakona ‘kutabela  . . . halulwahakiwa.’ (2 Makor. 12:10) Kabakalañi? Kakuli batu haba lulwahaka ni kululwanisa ki sisupo sa kuli lu balutiwa ba Jesu ba niti. (1 Pit. 4:14) Jesu naabulezi kuli balutiwa bahae nebaka nyandiswa. (Joa. 15:18-20) Taba yeo neiezahezi mwa linako za baapositola. Ka nako yeo, batu bane balatelela sizo sa Magerike nebaanga Bakreste kuli nebasika ituta mi nebafokola. Mi muapositola Pitrosi ni muapositola Joani ki babañwi ba Bakreste bane bali Majuda bane baangiwa kuli ki “batu-tu feela babasika ituta.” (Lik. 4:13) Bakreste nebabonahala kuli nebafokola kakuli nebasa ikenyi mwa litaba za lipolitiki, nebasina mpi ya kubasileleza, mi nebakendiwa ki batu.

4. Bakreste ba kwa makalelo nebaezize cwañi batu bane babalwanisa hane babulezi litaba zemaswe ka za bona?

⁴ Kana Bakreste ba kwa makalelo bao nebatuhelezi mubonelo omaswe wa batu bane babalwanisa kutahisa kuli batuhele kuba balutiwa ba Kreste, kamba kutuhela kukutaza? Batili. Ka mutala, muapositola Pitrosi ni muapositola Joani nebaanga kuli ki tohonolo kunyandiswa kabakala kuli nebalatelela Jesu mi nebakutaza ku babañwi ka za hae. (Lik. 4:18-21; 5:27-29, 40-42) Balutiwa nebasika swabela kuba balateleli ba Jesu. Mane Bakreste ba kwa makalelo bane baikokobeza bao nebatusize hahulu batu kufita balwanisi babona. Ka mutala, mañolo ane bañozi babañwi ba Bakreste bao ka kuetelelwa ki moya wa Mulimu azwelapili kutusa batu babañata kacenu ni kubafa sepo ya za kwapili. Mi Mubuso one bakutalize kwa batu babañwi ukalile kubusa kwa lihalimu, mi hona cwale-cwale fa ukabusa batu kaufela fa lifasi. (Mat. 24:14) Kono mubuso omaata wa lifasi one unyandisize Bakreste bao hausa liyo, mi balutiwa babasepahala bao sebali malena kwa lihalimu. Kono batu bane babalwanisa, ili bane babatoile, bona bashwile, mi haiba bakazusiwa kwa bafu, bakabusiwa ki Mubuso one bakutalize Bakreste bao.—Sin. 5:10.

5. Ka kuya ka liñolo la Joani 15:19, ki kabakalañi batu ba Jehova habasa kutekiwi?

⁵ Kacenu, ka kuba batu ba Jehova, batu fokuñwi haba lukutekangi mi balusheununanga, kuluunga kuli halusika ituta ni kuli lwafokola. Kabakalañi? Kakuli halulikanyisi mubonelo obanani ona batu ba lifasi. Luezanga molukonela kaufela kuba ni buikokobezo, kuishuwa, ni kuipeya kuutwa. Kono mwa lifasi kacenu, batu batabela babanani moya wa buikuhumuso, babaikutwisisa, ni bakwenuheli. Kuzwa fo, haluikenyangi mwa litaba za lipolitiki mi lwahananga kukena busole mwa naha ifi kamba ifi molupila. Halulikanyisangi lika zebaeza batu mwa lifasi; kabakaleo, batu baluunga kuli lusiyalezi.—Mubale Joani 15:19; Maro. 12:2.

6. Ki lika mañi zasweli kupeta Jehova ka kuitusisa batu bahae?

⁶ Kusina taba ni moluungelwa ki lifasi, Jehova uitusisa luna kupeta lika zetuna. Uitusisa luna kukutaza kwa batu babañata-ñata kufita lili kaufela. Batanga bahae kacenu, bahatisa ni kuhasanya limagazini zetolokilwe mwa lipuo zeñata-ñata kufita magazini ifi kamba ifi mwa lifasi, mi baitusisa Bibele kutusa batu babañata-ñata kueza licinceho mwa bupilo bwabona. Jehova ki yena yaswanela kufiwa tumbo bakeñisa misebezi yesweli kuezwa yeo, kakuli uitusisa sikwata sa batu babaangiwa kuli bafokola kueza misebezi yemituna. Kono kana Jehova wakona kuitusisa luna ka butu kueza misebezi yemituna? Haiba ki cwalo, ki lika mañi zeluswanela kueza kuli alutuse? Halunyakisiseñi lituto zetaalu zelukona kuituta kwa mutala wa muapositola Paulusi.

7. Ki tuto mañi yapili yeluituta kwa mutala wa Paulusi?

⁷ Tuto yapili yeluituta kwa mutala wa Paulusi ki ya kuli haluswaneli kuitinga fa maata kamba buikoneli bwaluna halunze lusebeleza Jehova. Kambe Paulusi naanani mubonelo obanani ona batu ba lifasi, naakaba mutu yaikuhumusa ni yaitingile fa butali bwahae. Naahulezi mwa Tarese, muleneñi omutuna wa provinsi yeñwi ya Roma. Muleneñi wa Tarese neufumile mi neuzibahala kuli ki mona mokunani sikolo sesituna sesipahami. Paulusi neli mutu yanaaitutile hahulu, naalutilwe ki yomuñwi wa baeteleli ba Majuda yanaatumile hahulu ka nako yeo, yabizwa Gamaliele. (Lik. 5:34; 22:3) Mi ka nako yeñwi, Paulusi naatumile hahulu mwahalaa Majuda. Naabulezi kuli: “Nenieza zwelopili yetuna mwa tuto ya Sijuda kufita buñata bwa litaka zaka mwa sicaba sahesu.” (Magal. 1:13, 14; Lik. 26:4) Kono Paulusi naasika itinga fa butali bwahae.

8. Ka kuya ka liñolo la Mafilipi 3:8, Paulusi naangile cwañi lika zanaaitobohile, mi ki kabakalañi ‘hanaatabile hafokola’?

⁸ Paulusi naaitatezi kuitoboha lika zenetahisize kuli batu bamukuteke hahulu. Mane naangile lika zeo kuli neli “manyalala.” (Mubale Mafilipi 3:8.) Kono Paulusi naanyandisizwe kabakala kulatelela Kreste. Naatoilwe ki sicaba sahae. (Lik. 23:12-14) Mi naanatakilwe ni kulengiwa mwa tolongo ki bana bahabo yena, bona Maroma. (Lik. 16:19-24, 37) Hape, Paulusi naalemuhile kuli naasika petahala mi naatokwa kuikataza kuli aeze zelukile. (Maro. 7:21-25) Niteñi, naasika tuhelela batu bane bamulwanisa kamba mifokolo yahae kumupaleliswa kulatelela Kreste, kono ‘naatabile hafokola.’ Kabakalañi? Kakuli naalemuhile kuli hanaafokola, Mulimu naamufile maata anaatokwa.—2 Makor. 4:7; 12:10.

9. Luswanela kuunga cwañi miinelo yekona kutahisa kuli luikutwe kuba batu babafokola?

⁹ Haluswaneli kuikutwa kuli Jehova haakoni kulutusa kabakala kuli haluna buikangulo bobunde, halu batu babaitutile, kabakala  sizo saluna, kamba kabakala kutokwa masheleñi. Lika zeo haki zona zetahisa kuli Jehova aluunge kuba ba butokwa. Mane niti kikuli, mwahalaa batu ba Mulimu, “haki babañata bababutali ka mukwa wa batu, haki babañata babamaata, haki babañata ba lusika lwa bulena.” Kono Jehova uketile kuitusisa “lika za lifasi zeengiwa kuba zefokola.” (1 Makor. 1:26, 27) Kacwalo, musike mwatuhela kusebeleza Jehova kabakala miinelo yemukopana ni yona mwa bupilo. Kono mane miinelo yeo ilufa kolo ya kuli lubone mwasebeleza maata a Jehova ku luna. Ka mutala, haiba batu babañwi bamilwanisa kabakala litaba zemulumela, mulapele ku Jehova kuli amituse kuba ni bundume bwa kuyemela litaba zemulumela. (Maef. 6:19, 20) Kamba haiba mutalimana ni miinelo yetaata inge cwalo buhole, mukupe Jehova kuli amife maata, ilikuli mukone kumusebeleza ka momukonela kaufela. Nako kaufela hamubona mwamituseza Jehova, tumelo yamina ikatiya mi mukaikutwa kuba ni maata.

10. Ki kabakalañi haluswanela kunyakisisa mitala ya batu babasepahala bababulezwi mwa Bibele, inge cwalo bababulezwi kwa Maheberu 11:32-34?

¹⁰ Paulusi naaitutanga Mañolo ka kutukufalelwa. Naaitutile litaba zeñata, kukopanyeleza cwalo ni mitala ya batu bababulezwi mwa Linzwi la Mulimu. Paulusi hanaañolela Bakreste ba Maheberu, naabakupile kunahanisisa mitala ya batanga ba Jehova babañata babasepahala. (Mubale Maheberu 11:32-34.) Mulena Davida ki yomuñwi wa batu bao. Naasika lwaniswa feela ki lila zahae kono hape naalwanisizwe ki batu babañwi bane babanga balikani bahae. Halunze lunyakisisa mutala wahae, lukalemuha libaka Paulusi hanaatiisizwe ki kunahanisisa mutala wa Davida, ni molukona kulikanyiseza Paulusi.

11. Ki kabakalañi hane kubonahala inge kuli Davida naafokola? (Mubone siswaniso sesi fa kava.)

¹¹ Davida naangiwa ki Goliati, yena ndwalume yanaanani maata, kuli naafokola. Goliati hanaaboni Davida, “amusheununa ka kumunyaziseza.” Goliati naali singangalume, naanani lilwaniso, mi naaitukiselize ndwa. Kono Davida yena neli mutangana feela yanaasa zibi kulwana, mi nekubonahala inge kuli naasika itukiseza ndwa. Nihakulicwalo, Davida naasika tuhelela muinelo wahae kumuzwafisa. Naaitingile fa maata a Jehova, mi atula sila sahae.—1 Sam. 17:41-45, 50.

12. Ki muinelo mañi omuñwi otaata wanaakopani ni ona Davida?

¹² Davida naakopani ni muinelo omuñwi one ukona kumufokolisa. Naasebelelize Saule ka busepahali, yena yanaaketilwe ki Jehova kuli abe mulena wa Isilaele. Sapili, Mulena Saule naaitebuha Davida. Kono hasamulaho, Saule akala kuba ni buikuhumuso mi ashwela Davida muna. Akala kunyandisa Davida, mi mane abata kumubulaya.—1 Sam. 18:6-9, 29; 19:9-11.

13. Davida naaezizeñi Mulena Saule hanaa munyandisa?

¹³ Kusina taba kuli Mulena Saule naanyandisize Davida, Davida naazwezipili kumukuteka kabakala kuli naaketilwe ki Jehova kuli abe mulena. (1 Sam. 24:6) Naasikafa Jehova mulatu kabakala lika zemaswe zanaa muezize Saule. Kono Davida naaitingile ku Jehova kuli naaka mufa maata a kutiyela muinelo otaata wanaakopana ni ona.—Samu 18:1, ni manzwi a fahalimu.

14. Muapositola Paulusi naakopani ni muinelo mañi oswana ni wanaakopani ni ona Davida?

¹⁴ Muapositola Paulusi ni yena naakopani ni muinelo oswana wanaakopani ni ona Davida. Lila za Paulusi neli zemaata hahulu kumufita.  Baeteleli babañata ba bulapeli ni ba lipolitiki ba mwa linako zahae neba mutoile. Hañata, nebalumanga batu kuli bamunate ni kumukenya mwa tolongo. Sina Davida, Paulusi naanyandisizwe ki batu bane baswanela kuba balikani bahae. Mane batu babañwi mwa puteho neba mulwanisa. (2 Makor. 12:11; Mafil. 3:18) Kono Paulusi naatuzi batu kaufela bane bamulwanisa. Ka mukwa ufi? Naazwezipili kukutaza kusina taba ni twaniso. Naazwezipili kulata mizwale ni likaizeli bahae niha nebasa muezi hande. Mi mane sa butokwa nikufita kikuli naazwezipili kusepahala ku Mulimu mwa bupilo bwahae kaufela. (2 Tim. 4:8) Paulusi naakonile kueza lika zeo kaufela isiñi kabakala kuli naanani maata kono kabakala kuli naaitingile ku Jehova.

15. Ki lika mañi zeluswanela kueza batu haba lulwanisa, mi lukona kueza cwañi cwalo?

¹⁵ Kana ni mina musweli mwasheununwa kamba kunyandiswa ki batu bomukena ni bona mwa kilasi, bomusebeza ni bona, kamba ba lubasi lwamina babasi Lipaki? Kana mukile mwaezwa maswe ki mutu yomuñwi mwa puteho? Haiba ki cwalo, muhupule mutala wa Davida ni wa Paulusi. Mwakona kuzwelapili “kukoma bumaswe ka bunde.” (Maro. 12:21) Batu haba lulwanisa, haluna kubalwanisa sina Davida mwanaalwaniselize Goliati. Kono lukakoma bumaswe ka kueza molukonela kaufela kutusa batu kuituta ka za Jehova. Mukona kueza cwalo ka kuitusisa Bibele kuli mualabe lipuzo zebabuza batu, ka kubonisa likute ni musa hamuambola ni batu baba mieza maswe, ni ka kueza zende kwa batu kaufela, mane nihaiba kwa lila zamina.—Mat. 5:44; 1 Pit. 3:15-17.

16-17. Ki lika mañi zanaasika libala Paulusi?

¹⁶ Pili muapositola Paulusi asikaba kale mulutiwa wa Kreste, naali mutu yanaanani kashwau mi naanyandisize balutiwa ba Jesu. (Lik. 7:58; 1 Tim. 1:13) Jesu kasibili naatuhelisize Paulusi, yanaabizwa Saule ka nako yeo, kunyandisa puteho ya Sikreste. Jesu naaambozi ni Paulusi kuzwelela kwa lihalimu mi atahisa kuli Paulusi abe sibofu. Kuli Paulusi akale kubona hape, naanani kukupa tuso kwa batu babaswana banaasweli kunyandisa. Naaikokobelize  ka kuamuhela tuso yanaa mufile mulutiwa yabizwa Ananiasi, yena yanaa mutusize kubona hape.—Lik. 9:3-9, 17, 18.

¹⁷ Hasamulaho, Paulusi aba Mukreste yanaazibahala hahulu mwa puteho, kono naasika libala tuto yanaa mulutile Jesu mwa nzila yeliba kwa Damaseka. Paulusi naazwezipili kuikokobeza mi naatabela kuamuhela tuso yene bamufa mizwale ni likaizeli. Naabulezi kuli mizwale ni likaizeli mwa puteho ‘neba mutiisize.’—Makolo. 4:10, 11, litaluso ze kwatasi.

18. Ki kabakalañi fokuñwi halusa tabelangi kuamuhela tuso yeba lufa babañwi?

¹⁸ Luitutañi kwa mutala wa Paulusi? Halukalisa kuswalisana ni batu ba Jehova, mwendi nelutabela hahulu kuamuhela tuso yene balufanga, ka kuziba kuli nelusali limbututu za kwa moya mi nelusa tokwa kuituta zeñata. (1 Makor. 3:1, 2) Kono kana lusabonisa moya oswana ni kacenu? Haiba selusebelelize Jehova ka lilimo zeñata mi seluziba zeñata, mwendi fokuñwi lukona kuhana tuso yelufiwa, sihulu haiba ifiwa ki mutu yasikaba mwa niti ka nako yetelele kulufita. Nihakulicwalo, Jehova hañata uitusisanga mizwale ni likaizeli baluna kuli balutiise. (Maro. 1:11, 12) Kacwalo, haiba lubata kuli Jehova alutiise, luswanela kuamuhela tuso yelufiwa ki mizwale ni likaizeli baluna.

19. Ki kabakalañi Paulusi hanaakondisize?

¹⁹ Paulusi naapetile lika zeñata hamulaho wa kuba Mukreste. Kabakalañi? Kakuli naaitutile kuli mutu utokwa kuikokobeza ni kuitinga ku Jehova kuli akondise, isiñi kabakala maata ahae, sifumu, kamba simuluho yahae. Haike kaufelaa luna lulikanyise Paulusi ka (1) kuitinga ku Jehova, (2) kuituta kwa mitala ya batu bababulezwi mwa Bibele, ni (3) kuamuhela tuso yeba lufa Bakreste babañwi. Haiba lueza cwalo, Jehova uka lufa maata kusina taba kuli luikutwa kufokola.