1. Ki lika mañi zeelutahiseza tabo yetuna?

KWATABISA luli kuutwa zwelopili yetuna yeezahala mwa kopano ya Jehova! Silimo sesifelile, neluzamaisize lituto za Bibele zefitelela 10 milioni. Kusina kukakanya, taba yeo ibonisa kuli batanga ba Mulimu basweli babenyisa liseli labona! Hape batu babatabela babañata-ñata nebafumanehile kwa Kupuzo. Mi nebaitutile za mwanaaboniselize Mulimu lilato ka kulufa Mwanaa hae kuli ato luliulula kwa sibi ni lifu.—1 Joa. 4:9.

2, 3. (a) Ki lika mañi zesa lupaleliswi ‘kubenya sina mamonyi’? (b) Ki lika mañi zeluka nyakisisa zanaabulezi Jesu kwa liñolo la Mateu 5:14-16?

² Batu ba Jehova mwa lifasi kaufela babulela lipuo zeñata zeshutana-shutana. Kono taba yeo hai lupaleliswi kulumbeka hamoho Ndataa luna, yena Jehova. (Sin. 7:9) Kusina taba ni puo yaluna kamba sibaka kolupila, lwakona kubenya sina “mamonyi mwa lifasi.”—Mafil. 2:15.

³ Zwelopili yelubona mwa kopano, swalisano yeluikola, ni buikatazo bolueza bwa kuzwelapili kutona kwa moya, butahisa kuli Jehova akanyiswe. Mwa taba ye, lukanyakisisa mo lika zeo likona kukanyiseza Jehova.—Mubale Mateu 5:14-16.

4, 5. (a) Lukona kubenyisa cwañi liseli laluna kwandaa kueza feela musebezi wa kukutaza? (b) Lukatusiwa cwañi haiba luba babasilikani? (Mubone siswaniso sesi fa likepe 21.)

⁴ Mwa Tawala ya Mulibeleli ya Sikuwa ya June 1, 1925, nekunani taba yenenani toho ya taba yeli: “Liseli Mwa Lifasi la Lififi.” Mwa taba yeo, nekuñozwi kuli: “Mutu ukona feela kusepahala ku Mulena mwa mazazi a mafelelezo a . . . haiba aikataza kubenyisa liseli.” Taba yeo hape neiekelize kubulela kuli: “Mutu uswanela kueza cwalo ka kutaluseza batu mwa lifasi taba yende, ni kubonisa kuli wabenyisa liseli ka mupilelo wahae.” Kacwalo, nzila yeñwi yelubonisa ka yona kuli lubenyisa liseli laluna ki ka kukutaza taba yende ni kuluta batu kuba balutiwa. (Mat. 28:19, 20) Hape, lwakona kukanyisa Jehova ka mupilelo waluna wa Sikreste. Batu bolukutazanga ku bona fa mandu ni bolukopananga ni bona mwa linzila balemuhanga likezo zaluna. Kumenyeza batu ni kubalumelisa ka lilato kukatahisa kuli baluzibe hande ni kuziba mwainezi Mulimu yelulapela.

⁵ Jesu naabulelezi balutiwa bahae kuli: “Hamukena mwa ndu, mulumelise ba ndu yeo.” (Mat. 10:12) Mwa sibaka mwanaakutalezanga Jesu ni baapositola bahae, batu nebazibahala ka mukwa wa kumemela baenyi mwa mandu abona. Kono kacenu, batu mwa libaka zeñata habasana mukwa wo. Nihakulicwalo, haiba muatumela bañi ba mandu ni kubataluseza ka lilato libaka hamu bapotela, habana kuikalelwa kamba kufilikana. Hañata, kwatusa kumenyeza batu lusika kala kale kuambola ni bona. Mukwa wo utusize hahulu mizwale babaezanga bupaki bwa fa nyangela ka kuitusisa tukalani twa libuka. Haiba mueza bupaki bwa fa nyangela, ni mina mukalemuha kuli batu bakatabela hamu bamenyeza ni kubalumelisa ka lilato. Kueza cwalo kuka basusueza kutaha kwa kakalani ka libuka ni kuikungela lihatiso zaluna. Mi hamuba babasilikani, kuka mibela bunolo kukalisa puisano.

6. Ki sika mañi sene baezize bo mutu ni musalaa hae babasupezi kuli baekeze kwa bukombwa bwabona?

⁶ Muzwale yomuñwi ni musalaa hae ba kwa England, ili bao bubeli bwabona sebasupezi, banani makulanu atahisa kuli kubabele hahulu taata kukutaza fa ndu ni ndu. Kacwalo, baikatulela kumonyehela batu liseli labona ka kukutalezanga fande a lapa labona. Babeyanga libuka zetomile fa Bibele fa tafule ni kutoma tafule yeo fande ka nako yebatahanga bashemi kuto nga bana babona fa sikolo sesili bukaufi. Bashemi babañata batabelanga kuziba zeñata mi baikungelanga buka ya Questions Young People Ask—Answers That Work, Volyumu 1 ni 2, hamohocwalo ni libroshuwa. Kaizeli yomuñwi yali paina mwa puteho yabona naasebelize ni bona fa sibaka fone bakutalezanga. Bakeñisa moya wa silikani wanaabonisize kaizeli yo ni buikatazo bone baeza bo mutu ni musalaa hae bao bwa kubata kutusa babañwi luli, mushemi yomuñwi alumela kuituta Bibele.

7. Mukona kutusa cwañi batu babasazo taha mwa sibaka semupila ku sona?

⁷ Mwa lilimo za cwanoñu fa, kubile ni babalehi babañata mwa linaha zeñata. Mukona kutusa cwañi batu bao kuituta za Jehova ni milelo yahae? Mukalise ka kuituta kulumelisa mwa lipuo zebabulela batu babasazo taha mwa sibaka semupila ku sona. Progilamu ya JW Language yetusa kuziba mwakuambolisanela ni batu mwa lipuo zeshutana-shutana yakona kumitusa kueza cwalo. Hape mukaeza hande hamuka ituta kubulela manzwi asikai akona kutahisa kuli batabele kuteeleza kwa litaba zemubulela. Hasamulaho, mwakona cwale kubalibisa kwa webusaiti yaluna ya jw.org ni kubabonisa mifuta ya mavidio ni lihatiso zefumaneha mwa puo yabona.—Deut. 10:19.

8, 9. (a) Mikopano yaluna ya mwahalaa sunda ilutusanga cwañi? (b) Bashemi bakona kutusa cwañi bana babona kualabanga kwa mikopano?

⁸ Jehova ubonisize kuli walulata ka kulufa Mukopano wa Bupilo ni Bukombwa olutusa kuli luekeze  kwa buikoneli bwaluna bwa kukutaza mwa bukombwa. Buñata bwaluna lutusiwa ki litaelo zelufiwanga kwa mukopano wo mi luitutanga mwakuezeza misipili ya makutisezo ni mwakuzamaiseza lituto za Bibele.

⁹ Batu babanca babañata babatahanga kwa mikopano ya puteho balemuhile kuli bana baluna baalabanga kwa mikopano yeo. Bashemi, mutuse bana bamina kubenyisa liseli labona ka kubaluta kualaba kusina kubala litaba ze mwa hatiso yeitutiwa. Likalabo zabona zebunolo, ili zezwelela kwatasaa lipilu zabona fokuñwi litusize batu babatabela kuli bazibe bulapeli bwa niti.—1 Makor. 14:25.

10. Tukiso ya nako ya kulapela sina lubasi ikona kutusa cwañi lubasi kuswalisana?

¹⁰ Nzila yeñwi yemukona kubenyisa liseli ka yona ki kutusa kuli kube ni swalisano mwa lubasi lwamina ni mwa puteho. Bashemi bakona kueza cwalo ka kulukisa kuli babange ni Nako ya Kulapela Sina Lubasi kamita. Mabasi amañata fokuñwi abuhanga progilamu ya JW Broadcasting ka Nako ya Kulapela Sina Lubasi. Hase mufelize kubuha progilamu yeo, mwakona kulukisa kuli munyakisise momukona kuitusiseza litaba zemubuhile. Mushemi yazamaisa tukiso ya kulapela sina lubasi uswanela kuhupula kuli taba yekona kufita mwana yomunyinyani kwa pilu mwendi haikoni kutusa mwana ya mwa lilimo za kunonoboka. Mubonise mo mañi ni mañi mwa lubasi akona kusebeliseza litaba zeitutiwa, ilikuli batu kaufela mwa lubasi batusiwe.—Samu 148:12, 13.

11-13. Kaufelaa luna lukona kutusa cwañi kuli kube ni swalisano mwa puteho ni kutusa babañwi kuli babenyise liseli labona?

¹¹ Babanca bakona kutusa cwañi kuli kube ni swalisano mwa puteho, ili kutahisa kuli babañwi babenyise liseli labona? Haiba mu babanca babali Bakreste, muitomele sikonkwani sa kubonisa kuli muisa pilu Bakreste ba basupali. Mwakona kubakupa ka likute kuli bamikandekele taba yeñwi yeezahezi mwahalaa nako yebasebelelize Jehova. Kueza cwalo kuka mitiisa kwa moya, mi bubeli bwamina mukasusuezwa hahulu kubenyisa liseli la niti. Kaufelaa luna luswanela kubona teñi kuli lwaamuhela batu babanca babataha kwa Ndu ya Mubuso. Kueza cwalo kukatusa kuli kube ni swalisano mwa puteho mi kukasusueza baenyi mwa puteho kutusa mwa musebezi wa kubenyisa liseli. Hape mwakona kutusa baenyi haiba mubamenyeza ni kubalumelisa ka silikani, mane ni kubatusa kufumana fa kuina. Mubazibahaze ku babañwi, ili kubatusa kuli baikutwe kulukuluha.

¹² Haiba mukupiwa kuzamaisa mukopano wa  kuzwela mwa simu, mwakona kutusa hahulu Bakreste ba basupali kupeta hande musebezi wa kukutaza. Mwakona kulukisa kuli bafiwe sibaka sa kukutaleza ku sona sesiswanela. Ka linako zeñwi, mwakona kubakupa kusebeza ni muhasanyi wa mwanana, ilikuli abatuse haiba batokwa tuso. Hape mwakona kubonisa kutwisiso kwa Bakreste babasa koni kueza zeñata mwa bukombwa kabakala makulanu kamba miinelo yemiñwi. Kaniti, haiba mubonisa kutwisiso ni temuho kwa mizwale babañwi, mukatusa babanca, babahulu, base basebelize nako yetelele, ni babasazo taha mwa niti, kukutaza taba yende ka kutukufalelwa.—Liv. 19:32.

¹³ Muñoli wa samu naabulezi kuli: “Ki nto yende, yetabisa, batu ni banabahabo bona habapila hamoho mwa buñwi!” (Mubale Samu 133:1, 2.) Maisilaele hane bakopananga hamoho nebaitutanga zeñata ku babañwi bane balapela Jehova. Swalisano yene baikola neiswana feela sina oli yende ya kutozisa, ili yekatulusa. Ni mina mwakona kutusa kuli kube ni swalisano mwahalaa mizwale ni likaizeli bamina. Haiba mwaeza cwalo, lwamibabaza. Kono kana mwaikataza hahulu kuli muzibe hande mizwale ni likaizeli babañata mwa puteho?—2 Makor. 6:11-13.

14. Mukona kueza cwañi kuli mubenyise liseli lamina mwa sibaka semupila ku sona?

¹⁴ Mukona kueza cwañi kuli mubenyise hahulu liseli la niti ya mwa Bibele mwa sibaka semupila ku sona? Haiba mubonisa sishemo ku babapila mabapa ni mina mwa litaba zemubulela ni mwa likezo zamina, bakasusuezwa kuituta niti. Muipuze kuli: ‘Batu bonipila mabapa ni bona baniinga cwañi? Kana ndu yaka ni lapa laka likenile, ili kutusa kuli silalanda saluna sibonahale hande? Kana naitatelanga kutusa babañwi?’ Hamuikambota ni Lipaki babañwi, mubakupe ka maseme kutalusa mobatuselize bahabo bona, batu babapila mabapa ni bona, batu bababeleka ni bona, kamba babakena ni bona sikolo kabakala kubabonisa sishemo ni kuba ni muzamao omunde. Mi luli baka mitaluseza litaba zende zebaikozi.—Maef. 5:9.

15. Ki kabakalañi hakuli kwa butokwa kuzwelapili kutona?

¹⁵ Moya olubonisa ukona kutahisa kuli luikataze hahulu kubenyisa liseli kamba kutokwa. Jesu naakuta-kutezi kutaluseza balutiwa bahae kuli: “Muzwelepili kutona.” (Mat. 24:42; 25:13; 26:41) Kusina kukakanya, haiba lunahana kuli “ñalelwa yetuna” isali kwahule hahulu, kamba kuli haina kutaha mwa linako zelupila ku zona, haluna kuunga kuli musebezi wa kukutaza uswanela kuezwa ka putako. (Mat. 24:21) Mi mwa sibaka sa kubenyisa liseli mwa silalanda selupila ku sona, liseli laluna likatima hanyinyani-hanyinyani kufitela litima kutimelela.

16, 17. Ki lika mañi zemuswanela kueza kuli muzwelepili kutona?

¹⁶ Muinelo wa lifasi le haunze uzwelapili kutotobela, kaufelaa luna lutokwa kuzwelapili kutona. Jehova ukaanga muhato ka nako yeswanela. Ukaeza cwalo luli. (Mat. 24:42-44) Kono nako yeo isika fita kale, mube ni pilu-telele mi muzwelepili kutona. Mubalange Linzwi la Mulimu zazi ni zazi, mi mulapelange kamita. (1 Pit. 4:7) Muitute kwa mitala yeminde ya mizwale ni likaizeli bababile ni tabo kabakala kuzwelapili kutona ni kubenyisa liseli labona. Ka mutala, mwakona kuipalela taba yebonisa zeezahezi mwa bupilo bwa muzwale yomuñwi, yeli: “Ni Zwezipili ku Swala Mungundo wa Kubo ya Mujuda ka Lilimo ze 70,” mwa Tawala ya Mulibeleli ya April 15, 2012, makepe 18 kuisa 21.

¹⁷ Mupatehe kueza lika za kwa moya mi mueze siango ni mizwale ni likaizeli bamina. Kueza cwalo kuka mitahiseza tabo yetuna, mi mukabona kuli nako imata kapili. (Maef. 5:16) Lilimo-limo kwamulaho, mizwale baluna nebapatehile kueza musebezi wa Mubuso, mi nebapetile zeñata. Kono luna lupeta zeñata hahulu kacenu ka kutusiwa  ki Jehova. Lusweli kubenyisa hahulu liseli laluna ka nzila yenesika libelelwa.

18, 19. Baana-bahulu ba puteho bakona kulutusa cwañi kuli luzwelepili kutona ni kutiya kwa moya? Mufe mutala.

¹⁸ Kwatabisa kuziba kuli Jehova wakona kuamuhela sebelezo yaluna kusina taba kuli halusika petahala. Kacwalo, muitebuhe tukiso yatomile Jehova ya kuba ni baana-bahulu mwa puteho, bona “limpo zeli batu.” (Mubale Maefese 4:8, 11, 12.) Haiba mupotelwa ki baana-bahulu, muitusise hande nako yeo ka kuituta zeñata ku bona ni kuamuhela kelezo yebaka mifa.

¹⁹ Ka mutala, baana-bahulu bababeli mwa England nebaizo potela bo mutu ni musalaa hae bane babakupile kuli babatuse kutatulula butata mwa linyalo labona. Wamusali naaikutwa kuli muunaa hae naasaeteleli hande lubasi lwahae kwa moya. Muunaa hae aitumelela kuli naasi muluti yomunde, mi naasalukisangi kuli babe ni nako ya kulapela sina lubasi kamita. Baana-bahulu baitusisa mutala wa Jesu kuli batuse bo mutu ni musalaa hae bao. Jesu naababalezi balutiwa bahae mi naabafanga zene batokwa. Baana-bahulu bao basusueza wamuuna kulikanyisa Jesu. Basusueza musalaa hae kuba ni pilu-telele. Baana-bahulu hape bafa liakalezo zekona kutusa bo mutu ni musalaa hae bao kuswalisana kuli babange ni nako ya kulapela sina lubasi hamoho ni bana babona bababeli. (Maef. 5:21-29) Hasamulaho, baana-bahulu bababaza wamuuna kabakala buikatazo bwanaaeza. Bamususueza kutundamena ni kuitinga kwa moya okenile kuli umutuse kuba ndate yaetelela hande lubasi lwahae kwa moya. Lilato lene babonisize baana-bahulu bao ni tuso yene bafile neitusize lubasi lo kubenyisa liseli labona.

20. Ki lika mañi zekaezahala haiba mubenyisa liseli lamina?

²⁰ Muñoli yomuñwi wa samu naabulezi kuli: “Tabo ki ya mutu kaufela yasaba Jehova, yazamaya mwa linzila Zahae.” (Samu 128:1) Haiba mubenyisa liseli lamina ka kumema babañwi kuli basebeleze Mulimu, kueza lika zetusa kuli kube ni swalisano mwa puteho, ni kuzwelapili kutona, mukaba ni tabo yetuna. Babañwi bakabona misebezi yamina yeminde, mi bakasusuezwa kukanyisa Ndataa luna.—Mat. 5:16.